3 Bih-la-to tooi Yev-so bov,

"Meef tih voongf lengv-hunf Yiuh-haif huf hee haf?"

Yev-so tanv bov,

"Tih meef gang gee."

4 Bih-la-to bov gif see ziangh hemv lengv-hunf yoou ninh gee bov,

"Hauf saf meenf uk lengv-hunf neeh huf hee lai gai gee soih."

5 Danf tih,

geef-loh nge-nge bov,

"Geef yoou suanf bak lengv Yiuh-haif gee maiv lengv-hunf,

ziuv teef bek ting gee,

lokf Gia-lif-lif seengh hhai sih zi doongv nooih."

6 Bih-la-to giangf hingf vooi,

ziuh tooi bov,

"Geef tih lengv-hunf Gia-lif-lif gee haf?"

7 Geef it huh Yev-so tih lokf lengv Hi-lutf guanh-guanh neeh hhootf hee miaf gee,

ziuh hong geef booiv ningf Hi-lutf vooi.

Ngamf-ngamf neeh tif hoouh Hi-lutf yoou heeuv Ye-luf-sa-leengh.

8 Hi-lutf dekf heekf Yev-so vooi,

ziuh meenf huh giauh eengv,

geef duf ga tiang huh Yev-so haih foong vooi,

eenv veeih gua na geef hingf teeh Yev-so gee gua,

ya haih meengh Yev-so huk seenv zif mooqf hee sev geef dekf.

9 Hi-lutf tooi Yev-so go dunf hee,

danf tih geef meenf tanv geef gee.

10 Gif see ziangh hemv Siangf-dif lutf fapf gee lauh see nyunv yoou ninh,

gukf lingf goou geef.

11 Hi-lutf hemv leekf bingv geef gee ziuh hhiv manf Yev-so,

liauv geef,

hooi geef dingv foouf hiuf hee meenf huh giauh luang loouh vooi,

hong geef leengv ningf Bih-la-to neeh hhootf hee.

12 Gua na Hi-lutf hemv Bih-la-to lai suf,

lokf neeh veenf hee uif geef-loh ziuh bin tingf feengf yu vooi.

13 Bih-la-to yam gif see ziangh hemv huk hak gee gangf bek ting gee inf-inv miaf,

14 bov geef-loh,

"Meef-loh leeh lengv-hunf neeh huf hee miaf nooih miaf,

bov geef ziuv teef bek ting gee.

Danf tih,

hauf duf ga yoou dau na meef-loh tooi geef gua vooi,

saf meenf uk geef lai gai soih,

15 Hi-lutf ya saf meenf uk,

yuh hong geef leengv miaf.

Geef titf-titf meenf lai famh soih gaiv lai daiv gee,

16 guf seeh,

hauf yam lengv-hunf git geef don hee,

ziuh tek geef booiv."

18 Danf tih bek ting gee hemv goonf yanh bov,

"Ga lengv-hunf neeh huf hee booiv!

Tek Ba-la-ba sev hauf-loh!"

19 Ba-la-ba neeh huf hee tih eenv veeih yoou da heeuv zoouf fanh ga lengv-hunf nah hoop loouh gamv gee.

20 Bih-la-to tiang tek Yev-so,

ziuh hhin geef-loh fooif hemv.

21 Danf tih geef-loh ziangf hangh yanh meenf hengf bov,

"Dingf geef geen sipf zeef giaf!

Dingf geef geen sipf zeef giaf!"

22 Bih-la-to haih tamv fooif bov geef-loh,

"Veeih gai nif?

Lengv-hunf neeh huf hee huk gai gee seeu teeh vooi?

Hauf saf meenf uk geef lai gai gee soih tih gaiv lai daiv gee.

Too yi,

hauf dif git geef,

ziuh tek geef vooi."

23 Danf tih hemv goonf gif zukf sauv lookf-look yanh,

nge-nge dif yam oouv Yev-so dingf geen sipf zeef giaf,

sauv geef-loh gee ziuh yingf vooi.

24 Bih-la-to nah ziuf geef-loh gee iau hhiuv huk vooi,

25 ziuf geef-loh hhuf gee,

tek lengv-hunf zoouf fanh ga lengv-hunf bif hoop loouh gamv gee neeh huf vooi,

ya gauv Yev-so sev geef-loh,

suf saih geef-loh di leeuf sih lih.

26 Leekf bingv Loh-mah gee dai Yev-so booiv gee tif hoouh,

lai lengv-hunf Guh-lif-naif huf hee yam Si-meenv hee lokf dauf voo miaf,

geef-loh ziuh hoof geef loouh,

oouv sipf zeef giaf mee zav geen baiv huf geef vooi,

ap geef iaq hemf moh Yev-so booiv.

27 Lai bek ting dunf hee hemf moh Yev-so,

hhiv zung lai maih leekf hoouf hee dookf hungh Yev-so zung umf ook loouh ngai.

28 Yev-so tuanh huf gua miaf bov geef-loh,

"Maih leekf Ye-luf-sa-leengh gee haf,

meenf ngah veeih hauf ngai,

hheem veeih meef-loh toof-too hemv leekf ngif meef-loh gee ngai.

29 Eenv veeih veenf dif doongv,

lengv-hunf itf dingf bov,

'Meenf lai leekf hemv meenf guaf leekf gua gee,

ya meenf hoo noq leekf gua gee,

lai fok vooi!'

