Hoof Bih-deekf hemv Ye-hanf booiv tooi go
4
1 Bih-deekf hemv Ye-hanf enf hemv bek ting gee gang go gee tif hoouh,
gif see gee hemv hau foou Seengf-dianf gee gangf lengv-hunf Sa-du-gai dangh gee it ziu miaf doongv vooi.
2 Eenv veeih Bih-deekf hemv Ye-hanf maiv bek ting gee,
ya suanf Yev-so gee teeh zingf mingv lai lengv-hunf daiv tingf leengv,
lengv-hunf neeh gee ziuh meenf huh giauh yianf,
3 ziuh hoof geef-loh voon na loouh vooi.
Eenv veeih dang siv veenf duf ga yoop vooi,
ziuh hoop geef-loh doongv haih ngeeih veenf.
4 Danf tih lengv-hunf hingf heekf geef-loh gang go Siangf-dif neeh gee lai haih liauh siang sinf vooi,
danf-danv da hhiangh daf hhaif lai ngoh senv na.
5 Haih ngeeih veenf,
lingh doouh Yiuh-haif gee hemv ziangh lauh gangf Siangf-dif lutf fapf gee lauh see hemv goonf yoou Ye-luf-sa-leengh hhai huif,
6 ya lai daf gif see Yav-nav hemv Gai-yav-fav,
Ye-hanf,
Yaf-lif-san-daf,
gangf gav lanf daf gif see gee lengv-hunf zung yoou ninh.
7 Geef-loh yam Bih-deekf hemv Ye-hanf nyunv zing da vooi,
tooi geef-loh bov,
"Meef-loh hhoouf gai gee hhianv likf,
hhoouf nooiv naf nee mee miaf huk teeh neeh hhinh hee?"
8 Neeh tif hoouh,
Bih-deekf bif Seengf-lingv sung moonh vooi,
ziuh bov geef-loh,
bov,
9 "Bek tingf gee lingh doouh hemv ziangh lauh gee haf!
Veenf nooih meef-loh hoof hauf-loh miaf tooi,
zeekf tih veeih hauf-loh yiav bef gok hoih neeh huf maif vooi gee teeh,
ziuh tih lengv-hunf neeh huf hee di leeuf maif gee,
10 teenf hee,
meef-loh hemv too lai gee Yih-seef-liatf lengv-hunf duf hheem huh,
lengv-hunf nyunv yoou dau na meef-loh neeh huf hee maif vooi,
tih eenv veeih nooiv Nah-saf-leekf gee Yev-so Gi-dukf mee.
Meef-loh dingf geef geen sipf zeef giaf daiv vooi,
danf tih Siangf-dif biang geef tingf leengv vooi.
11 Geef tih
'Meef-loh bef hepf siangf suif gee dinf,
en teeif duf ga bin tingf gook lanf gee haih it mooqf dinf giak vooia.'
12 Seef geef vooi meenf lai naf nee hhoo yi go lai lengv-hunf,
eenv veeih baiv fa dauf matf Siangf-dif meenf sev nooiv naf nee mee biang doouf-loh hhoouf vooi ziuh go lai mingh,
nah biang nooiv Yev-so mee doouf-loh hhoouf ziuh deekf giuf."
Tek Bih-deekf hemv Ye-hanf vooi
13 Lengv-hunf yoou ninh gee huh Bih-deekf hemv Ye-hanf looiv mee teenf nyoo,
ya huh geef-loh tih meenf lai gai gee veenv huaf gee bek ting,
ziuh meenf huh giauh hhiv guaif,
ya nginh uk geef-loh tih hemf moh Yev-so gua gee.
14 Ya dekf huh bif yiav maif gee neeh huf lengv-hunf hemv geef-loh nyunv yoou ningf goonf,
ziuh meenf lai go hau tanv vooi.
15 Ziuh yam geef-loh uk gung huif vooi,
hemv goonf hamf liangf bov,
16 "Doouf-loh dif di leeuf sih lih lengv-hunf neeh voon huf nif?
Eenv veeih geef-loh titf-titf huk seenv zif mee vooi,
too lai zih yoou Ye-luf-sa-leengh gee lengv-hunf zung huh vooi,
doouf-loh ya meenf goom bov meenf tih.
17 Danf tih mangf teeh neeh hhinh hee mef suanf mef look,
doouf-loh hheem gingh goouf geef-loh,
meenf zun geef-loh oouv nooiv Yev-so mee miaf hemv naf nee gang gai gee fooif hemv vooi."
