3 Bih-deekf bov,

"Yaf-nav-niv-yaf,

meef veeih gai biang Sav-danf goonv timv meef mee vooi,

biang meef tuat Seengf-lingv,

lookf-lookf teengh sinf ing niaf gee feenh hee uif nif?

4 Veen niaf gee meenf ing yoou meenf tih meef toof-too gee haf?

Gif yianv ing vooi,

sinf gee meenf tih meef huk zu haf?

Timv meef mee di leeuf tiang teenf huk nif?

Meef teenf huk meenf tih tuat lengv-hunf,

tih tuat Siangf-dif vooi!"

5 Yaf-nav-niv-yaf it hingf heekf go neeh gee,

ziuh voom longf hunh hheei vooi.

Too lai lengv-hunf hingf heekf neeh gee zung meenf huh giauh mangf.

6 Lai leekf hauh tengv gi huf ziuh uif miaf,

oouv tiv geef mee duk uif,

hamv uk booiv bok vooi.

7 Daf hhaif gua tamv mooqf zungv hau vooi,

maih geef huf hee loouh miaf,

enf meenf huh fatf seeng gee teeh yoou.

8 Bih-deekf tooi geef bov,

"Meef bov,

sinf meef-loh ing veen niaf neeh gee inf-inv zung yoou nooih vooi haf?"

Geef tanv bov,

"Heqh!

Inf-inv zung yoou nooih vooi."

9 Bih-deekf bov,

"Meef-loh voon na veeih gai soopf hhopf loouh tee Zu gee Lingv nif?

Noh,

Lengv-hunf hamv bef meef huf hee booiv bok neeh gee duf ga leengv doongv bak deenh vooi,

geef-loh ya dif hamv meef uk booiv."

10 Maih geef huf hee mah siangf ziuh voom yoou na gok Bih-deekf hunh hheei vooi.

Leekf hauh tengv neeh gee loouh miaf,

huh geef duf ga daiv vooi,

ziuh hamv geef uk booiv,

bok yoou ningf bef geef huf hee.

11 Suanf giauf huif hemv too lai hingf heekf teeh neeh gee gee lengv-hunf zung meenf huh giauh mangf.

12 Zu hongv gua moof seeh huv gee yoou da bek ting gee huk haih liauh seenv zif hemv meenf fingf tiangf gee teeh.

Too lai gee sinf huv zung hongf timv hongf i yoou Seengf-dianf gee Sov-lov-meenv tauv langh neeh hhootf hee zipf huif.

13 Hhiv ha gee lengv-hunf meenf lai huf huf goom loo ningf geef-loh,

danf tih bek ting gee zung meenf huh giauh zun zungf geef-loh.

14 Lengv-hunf siang sinf Zu neeh gee mef miaf mef liauh,

da hhiangh maih leekf zung lai.

15 Simf zif lai lengv-hunf hamv neef fingh gee geen da gaiv vooi,

biang geef-loh lap yoou baiv liuh baiv tangf gee,

haih meengh Bih-deekf gua sunv gee tif hoouh,

nguiv geef mee tui liauh dif zaqf heekf lengv-hunf feenh hee.

16 Ya lai lengv-hunf dunf hee yin neef fingh gee hemv bif yif hangv geen huf gee lengv-hunf lokf leekf heeuv loof-loo ningf Ye-luf-sa-leengh neeh gee miaf,

giatf guah geef-loh suanv buf zung maif vooi.

17 Daf gif see hemv too lai lengv-hunf hemv geef goop dangh hho mooqf hee neeh gee,

ziuh tih lengv-hunf Sa-du-gai dangh gee,

geef-loh dekf huh teeh neeh gee ziuh timv seeu zookf seeh huv gee loouh bih vooi,

18 ziuh hoof geef-loh hoop loouh da gamv vooi.

19 Danf tih da hheenf lai Zu gee hian seeh huf hee hheeif deenh gamv gee vooi,

yin geef-loh uk miaf,

20 bov,

"Meef-loh booiv,

nyunv yoou da bang Seengf-dianf,

oouv too lai guan i neeh mee sin seeng mingf gee teeh seengv zee bek ting gee hingf."

21 Seeh huv gee hingf heekf go neeh gee vooi,

fok fuh gee tif hoouh seeh huv ziuh loouh da bang Seengf-dianf vooi maiv bek ting gee.

Neeh tif hoouh daf gif see hemv goop dangh hho geef neeh hoouf hee,

yam gung huif gee lengv-hunf hemv ziangh lauh Yih-seef-liatf gee inf-inv miaf vooi,

ziuh faif lengv-hunf booiv da gamv vooi leeh seeh huv gee uk miaf tooi go.

22 Danf tih lengv-hunf neeh gee booiv doongv da gamv vooi,

meenf huh seeh huv gee vooi ziuh leengv miaf boouf goouf bov,

23 "Hauf-loh dekf huh deenh gamv gee langv lootf-lootf,

ya lai leekf bingv gee nyunv foou yoou bak deenh,

danf tih hheeif deenh vooi,

da ninh meenf huh lengv-hunf huf huf."

