Yev-so tih lengv-hunf tiangh tuangf maif huf hee
10
1 Yev-so yuh bov, "Hauf titf-titf seengv meef-loh, neef meenf lokf bak deenh loouh lukf tuangf, leeqf lokf gakf hhootf loouh gee, lengv-hunf neeh huf hee ziuh tih sookf, ziuh tih sookf geep goouh gee. 2 Neef lokf bak deenh loouh booiv gee, nah tih lengv-hunf tiangh tuangf gee. 3 Foou bak deenh gee hooi geef hheeif deenh, tuangf gee ya hingf sauv geef mee; geef ziuf nooiv tuangf gee booiv yam tuangf toof-too gee, yin geef-loh uk miaf. 4 Geef yin tuangf toof-too gee inf-inv uk miaf hoouh looif, geef ziuh booiv yoou dau na; tuangf gee ya di moh geef, eenv veeih geef-loh took nginh sauv geef mee. 5 Tuangf gee zuatf deeif meenf di moh lengv-hunf tengv gee; siang fanh, geef-loh huh lengv-hunf tengv gee vooi ziuh dif deuf, eenv veeih meenf took sauv lengv-hunf tengv gee." 6 Yev-so hemv geef-loh gang bih yif neeh mee, danf tih geef-loh meenf mingf fekf geef gang gee tih gai gee if see.7 Guf seeh Yev-so yuh bov geef-loh, "Hauf titf-titf seengv meef-loh, hauf ziuh tih tuangf gee deenh mee. 8 Too lai miaf gua na hauf gee zung tih sookf, tih sookf geep goouh gee; danf tih tuangf gee meenf hingf sav geef-loh. 9 Hauf tih deenh mee; too lai lokf hauf loouh booiv gee, itf dingf deekf giuf, ya hhoo yi uk hhoo yi loouh, ya div lai heekf hhunf boot. 10 Sookf gee miaf vooi, tih dif lookf, dif ga, dif fah; hauf miaf vooi, tih dif biang tuangf gee lai yinf mingh, ya lai yinf mingh geengf nungf.
11 Hauf tih lengv-hunf tiangh tuangf maif huf hee; lengv-hunf tiangh tuangf maif gee veeih tuangf gee daiv mingh. 12 Leekf gongv gee meenf tih lengv-hunf tiangh tuangf gee. Tuangf gee ya meenf tih geef toof-too gee, geef giangf dekf huh langv miaf vooi, ziuh fengf tuangf gee deuf vooi; langv hoof tuangf gee loouh vooi, diatf tuangf hoouf hee tan vooi. 13 Leekf gongv deuf vooi, eenv veeih geef tih go miaf gee, geef meenf gov tuangf gee.
14 Hauf tih lengv-hunf tiangh tuangf maif huf hee, hauf took tuangf hauf gee, tuangf hauf gee ya took hauf; 15 zing goh bef lai took hauf, hauf ya took bef lai teenf hee; hauf ya veeih tuangf gee daiv mingh. 16 Hauf enf lai tuangf gakf gee yoou, meenf yoou lukf tuangf neeh mee; hauf itf dingf hheem yin geef-loh miaf, geef-loh ya dif hingf sauv hauf mee, ya dif goop dingf hoouf hee vooi, guiv lengv-hunf tiangh tuangf huf hee vooi. 17 Bef lai dookf hauf, eenv veeih hauf tek mingh hauf hiuf hee booiv, hau sungf oouv leengv. 18 Meenf lai lengv-hunf geep lai mingh hauf hiuf hee booiv, tih hauf toof-too tek booiv gee. Hauf lai hhinf tek mingh hauf hiuf hee booiv, ya lai hhinf sungf oouv leengv miaf. Mingf lingf neeh mee tih hauf lokf bef lai hauf neeh hhootf ziapf siuf gee."
19 Lengv-hunf Yiuh-haif gee yuh veeih go neeh gee feenv goonf vooi. 20 Yoou da geef-loh lai haih liauh lengv-hunf bov, "Yif hangv ga geen huf geef vooi, geef denv vooi, veeih gai dif hingf geef nif?"
