3 Yev-so tanv bov, "Meenf tih geef famh soih, ya meenf tih bef maih geef gee famh soih, tih dif lokf baiv huf geef biang vanh huh Siangf-dif gee neengv likf. 4 Dim veenf bangv yoou, doouf-loh itf dingf hheem huk gongv neef faif hauf miaf neeh huf gee; it doongv veenf yoop, ziuh meenf lai lengv-hunf huk lai gongv vooi. 5 Hauf yoou tooi ganv gee tif hoouh, tih tooi ganv gee bangv."

6 Yev-so gang go neeh gee inv, ziuh taiv namh meeif longf dauf matf vooi, hhiauv namh meeif gee hemv bongf gee loouh goonf vooi, metf deeif gee geen baiv dav dav lak neeh huf vooi, 7 yam geef bov, "Meef booiv hoomf Si-lov-yaf mee vooi tuk." ("Si-lov-yaf" gee if see tih "Faif uk booiv") Geef ziuh booiv tuk vooi, leengv miaf gee tif hoouh ziuh dekf lai huh vooi.

8 Ningf lanf geef gee hemv lengv-hunf gua na siangf-siangf huh geef imv goonv neeh gee bov, "Lengv-hunf neeh huf hee, meenf tih gua na siangf-siangf ngov imv goonv neeh huf hee haf?" 9 Lai feenh hee bov, "Tih geef."

Ya lai feenh hee bov, "Meenf tih geef, di geef tenf."

Lengv-hunf neeh huf hee toof-too bov, "Tih hauf."

10 Geef-loh ziuh tooi geef bov, "Dav meef deei hee tih di leeuf maif gee?"

11 Lengv-hunf neeh huf hee tanv bov, "Lengv-hunf nooiv yam Yev-so gee neeh huf hee, hhiauv boongf sitf geen dav hauf vooi, yam hauf bov, 'Meef booiv hoomf Si-lov-yaf mee vooi tuk.' Hauf booiv giangf tuk, ziuh dekf lai huh vooi."

12 Geef-loh tooi geef bov, "Lengv-hunf neeh huf hee yoou leeuf?"

Geef bov, "Hauf meenf huh."

13 Geef-loh ziuh yin lengv-hunf gua na dav lak neeh huf hee doongv ningf lengv-hunf Fatf-lif-saif dangh gee neeh hhootf vooi. 14 Yev-so hhiauv boongf hheeif dav geef neeh veenf hee tih An-sikf-veenf. 15 Lengv-hunf Fatf-lif-saif dangh gee yuh tooi geef tih di leeuf dekf lai huh gee. Geef seengv geef-loh bov, "Geef metf deeif geen dav hauf vooi, hauf booiv giangf tuk, ziuh dekf lai huh vooi."

16 Lai lengv-hunf Fatf-lif-saif dangh gee gi huf bov, "Lengv-hunf neeh huf hee meenf tih lokf ningf Siangf-dif neeh hhootf miaf gee, eenv veeih geef meenf zun siuh An-sikf-veenf."

Danf tih ya lai feenh hee bov, "Lengv-hunf lai soih huf hee dif huk lai seenv zif neeh gee uk haf?" Geef-loh ziuh feenv goonf vooi.

17 Geef-loh yuh tooi lengv-hunf dav lak neeh huf hee fooif hemv, bov, "Geef hheeif dav meef deei hee vooi, meef bov geef tih lengv-hunf gai huf hee?"

Geef bov, "Geef tih sian zi huf hee."

18 Lengv-hunf Yiuh-haif gee meenf siang sinf gua na geef dav lak, en teeif nah dekf lai huh gee, foou doongv yam bef maih geef gee miaf, 19 tooi geef-loh bov, "Neeh huf tih leekf da hhiangh meef-loh huf hee haf? Meef-loh bov geef dav lak lokf haiv miaf, en teeif di leeuf dekf lai huh vooi?"

