4 Meenv huv Yev-so huf hee, ziuh tih dif ing Yev-so gee Gia-liatf Yiuh-daf neeh huf hee, bov, 5 "Veeih gai meenf oouv gooh ganh booiv ing tamv bek mooqf ngoonf fiakf, miaf sev zee neef ngah gee nif?" 6 Geef gang go neeh gee, meenf tih eenv veeih geef gov neef ngah gee, tih eenv veeih geef tih sookf huf hee; geef guanh sinf hemv goonf gee, siangf-siangf lookf sinf da hooih gee.

7 Yev-so bov, "Suf saih geef lo! Hiang goou neeh ganh hee tih geef veeih bok hauf neeh veenf luf longf gee. 8 Eenv veeih siangf-siangf lai neef ngah gee hemv meef-loh yoou ningf goonf, danf tih hauf meenf siangf-siangf hemv lai meef-loh yoou ningf goonf."

9 Lai lengv-hunf Yiuh-haif dunf hee huh Yev-so yoou Bokf-daf-niv, ziuh booiv ninh vooi. Danf tih geef-loh meenf danf-danv tih eenv veeih Yev-so, ya dif tiang dekf La-sa-luf, ziuh tih lengv-hunf Yev-so biang geef lokf daiv tingf leengv gee neeh huf hee. 10 Guf seeh, gif see ziangh gee ya gif huaf ga Lu-sa-luf hemv booiv. 11 Eenv veeih lai lengv-hunf Yiuh-haif dunf hee veeih La-sa-luf tingf leengv neeh hhinh teeh, lif hhooiv geef-loh booiv zun Yev-so vooi.

12 Haih ngeeih veenf, haih liauh geen miaf gua ziatf gee lengv-hunf, hingf huh Yev-so dif miaf Ye-luf-sa-leengh. 13 Geef-loh ziuh nganv nyev dun yeeuv zung gee uk booiv zip geef, eengf-eengv yanh bov,

"Heev-saf-naf^b!

Feengf nooiv Zu mee miaf gee voongf Yih-seef-liatf huf hee, tih gaiv lai ngenv looih gee!"

14 Yev-so deekf doongv leekf luh huf hee, ziuh hheeih geen baiv vooi, zing goh ging veenv tia gee teenf hee,

15 "Bek ting Si-an gee haf, meenf ngah mangf;

meef-loh dekf, voongf meef-loh huf hee miaf vooi,

geef hheeih leekf luh huf hee miaf vooi."

16 Soof-soov, meenv huv Yev-so gee meenf mingf fekf teeh neeh gee, doongv geef tingf leengv geen fa deekf doongv yungv yauf hoouh looif, geef-loh nah tiang uif go neeh gee tih tia Yev-so gee; teeh neeh gee titf-titf zing goh ging veenv tia gee teenf hee fatf seeng vooi.

17 Dang siv lengv-hunf hemv Yev-so yoou ningf goonf neeh gee, geef-loh dekf huh Yev-so yam La-sa-luf lokf da feenf uk miaf, yuh biang geef lokf daiv tingf leengv, geef-loh ziuh suanf teeh neeh gee hhooiv vooi. 18 Haih liauh lengv-hunf eenv veeih hingf huh geef huk seenv zif neeh mee vooi, zung booiv huan ngingh geef. 19 Lengv-hunf Fatf-lif-saif dangh gee hemv goonf bov, "Meef-loh dekf, doouf-loh huk gai gee duf meenf huk lai tingf, suanv sif gaif gee lengv-hunf zung booiv hemf moh geef vooi."

20 Lengv-hunf geen Ye-luf-sa-leengh gua ziatf gingf baif neeh gee, lai feenh hee tih lengv-hunf Si-laf gee. 21 Geef-loh booiv div Gia-lif-lif seengh heeuv Bokf-saif-daf gee Feei-lif, hhuf geef bov, "Gof haf, hauf-loh tiang huh Yev-so." 22 Feei-lif ziuh booiv seengv teeh neeh hinh zee An-deekf-liatf, An-deekf-liatf ziuh hemv geef hongf goonf booiv seengv Yev-so.

23 Yev-so bov, "Yeenv-zeeh deekf doongv yungv yauf gee tif hoouh doongv vooi! Eenv veeih geef dif hhooiv bif vanh dingf daiv yoou baiv sipf zeef giaf, tingf leengv, geen fa vooi. 24 Hauf titf-titf seengv meef-loh, mekf mooqf hee zeekf meenf dok dauf matf daiv vooi, enf ziuf tih mekf mooqf hee; zeekf daiv vooi, ziuh giat makf dunf hee uk miaf. 25 Neef dookf hunh mingh toof-too hiuf hee gee, ziuh itf dingf daiv mingh; danf tih neef meenf gov mingh toof-too yoou tooi ganv neeh hiuf gee, ziuh itf dingf sunf mingh neeh hiuf hee zi doongv yungh seeng. 26 Lengv-hunf zeekf dif fokf teeh hauf, ziuh itf dingf hheem hemf moh hauf; hauf yoou leeuf, lengv-hunf fokf teeh hauf gee ya hheem yoou leeuf; lengv-hunf fokf teeh hauf neeh huf hee, bef lai hauf itf dingf vook hhoonv geef.

