Yev-so biang namh bin tingf yan
2
1 Haih tamv veenf, yoou Gia-lif-lif seengh gee heeuv Zia-nav mee, lai lengv-hunf goonv moov giatf hun. Ma Yev-so yoou ninh, 2 vanh ya sing Yev-so hemv meenv huv geef gee, booiv ninh goonv ngaif. 3 Goonv moov duf meenf fah yoou, yan duf ga inv vooi. Ma Yev-so seengv Yev-so bov, "Geef-loh meenf lai yan vooi."4 Yev-so bov, "Ma hafa, guan hauf gai teeh? Tif hoouh hauf gee meenf doongv yoou."
5 Maih lai Yev-so zuk leekf nof gee bov, "Geef yam meef-loh huk gai gee, meef-loh ziuh huk gai gee."
6 Yoou ninh lai fangh namh sok mooqf, tih lengv-hunf Yiuh-haif anf guiv leei tuk bang gee tif hoouh yungh gee, fangh di mooqf daf hhaif deengf lai namh voon tamv hong.
7 Yev-so yam leekf nof gee, bov, "Diaqf namh dikf-dik fangh geef." Geef-loh ziuh diaqf namh dikf-dik zi doongv bak fangh vooi.
8 Yev-so yuh yam geef-loh bov, "En teeif gau ziqf uk miaf, hong sev guanh lih neeh huf hee."
Geef-loh ziuh ziuf booiv huk vooi. 9 Guanh lih neeh huf hee tee yan namh bin tingf neeh gee vooi, meenf huh yan neeh gee tih lokf leeuf miaf gee, nah lai leekf nof gau namh neeh gee toof-too huh. Guanh lih neeh huf hee ziuh yam sin langv miaf, 10 hemv geef gang bov, "Vanh zung tih sian div yan maif gee geen, foou moov gee goonv geeu vooi, nah div meenf hhoo maif gee geen, meef daf teengh yan maif gee doongv en teeif."
11 Neeh tih Yev-so haih it fooif huk seenv zif, tih yoou Gia-lif-lif seengh gee heeuv Zia-nav mee huk gee. Geef huk teeh neeh hhinh hee, biang lengv-hunf dekf huh geef gee yungv yauf, huh geef nyoo vooi, meenv huv geef gee ziuh zun geef vooi.
Yev-so sing lih Seengf-dianf
12 Teeh neeh hhinh hee hoouh looif, Yev-so hemv maih lai geef, gangf leekf tok geef gee hemv meenv huv geef gee, hongf goonf longf Gia-baiv-nungv, yoou ninh zih gi veenf vooi.
13 Dif doongv Lengv-hunf Yiuh-haif gee Yih-yuatf-ziatfb vooi, Yev-so ziuh geen Ye-luf-sa-leengh vooi. 14 Yoou da bang Seengf-dianf, geef dekf huh lai lengv-hunf ing teei, ing tuangf ing goop, ya lai lengv-hunf faif hooif ngov yoou ninh toonv sinf. 15 Yev-so ziuh oouv dakf miaf huk binv hiuf hee, voouf lengv-hunf gee gangf teei tuangf gee inf-inv lokf da bang Seengf-dianf uk booiv, diaqf sinf lengv-hunf toonv sinf neeh gee vooi, ya doongf hooif geef-loh gee vooi. 16 Geef yuh bov lengv-hunf ing goop gee, "Yif goouh neeh gee uk booiv, meenf zun oouv Seengf-dianf bef lai hauf mee miaf huk sif siangv!"
17 Meenv huv geef gee dekf huh vooi, ziuh tiang heekf yoou da ging veenv tia, bov, "Siangf-dif haf, hauf veeih Seengf-dianf meef mee timv mee geen gip, zing goh veeif lut teenf hee."
18 Dang siv hau lengv-hunf Yiuh-haif gee ziuh tooi geef bov, "Meef huk lai gai gee seenv zif sev hauf-loh dekf, miaf zingf mingf meef lai hhinf teenf huk?"
19 Yev-so tanv bov, "Meef-loh sek Seengf-dianf neeh mee vooi, tamv veenf zee neeif hauf dif sungf huk geef uif."
20 Lengv-hunf Yiuh-haif gee bov, "Seengf-dianf neeh mee huk tee teepf sok veeif nah maif, meef tamv veenf zee neeif zuh sungf huk lai tingf haf?" 21 Danf tih Yev-so gang Seengf-dianf neeh mee, hhiv sitf tih bov bun tinv geef mee. 22 Yev-so lokf daiv tingf leengv hoouh looif, meenv huv geef gee nah tiang heekf geef gang go neeh gee gua, ziuh siang sinf ging veenv hemv go Yev-so gang neeh gee vooi.
23 Yev-so yoou Ye-luf-sa-leengh gua Yih-yuatf-ziatf gee tif hoouh, haih liauh lengv-hunf eenv veeih dekf huh Yev-so huk seenv zif, ziuh siang sinf geef vooi. 24 Danf tih Yev-so toof-too meenf siang sinf geef-loh, eenv veeih geef liauv gaih too lai lengv-hunf gee timv teeh. 25 Geef ya meenf yungh naf nee seengv geef lengv-hunf tih di leeuf gee, eenv veeih geef took lengv-hunf gee timv teeh.