Danf tih Yev-so omf loou longf, oouv leekf moof tia teev yoou dauf matf. 7 Geef-loh ziangf tooi geef, Yev-so ziuh doongf loou mee teenf-teenf uif, bov geef-loh, "Yoou da meef-loh naf nee meenf lai soih gee, naf nee ziuh hhoo yi sian oouv dinf zakf geef." 8 Gang inv, geef yuh omf loou longf yoou dauf matf tia teev.

9 Geef-loh hingf heekf go neeh gee vooi, ziuh lokf lauh doongv un, di huf huf teenf hee booiv vooi, nah teengh Yev-so hemv maih nyunv yoou ninh neeh huf hee. 10 Yev-so ziuh doongf loou mee uif, tooi geef bov, "Hoix, geef-loh booiv leeuf vooi? Meenf lai naf nee dingf soih meef gee haf?"

11 Geef bov, "Zu haf, meenf lai."

Yev-so bov, "Hauf ya meenf dingf soih meef gee. Leengv booiv lo, lokf nooih hoouh looif meenf ngah famh soih fooif hemv vooi."

12 Yev-so yuh bov hemv goonf, "Hauf ziuh tih tooi ganv gee bangv. Hemf moh hauf gee, itf dingf meenf booiv yoou da yoop vooi, ya itf dingf deekf doongv yinf mingh gee bangv."

13 Lengv-hunf Fatf-lif-saif dangh gee bov geef, "Meef tih toof-too hooi toof-too huk zingf mingv, zingf mingv meef gee meenf zinv."

14 Yev-so tanv bov, "Tuif yianf hauf tih toof-too hooi toof-too huk zingf mingv, zingf mingv hauf gee ya tih zinv gee; eenv veeih hauf huh hauf lokf leeuf miaf, dif booiv leeuf; danf tih meef-loh meenf huh hauf lokf leeuf miaf, dif booiv leeuf. 15 Meef-loh anf lengv-hunf gee biau zunh miaf fuanf duanf lengv-hunf, danf tih hauf meenf fuanf duanf naf nee. 16 Ziuh tih hauf fuanf duanf lengv-hunf, hauf fuanf duanf gee ya tih heekf gee; eenv veeih meenf tih hauf na hee toof-too fuanf duanf, ya enf lai faif hauf miaf gee bef lai hemv hauf yoou ningf goonf fuanf duanf. 17 Lutf fapf sek meef-loh gee ya tia bov, 'Voon na lengv-hunf gee zingf mingv nah tih zinv gee.' 18 Hauf tih hooi toof-too huk zingf mingv, ya lai faif hauf miaf gee bef lai hooi hauf huk zingf mingv."

19 Geef-loh ziuh tooi geef bov, "Bef lai meef huf hee yoou leeuf nenh?"

Yev-so tanv bov, "Meef-loh meenf took hauf, ya meenf took bef lai hauf huf hee; meef-loh zeekf took hauf, ya took bef lai hauf huf hee." 20 Go neeh gee tih Yev-so yoou Seengf-dianf maiv lengv-hunf gee tif hoouh, yoou ningf feengf hianf siang neeh hhootf hee gang gee. Dang siv meenf lai lengv-hunf hoof geef, eenv veeih tif hoouh geef mee enf meenf doongv yoou.

21 Yev-so yuh hemv geef-loh gang, "Hauf dif booiv vooi, meef-loh dif div hauf, danf tih meef-loh dif daiv yoou da soih toof-too gee; lengv hauf booiv neeh hhootf hee, meef-loh meenf doongv lai."

22 Lingh doouh Yiuh-haif gee hingf vooi, ziuh bov, "Geef bov lengv geef booiv neeh hhootf hee, doouf-loh meenf doongv lai, sangf tih geef dif zeef satf haf?"

23 Yev-so bov geef-loh, "Meef-loh tih lokf dauf miaf gee, hauf tih lokf baiv miaf gee; meef-loh sukf i tooi ganv neeh mee, danf tih hauf meenf sukf i tooi ganv neeh mee. 24 Guf seeh hauf bov meef-loh, meef-loh dif daiv yoou da soih toof-too gee. Meef-loh zeekf meenf siang sinf hauf ziuh tih yungh yuanh yoou gee, ziuh itf dingf dif daiv yoou da soih toof-too gee."