24 Hau foou Seengf-dianf gee hemv gif see ziangh gee hingf heekf go neeh gee vooi,

ziuh hhiv guaif,

meenf huh teeh neeh gee doongv nooih dif di leeuf.

25 Neeh tif hoouh,

lai lengv-hunf huf hee deuf miaf boouf goouf bov,

"Noh,

lengv-hunf meef-loh hoop da gamv neeh gee,

en teeif nyunv yoou da bang Seengf-dianf maiv lengv-hunf nenh."

26 Hau foou Seengf-dianf gee hemv leekf bingv gee ziuh booiv yin seeh huv gee miaf.

Geef-loh meenf lai longf gok longf moof,

eenv veeih mangf bek ting dif oouv dinf zakf geef-loh.

27 Geef-loh yin seeh huv gee miaf doongv gung huif vooi,

ziuh yam seeh huv gee nyunv yoou na gung huif.

Daf gif see tooi geef-loh bov,

28 "Hauf-loh meenf tih ngiamf-ngiamf gingh goouf meef-loh gua vooi haf?

Meenf zun oouv nooiv neeh mee booiv maiv lengv-hunf fooif hemv vooi.

Danf tih en teeif meef-loh daf oouv hoouh lih meef-loh gee suanf hoou Ye-luf-sa-leengh vooi,

tiang oiv soih ga lengv-hunf neeh huf gee zee hauf-loh."

29 Bih-deekf hemv hhiv ha gee seeh huv tanv bov,

"Hingf go Siangf-dif,

meenf hingf go lengv-hunf tih ing gai gee.

30 Meef-loh ling daiv yoou baiv sipf zeef giaf gee neeh huf Yev-so,

hauf-loh zuh zung gee Siangf-dif duf ga biang geef tingf leengv vooi.

31 Siangf-dif seeng geef hangv uif,

biang geef yoou ningf toof-too gee moof maif,

biang geef huk voongf huk Giuf-zuh,

biang lengv-hunf Yih-seef-liatf gee lai gi huif huiv gaih,

biang soih geef-loh gee min booiv.

32 Hauf-loh ziuh tih teeh neeh gee gee gianf zingf yinv,

Siangf-dif sev zee lengv-hunf hingf go geef neeh gee gee Seengf-lingv ya hooi teeh neeh gee huk gianf zingf."

33 Gung huif gee lengv-hunf hingf heekf go neeh gee vooi,

ziuh meenf huh giauh yianf,

dif tiang ga geef-loh.

34 Danf tih lai lengv-hunf Fatf-lif-saif dangh huf hee,

yam Zia-mah-liatf hee.

Geef tih Siangf-dif lutf fapf gee lauh see huf hee,

leeuf na duf zun gingf geef.

Geef yoou da gung huif nyunv uif,

yam vanh ziamf siv dai seeh huv gee uk ninh vooi,

35 ziuh bov hemv goonf bov,

"Lengv-hunf Yih-seef-liatf gee haf!

Meef-loh sih lih lengv-hunf neeh hoouf hee hheem nook timv.

36 Gua na Tiu-daf zoouf fanh gee tif hoouh,

daf hhaif lai lengv-hunf tee bek huf hemf moh geef,

geef bov geef heen,

seeif looif ga geef booiv vooi,

lengv-hunf hemf moh geef neeh gee ya tan inv vooi,

teeh neeh hhinh hee ya fah vooi.

37 Hoouh looif saf huf hheeuh gee tif hoouh,

ya lai lengv-hunf Gia-lif-lif huf hee,

yam Yiuh-daf hee,

geef uif miaf zoouf fanh,

ziuv teef bek ting gee hemf moh geef;

seeif looif ya ga geef daiv vooi,

too lai lengv-hunf hemf moh geef neeh gee ya tan inv vooi.

38 En teeif hauf hhin meef-loh,

meenf ngah guanh lengv-hunf neeh hoouf hee,

suf saih geef-loh zaix!

Eenv veeih geef-loh tiang gee huk gee zeekf tih lokf lengv-hunf miaf gee,

ziuh itf dingf meenf huk lai tingf;

39 zeekf tih lokf Siangf-dif miaf gee,

meef-loh ziuh meenf lanf lai on,

mangf meef-loh teenf huk tih famh Siangf-dif vooi."

40 Gung huif gee lengv-hunf hingf go geef gee vooi,

ziuh yam seeh huv gee loouh miaf,

git geef-loh don hee,

yuh gingh goouf geef-loh meenf zun oouv nooiv Yev-so mee miaf hemv vanh gang gai gee vooi,

ziuh tek geef-loh vooi.

41 Seeh huv gee eengf-eengv teenf hee lokf gung huif uk miaf,

eenv veeih geef-loh tuif tih fui lai veeih nooiv Yev-so mee bif vanh an bif vanh git.

42 Geef-loh veenf-veenf yoou Seengf-dianf hemv yoou lanf,

ziangf hangh maiv lengv-hunf,

suanf Yev-so tih Gi-dukf gee fukf im.