21 Ya lai feenh hee bov, "Go neeh gee meenf tih Yif hangv geen huf gee lengv-hunf gang gee. Yif hangv di leeuf hheeif lai dav lengv-hunf dav lak gee nif?"
Yev-so bif lengv-hunf Yiuh-haif gee gif zuatf
22 Yoou Ye-luf-sa-leengh, Lingv Seengf-dianf Ziatf doongv vooi, neeh tif hoouh tih fa nit. 23 Yev-so seek yoou Seengf-dianf gee Sov-lov-meenv tauv langh neeh hhootf hee. 24 Lengv-hunf Yiuh-haif gee vif geef loouh vooi, bov, "Meef dif biang hauf-loh saiv doongv gi tif? Meef zeekf tih Gi-dukf, ziuh daqf-daqf seengv hauf-loh."
25 Yev-so tanv geef-loh bov, "Hauf duf ga seengv meef-loh vooi, danf tih meef-loh meenf zun. Hauf hhoouf nooiv bef lai hauf mee too huk gee teeh, hhoo yi hooi hauf huk zingf mingv. 26 Danf tih meef-loh meenf zun, eenv veeih meef-loh meenf tih tuangf hauf gee. 27 Tuangf hauf gee hingf sauv hauf mee, hauf ya took geef-loh, geef-loh ya hemf moh hauf. 28 Hauf sev yungh seeng zee geef-loh, geef-loh yungh yuanh meenf miatf lai; naf nee duf meenf lokf lai da moof hauf geep geef-loh booiv. 29 Sev tuangf zee hauf gee bef lai, geef nyoo gua itf siatf, naf nee duf meenf lokf lai da moof bef lai hauf geep geef-loh booiv. 30 Hauf hemv bef lai beenh laiv tih huf hee."
31 Lengv-hunf Yiuh-haif gee yuh oouv dinf dif zakf Yev-so. 32 Yev-so tooi geef-loh bov, "Hauf ziuf bef lai yam hauf huk gee, huk haih liauh maif teeh miaf sev meef-loh dekf, meef-loh tih veeih teeh leeuf hhinh dif oouv dinf zakf hauf nif?"
33 Lengv-hunf Yiuh-haif gee tanv bov, "Hauf-loh meenf tih veeih maif teeh oouv dinf zakf meef, tih eenv veeih meef gang go famh Siangf-dif vooi; meef meenf gua tih lengv-hunf huf hee, daf oouv toof-too huk Siangf-dif vooi."
34 Yev-so bov, "Lutf fapf sek meef-loh gee meenf tih tia bov 'Hauf bov gua meef-loh tih tinf' haf? 35 Yoou da ging veenv gee go tih meenf feeif lai booiv gee, zeekf Siangf-dif yam lengv-hunf hingf go geef neeh gee tih tinf, 36 teenf hee, hauf ziuh tih bef lai too liakf yuh faif doongv tooi ganv gee neeh huf hee, hauf toof-too bov hauf tih Leekf-da-hhiangh Siangf-dif huf hee, meef-loh ziuh bov hauf gang go famh Siangf-dif vooi haf? 37 Hauf zeekf meenf huk teeh bef lai hauf gee, meef-loh ziuh meenf ngah siang sinf hauf; 38 danf tih hauf zeekf huk vooi, ziuh tuif meef-loh meenf siang sinf hauf, ya hheem siang sinf teeh neeh gee, hau biang meef-loh titf-titf huh bef lai yoou da hauf, hauf ya yoou da bef lai." 39 Lengv-hunf Yiuh-haif gee hingf vooi, yuh dif hoof Yev-so, danf tih geef deuf luat moof geef-loh vooi.
40 Yev-so yuh leengv Ye-danf hhoov gee fiangf ninh hhoom, doongv lengv gua na Ye-hanf hemv vanh tuk leei gee neeh hhootf vooi, ziuh zih yoou ninh. 41 Lai lengv-hunf dunf hee miaf div geef, bov, "Tuif yianf Ye-hanf meenf huk seenv zif mooqf-mooqf gua, danf tih Ye-hanf gang itf siatf guan i lengv-hunf neeh huf gee go zung tih zinv gee." 42 Yoou ninh ziuh lai lengv-hunf dunf hee siang sinf Yev-so vooi.