25 Geef-loh ziuh tooi Yev-so bov, "Meef tih naf nee?"

Yev-so tanv bov, "Hauf lokf giangf hhai sih ziuh seengv meef-loh vooi. 26 Hauf lai haih liauh teeh dif bov meef-loh, dif fuanf duanf meef-loh; danf tih, faif hauf miaf gee neeh huf hee tih zinv gee, tih hhooh hhoouf gee; hauf oouv lokf ningf geef neeh hhootf hee hingf heekf gee seengv zee tooi ganv gee lengv-hunf."

27 Geef-loh meenf huh Yev-so hemv geef-loh gang gee tih bef lai gee teeh. 28 Guf seeh Yev-so seengv geef-loh bov, "Meef-loh zunv Yeenv-zeeh uif hoouh looif, itf dingf huh hauf ziuh tih yungh yuanh yoou gee, ya dif huh hauf meenf hhoouf toof-too huk teeh hhinf-hhinf gua; hauf gang go neeh gee zung tih ziuf bef lai maiv hauf gee. 29 Faif hauf miaf gee neeh huf hee hemv hauf yoou ningf goonf; geef meenf suif hauf biang hauf toof-too, eenv veeih hauf zung tih huk geef eengv gee teeh." 30 Yev-so gang go neeh gee gee tif hoouh, ziuh lai haih liauh lengv-hunf siang sinf geef vooi.

31 Yev-so hemv lengv-hunf Yiuh-haif siang sinf geef neeh gee gang, "Meef-loh zeekf siangf-siangf zun siuh hauf maiv gee, ziuh titf-titf tih meenv huv hauf gee vooi. 32 Teenf hee meef-loh dif took zinv li, zinv li dif biang meef-loh lai zeef yeeuv."

33 Geef-loh tanv bov, "Hauf-loh tih leekf lanv Yav-bov-la-hanf gee, lokf hau meenf lai hemv naf nee huk nof gua, meef di leeuf bov dif biang hauf-loh lai zeef yeeuv nif?"

34 Yev-so tanv bov, "Hauf titf-titf seengv meef-loh, too lai famh soih gee, zung tih hemv soih huk nof vooi. 35 Leekf nof yungh yuanh meenf sukf i gav lanf lanf zu mee, nah lai leekf da hhiangh yungh yuanh sukf i gav lanf neeh mee. 36 Zeekf Leekf-da-hhiangh Siangf-dif huf hee biang meef-loh lai zeef yeeuv, meef-loh ziuh titf-titf lai zeef yeeuv vooi. 37 Hauf huh meef-loh tih leekf lanv Yav-bov-la-hanf gee; danf tih meef-loh dif tiang ga hauf, eenv veeih meef-loh meenf ziapf siuf hauf maiv gee. 38 Hauf gang gee tih hauf yoou ningf bef lai neeh hhootf dekf huh gee; danf tih meef-loh huk gee tih lokf ningf bef lai meef-loh neeh hhootf hingf heekf gee."

39 Geef-loh bov, "Yav-bov-la-hanf tih bef lai hauf-loh huf hee."

Yev-so bov, "Meef-loh zeekf tih leekf lanv Yav-bov-la-hanf gee, ziuh itf dingf huk Yav-bov-la-hanf too huk gee teeh. 40 Hauf oouv lokf ningf Siangf-dif neeh hhootf hee hingf heekf gee zinv li seengv zee meef-loh vooi, danf tih en teeif meef-loh tiang ga hauf. Yav-bov-la-hanf meenf huk teeh neeh gee gua. 41 Meef-loh tih huk bef lai meef-loh huk gee teeh."

Geef-loh bov, "Hauf-loh meenf tih leekf suaiv, hauf-loh nah lai bef lai huf hee toof-too, ziuh tih Siangf-dif."