30 Neeh tif hoouh,

31 Doi dun singf-singv lukf-lukf gee duf hengf teeh neeh gee,

zeekf doi dun liangf-liang sof-sov gee dif di leeuf huk nif?"

32 Dang siv,

lai famf yinv voon huf hemv Yev-so hongf goonf ap miaf dingf daiv.

33 Booiv doongv lengv hhootf hee yam Hau-lopf-lef hee,

ziuh yoou ninh dingf Yev-so geen sipf zeef giaf vooi.

Ya dingf famf yinv voon huf hemv,

huf hee yoou moof vingv,

huf hee yoou moof maif.

34 Yev-so bov,

"Fa bef haf,

min soih geef-loh gee booiv!

Eenv veeih geef-loh huk seeu,

geef-loh meenf huh."

Leekf bingv gee ziuh hemv goonf yitf simv feenv hho yua Yev-so gee.

35 Bek ting gee nyunv yoou ninh dekf.

Lai hau Yiuh-haif gee liauv Yev-so,

sak tek geef bov,

"Geef go vanh gua,

zeekf geef tih Gi-dukf,

tih Siangf-dif liakf gee Neeh-huf-hee,

biang geef go toof-too lo!"

36 Leekf bingv gee ya geen booiv doou geef,

oouv yan hua sev geef goonv,

37 bov,

"Meef zeekf tih voongf lengv-hunf Yiuh-haif huf hee,

toof-too go toof-too lo!"

38 Yoou deng hau Yev-so lai faif mee^b tia bov,

"Neeh huf tih voongf lengv-hunf Yiuh-haif huf hee."

39 Famf yinv dingf yoou ningf Yev-so neeh voon huf,

lai huf hee sak tek liauv geef,

bov,

"Meef meenf tih Gi-dukf haf?

Go toof-too hemv hauf-loh lof!"

40 Gakf huf ziuh an geef,

bov,

"Meef gif yianv tih hongf yiangh tuh hingv fapf gee,

ya meenf mangf Siangf-dif yoou haf?

41 Doouf-loh tih gaiv lai tuh gee,

eenv veeih doouf-loh tuh gee hemv doouf-loh huk gee liang goonf,

danf tih lengv-hunf neeh huf hee meenf huk teeh sook hhinf-hhinh gua."

42 Ziuh bov,

"Yev-so haf,

meef huk voongf gee tif hoouh,

hhuf meef oov hauf!"

43 Yev-so hemv geef gang bov,

"Hauf titf-titf seengv meef,

veenf nooih meef dif hemv hauf hongf goonf yoou da lookf yuanv vooi."

44 Neeh tif hoouh,

daf hhaif veenf da teepf ngeeih dem,

leeuf ziqf duf yoop lamv vooi,

zi doongv veenf zoouf tamv dem zungv,

45 da veenf mee bin lamv vooi,

hoopf ling yoou da Seengf-dianf deekf biatf gee neeh fef hee,

it ziu lokf zing da iakf voon fiangf vooi.

46 Yev-so sauv lookf-look yam bov,

"Fa bef haf,

hauf gauv honf tinf hauf mee zee meef!"

Gang inv ziuh hunh hheei vooi.

47 Baiv fu ziangh huf hee dekf huh teeh neeh gee,

ziuh ngenv Siangf-dif,

bov,

"Lengv-hunf neeh huf hee titf-titf tih ngif yinv!"

48 Lengv-hunf vif yoou ninh dekf neeh gee,

dekf huh teeh neeh gee,

zung ngai umf ook leengv booiv vooi.

49 Suanv buf lengv-hunf hemv Yev-so tokf goonf neeh gee,

gangf maih leekf hemf moh Yev-so lokf Gia-lif-lif miaf neeh gee,

zung nyunv yoou looif-looiv dekf teeh neeh gee.

50-51 Lai hak Yiuh-haif huf hee yam Ye-seef hee,

geef tih Yiuh-haif seengh Ya-lif-mah-haif heeuv gee,

geef lengv-hunf nee ya maif ya daf luf.

Geef siangf-siangf vook hau sunv Siangf-dif gee gok gav miaf doongv,

ya meenf hongf i hhiv ha gee lengv-hunf teenf hee doi Yev-so.

52 Geef booiv div Bih-la-to,

hhuf Bih-la-to sev tiv Yev-so mee zee geef,

Bih-la-to hheeng vooi;

53 geef ziuh geq tiv Yev-so mee longf miaf,

oouv hoopf ganv maif-maif gee hhootf hee miaf duk loouh,

biang loouh da soongh feenf mee vooi.

Feenf neeh mee tih soongh mee,

tih sakf dinf huk tingf gee,

da ninh lokf hau meenf bok lengv-hunf gua.

54 Neeh veenf ngamf-ngamf tih zunh bif veenf,

ya dif hhooiv doongv An-sikf-veenf vooi.

55 Maih leekf hemf moh Yev-so lokf Gia-lif-lif miaf neeh gee di moh doongv ningf feenf,

dekf di leeuf biang tiv Yev-so mee vooi.

56 Geef-loh ziuh leengv booiv,

hooi Yev-so zunh bif hiang liauf hiang goou.

An-sikf-veenf neeh veenf hee,

geef-loh ziuf lutf fapf gui dingf gee hiu sikf vooi.