18 Ziuh yam geef-loh voon na miaf,
gingh goouf geef-loh,
meenf zun geef-loh oouv nooiv Yev-so mee miaf gang gai gee ha tih maiv gai gee fooif hemv vooi.
19 Danf tih Bih-deekf hemv Ye-hanf tanv geef-loh bov,
"Hingf go meef-loh gee meenf hingf go Siangf-dif gee,
doi Siangf-dif miaf gang heekf meenf?
Meef-loh toof-too tiang ziu lo.
20 Hauf-loh dekf huh hingf huh gee itf dingf hheem gang uk miaf."
21-22 Lengv-hunf hhoouf seenv zif yiav maif neeh huf hee duf ga lai tee teepf lengf tui vooi.
Bek ting gee zung veeih fatf seeng gee neeh hhinh teeh ngenv Siangf-dif.
Lingh doouh neeh hoouf hee eenv veeih bek ting neeh gee meenf tiang lai ban fap uk dingf soih geef-loh voon na,
ziuh heqf geef-loh fooif hemv tek geef-loh vooi.
Meenv huv gee hongf timv doouh goouf
23 Bih-deekf hemv Ye-hanf bif tek uk miaf hoouh looif,
geef-loh ziuh leengv ningf meenv huv gee vooi,
zung seengv gif see ziangh hemv ziangh lauh neeh hoouf hee gang gee go zee hemv goonf.
24 Hemv goonf hingf vooi,
ziuh hongf timv sauv lookf-look doouh goouf Siangf-dif bov,
"Zu haf!
Meef soouh fa soouh matf,
soouh hai hemv too lai gee itf siatf.
25 Gua na meef hongv gua Seengf-lingv biang leekf nof meef huf hee,
ziuh tih zuh zung hauf-loh huf hee Daf-vuif,
bov,
'Gok-gav hhiv ha gee veeih gai zengv goonf nif?
Too lai gee lengv-hunf veeih gai hangh tiang meenf hhoo neengf gee teeh nif?
26 Tooi ganv gee voongf dooi hemv huk hak gee lianv hoopf uif miaf,
fanh deeif Zu hemv Zu liakf gee voongf.'b
27 Zu haf!
Tih nenh,
Hi-lutf hemv Beenh-tiu Bih-la-to gangf lengv-hunf hhiv ha gok gav gee hemv lengv-hunf Yih-seef-liatf gee titf-titf zung zipf zung yoou heeuv neeh mee,
tiang gooi hamv haih leekf nof meef liakf neeh huf hee Yev-so.
28 Geef-loh huk gee mui hhinh teeh,
duf tih ziuf meef toof-too gee zih if hemv neengv likf miaf giatf dingf dif fatf seeng gee.
29-30 Zu haf!
En teeif hhuf meef dekf geef-loh teenf hee ui hiapf hauf-loh,
hhuf meef biang leekf nof meef gee looiv nyoof-nyoo uif gang go meef gee,
hhuf meef nyof moof uk miaf yiav fingh,
biang hauf-loh hhoouf nooiv leekf nof meef liakf neeh huf hee Yev-so mee lai neengv likf huk seenv zif hemv huk hhiv guaif gee teeh."
31 Geef-loh doouh goouf inv vooi,
lengv zipf huif neeh hhootf hee ziuh ngoouf uif,
geef-loh zung bif Seengf-lingv sung moonh,
looiv nyoof-nyoo suanf go Siangf-dif gee.
Sinf huv gee yungh goouh loouh goonf
32 Too lai gee sinf huv zung hongf timv hongf i,
goouh geef-loh gee zung yungh loouh goonf,
meenf lai naf nee bov goouh geef gee tih toof-too gee.
33 Seeh huv gee hheekf see lai neengv likf,
miaf zingf mingv Zuh Yev-so tingf leengv vooi,
Siangf-dif zung sev fok liauf-liau zee hemv goonf.
34 Yoou da geef-loh neeh hoouf hee meenf lai naf nee hhiat gai gee,
eenv veeih neef lai lanf lai niaf gee zung ing inf-inv booiv vooi,
oouv sinf ing lanf ing niaf neeh gee inf-inv miaf,
35 biang yoou na gok seeh huv gee,
seeh huv gee nah ziuf di na gee si iauf feenv zee di na.