42 Yev-so bov, "Zeekf Siangf-dif tih bef lai meef-loh huf hee, meef-loh ziuh itf dingf dookf hauf, eenv veeih hauf tih lokf ningf Siangf-dif neeh hhootf miaf gee; hauf duf ga miaf doongv nooih vooi. Hauf meenf tih ziuf toof-too gee if see miaf gee, tih Siangf-dif faif hauf miaf gee. 43 Meef-loh veeih gai meenf took go hauf gee nif? Eenv veeih meef-loh meenf hingf lai go hauf gee loouh. 44 Meef-loh tih lokf yif hangv lai gee, geef tih bef lai meef-loh huf hee, meef-loh ooi ziuf bef lai meef-loh meenf maif gee see siangh booiv huk teeh. Geef lokf giangf hhai sih ziuh tih ga lengv-hunf gee, geef meenf nyunv yoou zinv li neeh fiangf hee, eenv veeih da timv geef mee meenf lai zinv li. Geef gang go gev tih sukf i beenh zikf geef mee, eenv veeih geef beenh laiv tih gang go gev gee, ya tih lengv-hunf gang go gev gee bef lai. 45 Eenv veeih hauf gang zinv li, meef-loh ziuh meenf siang sinf hauf. 46 Yoou da meef-loh lai naf nee hhoo yi zingf mingv hauf lai soih nif? Gif yianv hauf gang zinv li, meef-loh veeih gai meenf siang sinf hauf nif? 47 Sukf i Siangf-dif gee lengv-hunf, itf dingf hingf go Siangf-dif gee; meef-loh meenf hingf, eenv veeih meef-loh meenf tih sukf i Siangf-dif gee."

48 Lengv-hunf Yiuh-haif gee bov Yev-so, "Hauf-loh bov meef tih lengv-hunf Sa-mah-lif-yaf gee, ya lai yif hangv geen huf meef vooi, sangf tih meenf heekf li?"

49 Yev-so tanv bov, "Hauf meenf tih bif yif hangv geen huf gee. Hauf zun gingf bef lai hauf huf hee, danf tih meef-loh vuh yukf hauf. 50 Hauf meenf hhuf toof-too gee yungv yauf, danf tih lai huf hee dif hooi hauf hhuf, geef ya duan heekf sook. 51 Hauf titf-titf seengv meef-loh, lengv-hunf zeekf zun siuh go hauf gee, itf dingf yungh yuanh meenf daiv."

52 Lengv-hunf Yiuh-haif gee bov geef, "En teeif hauf-loh huh meef titf-titf tih yif hangv geen huf vooi. Yav-bov-la-hanf daiv vooi, sian zi neeh gee ya daiv vooi, meef ya enf bov, 'Lengv-hunf zeekf zun siuh go hauf gee, itf dingf yungh yuanh meenf daiv.' 53 Sangf tih meef bih gungv bef hauf-loh huf hee Yav-bov-la-hanf enf nyoo haf? Geef daiv vooi, sian zi neeh gee ya daiv vooi; meef yih vuiv meef tih naf nee nooh?"

54 Yev-so tanv bov, "Zeekf hauf toof-too yungv yauf toof-too, yungv yauf hauf gee ziuh meenf tuif gai gee; yungv yauf hauf gee tih bef lai hauf huf hee, ziuh tih meef-loh bov tih Siangf-dif meef-loh huf hee gee neeh huf hee. 55 Meef-loh meenf took geef, danf tih hauf took geef. Hauf zeekf bov hauf meenf took geef, hauf ziuh tih gang go gev, zing meef-loh teenf hee; danf tih hauf took geef, ya zun siuh go geef gee. 56 Gungv bef meef-loh huf hee Yav-bov-la-hanf eengf-eengv vook hau sunv hauf miaf gee neeh veenf hee; geef dekf huh vooi, ziuh meenf huh giauh eengv."

57 Lengv-hunf Yiuh-haif gee bov geef, "Meef duf meenf doongv ngoh teepf tui yoou, sangf tih meef huh Yav-bov-la-hanf gua haf?"

58 Yev-so bov, "Hauf titf-titf seengv meef-loh, enf meenf lai Yav-bov-la-hanf yoou, hauf duf ga yungh yuanh yoou vooi." 59 Geef-loh ziuh oouv dinf dif zakf geef. Danf tih Yev-so met uif vooi, lokf da Seengf-dianf uk booiv vooi.