4 Yev-so hingf vooi, ziuh bov, "Fingh neeh gee meenf daiv lai, tih veeih liauh yungv yauf^a Siangf-dif, dif biang Leekf-da-hhiangh Siangf-dif huf hee hongv gua teeh neeh hhinh hee deekf doongv yungv yauf." 5 Yev-so lokf hau miaf zung dookf Mah-daf hemv meeih geef huf hee Mah-lif-a, gangf La-sa-luf. 6 Danf tih geef hingf huh La-sa-luf fingh vooi, enf ziuf zih yoou lengv geef zih zih neeh hhootf voon veenf hemv.

7 Seeif looif hemv meenv huv gee gang, "Doouf-loh booiv Yiuh-haif fooif hemv lo."

8 Meenv huv gee bov, "Lauh see, nauf-nauh neeh duanf tif ganv, lengv-hunf Yiuh-haif gee dif oouv dinf zakf meef, meef ya dif booiv ninh yoou haf?"

9 Yev-so bov, "Veenf bangv meenf tih lai teepf ngeeih mooqf zungv hau haf? Lengv-hunf zeekf yoou veenf bangv booiv sunv, ziuh meenf det lai, eenv veeih geef dekf huh tooi ganv neeh mee gee bangv; 10 danf tih, lengv-hunf zeekf yoou da goomh booiv sunv, ziuh dif det, eenv veeih geef dekf meenf huh bangv."

11 Yev-so gang go neeh gee vooi, yuh bov geef-loh, "Feengf yuh doouf-loh huf hee La-sa-luf suanv teemh vooi, hauf dif booiv yam geef angv."

12 Meenv huv gee bov, "Zu haf, geef zeekf suanv vooi, ziuh dif maif tenf." 13 Hhiv sitf Yev-so gee if see tih bov La-sa-luf daiv vooi, danf tih geef-loh hhif bov Yev-so gang gee tih zingf siangv lap suanv.

14 Yev-so ziuh daqf-daqf seengv geef-loh bov, "La-sa-luf daiv vooi. 15 Veeih liauh biang meef-loh siang sinf, geef daiv gee tif hoouh, hauf meenf yoou ninh enf maif. En teeif doouf-loh booiv ningf geef lo."

16 To-mah ya yam Tiv-tuh-mah hee^b, geef yam hhiv ha gee meenv huv bov, "Doouf-loh ya hemv lauh see booiv, hemv geef hongf goonf daiv lo!"

17 Yev-so doongv Bokf-daf-niv vooi, huh La-sa-luf duf ga bok ti veenf vooi. 18 Bokf-daf-niv lif Ye-luf-sa-leengh meenf looiv, daf hhaif lai tamv mooqf gung li teenf hee. 19 Lai lengv-hunf Yiuh-haif dunf hee miaf tunf Mah-daf hemv Mah-lif-a, veeih hhuh geef-loh huf hee daiv vooi miaf an uif geef-loh. 20 Mah-daf hingf huh Yev-so miaf vooi, ziuh uk booiv zipf geef; danf tih Mah-lif-a enf ngov yoou da lanf loouh hiauf yoou.

21 Mah-daf bov Yev-so, "Zu haf, meef zeekf yoou nooih, hhuh hauf huf hee ziuh meenf daiv lai. 22 Danf tih hauf huh, ziuh tih en teeif, meenf guan meef hemv Siangf-dif hhuf gai gee, geef itf dingf sev meef."

23 Yev-so bov geef, "Hhuh meef huf hee itf dingf tingf leengv."

24 Mah-daf bov, "Hauf huh doongv tooi ganv huanh siuf Siangf-dif biang too lai gee lengv-hunf tingf leengv gee tif hoouh, geef itf dingf tingf leengv."

25 Yev-so bov, "Hauf biang lai lengv-hunf tingf leengv, hauf sev yinf mingh zee lengv-hunf; lengv-hunf zun hauf gee tuif yianf daiv vooi, ya itf dingf tingf leengv. 26 Too lai yoouf-yoou ziuh zun hauf gee lengv-hunf, itf dingf yungh yuanh meenf daiv. Meef siang sinf go neeh gee meenf?"

27 Mah-daf bov, "Zu haf, hauf siang sinf. Hauf siang sinf meef ziuh tih Gi-dukf, tih neef dif miaf doongv tooi ganv gee Leekf-da-hhiangh Siangf-dif huf hee."

28 Mah-daf gang go neeh gee inv, ziuh leengv booiv yam meeih geef huf hee Mah-lif-a, lookf-lookf seengv geef bov, "Lauh see miaf vooi, geef yam meef nenh." 29 Mah-lif-a it hingf heekf go neeh gee, ziuh gan hhuangf uif miaf booiv ningf Yev-so neeh hhootf hee. 30 Neeh tif hoouh, Yev-so enf meenf loouh voo yoou, enf ziuf yoou lengv Mah-daf zip geef neeh hhootf yoou. 31 Lengv-hunf Yiuh-haif yoou lanf Mah-lif-a an uif geef neeh gee, huh geef gan hhuangf uif miaf uk booiv, ziuh di moh geef, hhif bov geef dif booiv ningf feenf neeh hhootf hee ngai.

32 Mah-lif-a miaf doongv ningf Yev-so neeh hhootf vooi, it dekf huh geef, ziuh hhupf yoou na gok geef, bov, "Zu haf, meef zeekf yoou nooih, hhuh hauf huf hee ziuh meenf daiv lai."