27 "En teeif timv hauf mee nyung nyang, hauf gang gai gee maif nif? Hauf gaiv lai hhuf bef lai go hauf luat tif hoouh neeh mee haf? Danf tih hauf ziuh tih veeih tif hoouh neeh mee miaf gee.

28 Baf haf, hi voongf meef biang hemv goonf dekf huh meef gee yungv yauf!"

Dang siv lai sauv mee lokf baiv fa, bov, "Hauf duf ga biang hemv goonf dekf huh hauf gee yungv yauf vooi, ya dif biang geef-loh dekf huh fooif hemv." 29 Lengv-hunf nyunv yoou ningf neeh gee hingf huh sauv neeh mee, ziuh bov, "Gungv loif hoon vooi." Ya lai gakf gee bov, "Lai hian seeh hemv geef gang go."

30 Danf tih Yev-so bov, "Sauv neeh mee meenf tih veeih hauf miaf gee, tih veeih meef-loh miaf gee. 31 En teeif tih simh fuanf neeh mee sif gaif gee tif hoouh, en teeif neeh mee sif gaif gee voongf^c dif bif voouf uk booiv. 32 Danf tih, hauf lokf bak matf bif zunv uif gee tif hoouh, ziuh dif gipf yinh too lai gee lengv-hunf miaf guiv hauf." 33 Geef gang go neeh gee, tih bov geef toof-too doongv nooih dif di leeuf daiv gee.

34 Hemv goonf tanv bov, "Lutf fapf hauf-loh gee seengv hauf-loh, Gi-dukf tih yungh yuanh duf yoou gee; meef di leeuf bov itf dingf lai lengv-hunf zunv Yeenv-zeeh uif nif? Yeenv-zeeh neeh huf hee tih naf nee nif?"

35 Yev-so bov, "Bangv yoou da meef-loh nyoof gee tif ganv meenf foong vooi, meef-loh hheem dim lai bangv gee tif hoouh booiv sunv, ha zinf yoop lamv miaf vooi meef-loh meenf dekf lai huh sunv. Yoou yoop lamv booiv sunv gee lengv-hunf, meenf dekf lai huh sunv, meenf huh dif booiv leeuf. 36 Too yi, meef-loh hheem dim enf lai bangv gee tif hoouh zun bangv neeh mee, hau biang meef-loh tingf leekf ngif bangv gee." Yev-so gang go neeh gee inv ziuh lif hhooiv geef-loh, met uif vooi.

37 Yev-so yoou dau na hemv goonf huk teenf liauh seenv zif vooi, danf tih geef-loh ya tih meenf zun geef. 38 Neeh tih dif zingf mingf sian zi Yih-saif-yav gang gee tih titf gee, geef bov,

"Zu haf, hauf-loh suanf gee lai naf nee siang sinf nif?

Zu gee neengv likf sev naf nee dekf huh nif?"

39 Geef-loh meenf siang lai sinf, tih eenv veeih Yih-saif-yav yuh bov,

40 "Siangf-dif biang dav geef-loh gee lak vooi,

biang timv geef-loh gee luaq vooi,

ha zinf dav geef-loh gee dekf huh,

timv geef-loh gee mingf fekf vooi,

ziuh fanh leengv miaf, hauf ziuh yiav geef-loh."

41 Yih-saif-yav dif gang go guan i Yev-so neeh gee, tih eenv veeih geef sian dekf huh Yev-so gee yungv yauf vooi.

42 Tuif yianf tih teenf hee, ya lai hak dunf hee zun Yev-so vooi. Danf tih geef-loh mangf lengv-hunf Fatf-lif-saif dangh gee, meenf goomh gung hhai singv nginf, ha zinf bif voouf uk huif hangv vooi. 43 Eenv veeih geef-loh ooi lengv-hunf ngenv looih, liauh gua ooi Siangf-dif ngenv looih vooi.

44 Yev-so sauv lookf-look bov, "Zun hauf gee, meenf danf-danv tih zun hauf, ya tih zun faif hauf miaf gee neeh huf hee. 45 Dekf huh hauf gee, ziuh tih dekf huh faif hauf miaf gee neeh huf hee. 46 Hauf huk bangv miaf doongv tooi ganv, biang too lai zun hauf gee meenf zih yoou da yoop.

47 "Lengv-hunf zeekf hingf heekf go hauf gee meenf booiv zun siuh gee, hauf meenf simh fuanf geef, eenv veeih hauf miaf meenf tih dif simh fuanf tooi ganv gee lengv-hunf, tih dif go tooi ganv gee lengv-hunf. 48 Neef gif zuatf hauf, meenf ziapf siuf go hauf gee neeh gee, yoou huanh siuf gee tif hoouh, go hauf gang gang neeh gee dif simh fuanf geef. 49 Eenv veeih hauf meenf tih hhoouf hauf toof-too gang go, tih faif hauf miaf gee bef lai mingf lingf hauf gang gee, geef yam hauf gang gai gee, hauf ziuh gang gai gee. 50 Hauf huh mingf lingf geef gee ziuh tih biang lengv-hunf lai yungh seeng. Guf seeh hauf gang gee, zung tih geef yam hauf gang gee."