Seeh-huv-singv-zuanf
Yev-so zuk seeh huv gee foou Seengf-lingv miaf
1
1-2 Hiv-a-feei-lov daf yinv haf,
yoou baiv fooif hee,
hauf duf ga oouv Yev-so lokf it hhai sih huk gee hemv geef maiv gee,
zi doongv geef geen fa zee sianv fatf seeng gee teeh zung tia zee meef vooi.
Geef leengv baiv fa zee sianv,
hongv gua Seengf-lingv maiv haih liauh teeh zee seeh huv geef liakf neeh gee.
3 Yev-so bif vanh haih hoouh looif,
lai tee teepf veenf siangf-siangf sev seeh huv gee dekf huh geef,
ya yungh haih liauh zingf gif miaf zingf mingv geef titf-titf yoou yoou.
Ya hemv geef-loh gang Siangf-dif gok gav gee teeh.
4 Lai fooif hee,
Yev-so hemv seeh huv gee yoou ningf goonf gee tif hoouh,
geef zuk seeh huv gee bov,
"Meef-loh hheem yoou Ye-luf-sa-leengh heeuv foou bef lai eef sev meef-loh gee,
ziuh tih hauf seengv meef-loh gua gee.
5 Ye-hanf tih oouv namh miaf tuk leei gee,
danf tih gua gi veenf hemv,
meef-loh dif bif Seengf-lingv tuk leei."
Yev-so leengv baiv fa
6 Seeh huv gee hemv Yev-so yoou ningf goonf gee tif hoouh,
geef-loh tooi Yev-so bov,
"Zu haf!
En teeif meef dif biang gok gav Yih-seef-liatf mee hui fukf zuh hhianv haf?"
7 Yev-so tanv geef-loh bov,
"Bef lai ziuf toof-too gee hhianv likf dingf gee tif ganv ha tih yitf hhiv,
meenf tih meef-loh hhoo yi huh lai gee.
8 Danf tih Seengf-lingv dif longf miaf yoou baiv huf meef-loh,
meef-loh ziuh itf dingf deekf doongv neengv likf,
meef-loh ya dif yoou Ye-luf-sa-leengh,
hemv suanf Yiuh-haif,
gangf Sa-mah-lif-yaf,
zi doongv gok fa lunh hooi hauf huk gianf zingf."
9 Gang go neeh gee inv vooi,
geef-loh doongv tif dekf gee tif hoouh,
Yev-so bif zip geen booiv,
lai bah zof hee miaf zip geef booiv vooi,
geef-loh ziuh dekf meenf huh geef vooi.
10 Yev-so doongv tif geen booiv,
geef-loh enf dav itf-it vook fa mee gee tif hoouh,
it ziu lai lengv-hunf voon huf dingv hho yua fiakf-fiakf nyunv yoou ningf geef-loh,
bov,
11 "Lengv-hunf Gia-lif-lif gee haf,
meef-loh veeih gai nyunv yoou nooih vook fa mee nif?
Neeh huf bif zip leengv baiv fa gee Yev-so,
meef-loh dekf huh geef di leeuf geen fa,
doongv nooih geef ya dif di leeuf leengv miaf."
Seeh huv hemv goonf hongf timv hongf i doouh goouf
12 Teeh neeh hhinh hee hoouh looif,
seeh huv gee ziuh lokf tiah Gamh-lamv leengv Ye-luf-sa-leengh,
tiah neeh mee loof-loo ningf Ye-luf-sa-leengh,
lif Ye-luf-sa-leengh daf hhaif lai gung lih mooqf hee teenf hee.
13 Geef-loh it loouh heeuv Ye-luf-sa-leengh mee,
ziuh geen loouf loouh foongf geef-loh zih-zih neeh mee vooi;
geef-loh neeh hoouf tih Bih-deekf,
Ye-hanf,
Yav-gookf,
An-deekf-liatf,
Feei-lif,
To-mah,
Ba-to-loh-maiv,
Mah-haif,
hemv leekf da hhiangh Yav-leekf-feei huf hee Yav-gookf,
gangf Feenf-yuif dangha gee Si-meenv,
ya lai leekf da hhiangh Yav-gookf huf hee Yiuh-daf hemv.
14 Lengv-hunf neeh hoouf hee hemv maih leekf gi huf,
gangf maih lai Yev-so huf hee Mah-lif-a hemv tok Yev-so gee,
geef-loh zung hongf timv hongf i ziangf hangh doouh goouf meenf hengf.
Naf nee zip vih Yiuh-daf mee?
15 Neeh tif hoouh,
daf hhaif lai lengv-hunf bek ngeeih huf hemv goonf zipf huif,
Bih-deekf ziuh nyunv uif,
bov,
16 "Engv tok hauf gee haf!
Seengf-lingv hongv gua Daf-vuif yoou da ging veenv ngif ngianv guan i Yiuh-daf gee teeh,
ziuh tih Yiuh-daf yin lengv-hunf booiv hoof Yev-so gee neeh hhin teeh itf dingf bin tingf titf.
17 Yiuh-daf yuanv miaf tih yoou da hauf-loh gee huf hee,
hemv hauf-loh hongf goonf huk seeh huv,
hongf goonf fokf teeh Siangf-dif gee.
18 "Lengv-hunf neeh huf hee oouv sinf ing Yev-so neeh gee booiv vianv niaf hhootf hee,
giatf guah ziuh voom sang hau yoou ninh,
boqf deet zeh gee zung leeiv uk miaf vooi.
19 Lengv-hunf zih yoou Ye-luf-sa-leengh neeh gee leeuf na duf huh teeh neeh hhinh hee,
ziuh ziuf geef-loh dang dif gee go yam niaf neeh hhootf hee Yaf-geev-daf-mah hee,
if see tih 'Niaf baq hhootf hee'."
20 Bih-deekf gif zukf gang bov,
"Eenv veeih yoou si fian tia bov,
'Hi voongf lanf geef mee leemf vooi,
meenf lai lengv-hunf zih'b;
ya lai hhootf hee tia bov,
'Hi voongf vanh zip vih geef mee.'c
21-22 Too yi,
doouf-loh hheem liakf lengv-hunf huf hee miaf zip vih Yiuh-daf mee,
hemv doouf-loh hongf goonf veeih Zuh Yev-so gee tingf leengv huk gianf zingf.
Lengv-hunf neeh huf hee hheem tih lokf Ye-hanf hooi lengv-hunf tuk leei uif,
zi doongv Zuh Yev-so lif hhooiv doouf-loh bif zip leengv baiv fa gee neeh duanf tif ganv duf hemv doouf-loh hongf goonf hemf moh Zuh Yev-so gee."
23 Geef-loh ziuh gianf ngif liakf voon huf lengv-hunf,
ziuh tih liakf Ye-seef hemv Mav-tiv-yaf,
Ye-seef ziuh tih Ba-sa-ba ya yam Yiuh-sif-du hee.
24-25 Ziuh hemv goonf doouh goouf bov,
"Zu haf!
Leeuf na gee timv teeh meef duf dook,
hhuf meef seengv hauf-loh,
lengv-hunf neeh voon huf meef liakf leeuf na miaf huk seeh huv zip vih Yiuh-daf mee.
Yiuh-daf duf ga gengf vih seeh huv mee vooi,
booiv lengv geef gaiv booiv neeh hhootf vooi."
26 Hemv goonf doouh goouf inv vooi,
ziuh hooi geef-loh voon na yitf simv,
giatf guah yitf heekf Mah-tiv-yaf,
geef ziuh hemv teepf it huf seeh huv hongf goonf.