33 Yev-so dekf huh geef ngai, ya dekf huh lengv-hunf Yiuh-haif hemf moh geef miaf neeh gee ngai, timv mee meenf huh giauh dookf, giauh ngaif tuh, 34 ziuh tooi geef-loh bov, "Meef-loh oouv geef booiv leeuf bok vooi?"

Geef-loh tanv bov, "Zu haf, meef miaf dekf."

35 Yev-so ngai vooi.

36 Lengv-hunf Yiuh-haif gee ziuh bov, "Meef dekf, geef meenf huh giauh dookf lengv-hunf neeh huf hee!"

37 Danf tih hhiv zung lai lengv-hunf bov, "Geef duf biang lai lengv-hunf dav lak gee dekf huh leh, sangf tih meenf yam lai lengv-hunf neeh huf hee tingf leengv haf?"

38 Yev-so yuh tiangv timv uif, geef miaf doongv na feenf. Feenh neeh mee tih soongh mee, lai dinf mee zaqf bak soongh mee loouh vooi. 39 Yev-so bov, "Yif dinf neeh mee uif."

Booi neef daiv neeh huf hee Mah-daf bov Yev-so, "Zu haf, geef duf ga daiv ti veenf vooi, itf dingf gooqf vooi!"

40 Yev-so bov, "Hauf meenf tih bov meef gua vooi haf? Meef zeekf siang sinf ziuh dif dekf huh Siangf-dif gee neengv likf."

41 Geef-loh ziuh yif dinf mee hingv vooi. Yev-so doongf dav vook fa, bov, "Baf haf, hauf gamh siaf meef, eenv veeih meef duf ga hingf sav hauf vooi. 42 Hauf huh meef siangf-siangf hingf hauf doouh goouf. Danf tih hauf gang go neeh gee, tih veeih liauh lengv-hunf nyunv yoou ningf neeh gee, hau biang geef-loh siang sinf tih meef faif hauf miaf gee."

43 Yev-so gang go neeh gee vooi, ziuh sauv lookf-lookf siuh bov, "La-sa-luf, uk miaf!" 44 Lengv-hunf daiv daiv neeh huf hee ziuh uk miaf, gok moof geef gee zung menf hoopf loouh vooi, na mee ya duk hoopf loouh vooi.

Yev-so yam geef-loh bov, "Get geef vooi, biang geef booiv!"

45 Lengv-hunf Yiuh-haif miaf tunf Mah-lif-a neeh gee, dekf huh Yev-so too huk gee teeh, ziuh lai haih liauh zun geef vooi. 46 Danf tih ya lai lengv-hunf feenh hee, booiv ningf lengv-hunf Fatf-lif-saif dangh gee neeh hhootf vooi, seengv Yev-so huk gee teeh zee geef-loh. 47 Gif see ziangh gee hemv lengv-hunf Fatf-lif-saif dangh gee, ziuh zipf zung yoou ningf goonf hhai gung huif huif ngif,

bov, "Lengv-hunf neeh huf hee huk teenf liauh seenv zif vooi, doouf-loh hheem di leeuf huk nif? 48 Zeekf biang geef teenf hee longf booiv, naf nee duf dif zun geef vooi, lengv-hunf Loh-mah gee dif miaf miatf Seengf-dianf doouf-loh mee hemv minv zukf doouf-loh gee."

49 Yoou da geef-loh lai huf hee yam Gai-yav-fav hee, neeh veeif hee tih geef huk daf gif see. Geef bov geef-loh, "Meef-loh took gai nenh! 50 Ya meenf tiang ziu, biang lengv-hunf huf hee ding bek ting gee daiv, ha zinf miatf minv zukf mee inv booiv vooi, teenf hee doi meef-loh meenf tih maif haf?"

51 Hhiv sitf, go neeh gee meenf tih geef toof-too dif gang gee, eenv veeih neeh veeif geef tih daf gif see, too yi Siangf-dif biang geef gang doongv nooih Yev-so dif ding minv zukf Yiuh-haif mee daiv. 52 Geef meenf danf-danv tih ding minv zukf Yiuh-haif mee daiv, ya dif biang leekf ngif Siangf-dif tan tav zih yoou gookf hhootf lengv foongv neeh gee, zipf zung yoou ningf goonf goop tingf hoouf hee. 53 Lokf neeh veenf uif, lingh doouh Yiuh-haif gee ziuh hamf liangf dif ga Yev-so.

54 Guf seeh, Yev-so meenf gung hhai doh dav yoou dau na lengv-hunf Yiuh-haif gee fooif hemv vooi. Geef ziuh lokf Bokf-daf-niv booiv zinf Yih-fav-lianv yoou ningf da loouh neeh mee vooi, ziuh hemv meenv huv gee zih yoou ninh.

55 Dif doongv lengv-hunf Yiuh-haif gee Yih-yuatf-ziatf vooi, lai haih liauh lengv-hunf lokf gookf mooqf voo geen Ye-luf-sa-leengh, gua ziatf sianv dif yoou ninh tuk toof-too bang^c. 56 Geef-loh doongv lengv div Yev-so, meenf div lai heekf, nyunv yoou da Seengf-dianf hemv goonf tooi goonf bov, "Meef-loh bov di leeuf hee? Geef meenf hooi miaf gua ziatf lef?" 57 Gif see ziangh gee hemv lengv-hunf Fatf-lif-saif dangh gee zoouh duf ga longf mingf lingf vooi, bov, "Zeekf lai lengv-hunf huh Yev-so yoou leeuf, ziuh hheem miaf boouf goouf, hau booiv eu geef."