20 Bef maih geef gee tanv bov, "Hauf-loh huh geef tih leekf da hhiangh hauf-loh huf hee, dav lak lokf haiv miaf. 21 Danf tih en teeif geef di leeuf dekf lai huh vooi, hauf-loh meenf huh. Naf nee hheeif dav geef deei vooi, hauf-loh ya meenf huh. Meef-loh booiv tooi geef lo, geef duf ga nyoo vooi, toof-too took gang toof-too gee teeh vooi." 22 Bef maih geef gee mangf lengv-hunf Yiuh-haif gee nah teenf gang; eenv veeih lengv-hunf Yiuh-haif gee duf ga hamf liangf maif vooi, zeekf lai lengv-hunf singv nginf Yev-so tih Gi-dukf, ziuh voouf geef uk huif hangv vooi. 23 Guf seeh bef maih geef gee nah bov, "Geef duf ga nyoo vooi, meef-loh booiv tooi geef lo."

24 Lengv-hunf Fatf-lif-saif dangh gee ziuh haih ngeeih fooif yam lengv-hunf gua na dav lak neeh huf hee miaf, bov geef, "Meef hheem guiv yungv yauf sev Siangf-dif. Hauf-loh huh lengv-hunf neeh huf hee tih lai soih gee."

25 Geef bov, "Geef tih meenf tih lengv-hunf lai soih gee, hauf meenf huh; danf tih hauf huh teeh hhinh hee, gua na hauf tih dav lak gee, en teeif hauf dekf lai huh vooi."

26 Geef-loh ziuh tooi geef bov, "Geef huk gai gee loouh meef vooi, geef di leeuf hheeif dav meef deei gee?"

27 Geef tanv bov, "Hauf duf ga seengv meef-loh vooi, danf tih meef-loh meenf hingf sav; veeih gai en teeif yuh tiang hingf nif? Sangf tih meef-loh ya dif tiang huk meenv huv geef gee haf?"

28 Geef-loh ziuh an geef bov, "Meef tih meenv huv geef gee noh! Hauf-loh tih meenv huv Mov-si gee. 29 Hauf-loh huh Siangf-dif hemv Mov-si gang go gua; danf tih lengv-hunf neeh huf hee, hauf-loh meenf huh geef lokf leeuf miaf."

30 Lengv-hunf neeh huf hee bov geef-loh, "Gengv teenf hee, geef hheeif dav hauf deei vooi, meef-loh daf meenf huh geef lokf leeuf miaf. 31 Hauf-loh huh Siangf-dif meenf hingf sav lengv-hunf lai soih gee, nah hingf sav lengv-hunf gingf baif geef, ya ziuf zih if geef gee booiv huk neeh gee. 32 Lokf hau zi miaf, meenf hingf gua lai lengv-hunf hheeif lai dav dav lak lokf haiv neeh gee gua. 33 Lengv-hunf neeh huf hee zeekf meenf tih lokf Siangf-dif neeh hhootf miaf gee, geef ziuh meenf huk lai gai gee."

34 Geef-loh bov geef, "Meef titf-titf tih lai lokf da soih uk miaf gee, ya dif gau hunv hauf-loh yoou haf?" Geef-loh ziuh voouf geef uk booiv vooi.

35 Yev-so hingf huh geef-loh voouf geef uk booiv vooi. Hoouh looif Yev-so div heekf geef vooi, ziuh tooi geef bov, "Meef siang sinf Yeenv-zeeh meenf?"

36 Geef bov, "Zu haf, naf nee tih Yeenv-zeeh nif? Hau biang hauf siang sinf geef."

37 Yev-so bov, "Meef duf ga dekf huh geef vooi, en teeif hemv meef gang go gee neeh huf ziuh tih geef."

38 Lengv-hunf neeh huf hee bov, "Zu haf, hauf zun!" Geef ziuh hhupf dauf matf vooi bai Yev-so.

39 Yev-so bov, "Hauf miaf tooi ganv neeh mee tih veeih liauh simh fuanf, biang neef meenf dekf lai huh gee, hhoo yi dekf lai huh vooi; neef dekf lai huh gee, fanv tingf dav lak vooi."

40 Lengv-hunf Fatf-lif-saif dangh hemv Yev-so yoou ningf goonf neeh gee, lai feenh hee hingf heekf go neeh gee vooi, ziuh bov, "Sangf tih hauf-loh ya dav lak vooi haf?"

41 Yev-so bov geef-loh, "Zeekf meef-loh tih dav lak gee, ziuh meenf lai soih vooi; danf tih en teeif meef-loh bov, 'Hauf-loh dekf lai huh', too yi soih meef-loh gee en yoou yoou."