Lokf neeh veenf uif,

vanh haih Ye-luf-sa-leengh giauf huif gee lengv-hunf meenf huh giauh nanf vif.

Seef seeh huv gee vooi,

meenv huv gee zung deuf booiv Yiuh-haif hemv Sa-mah-lif-yaf vooi.

2 Lai gingf vuif Siangf-dif gee lengv-hunf oouv tiv Si-tiv-fanh mee booiv bok vooi,

dookf hungh geef zung ngai oo-oo teenf hee.

3 Danf tih Soouh-lov haih giauf huif gee lengv-hunf meenf huh giauh ook,

di lanf di lanf booiv hoof geef-loh,

meenf guan tih maih leekf da hhiangh zung leeh booiv hoop loouh gamv vooi.

4 Meenv huv deuf tan neeh gee,

deuf doongv leeuf ziuh suanf fukf im doongv leeuf.

5 Feei-lif ya teenf hee,

geef doongv Sa-mah-lif-yaf seengh gee daf singv sif mee vooi,

ziuh yoou ninh suanf gang Gi-dukf gee teeh.

6 Lengv-hunf gee zung zuf if ya hongf timv hongf i loouh hingf Feei-lif gang go,

it minh hingf geef gang go,

it minh dekf geef huk seenv zif.

7 Neeh tif hoouh,

lai haih liauh lengv-hunf bif yif hangv geen huf vooi,

yif hangv gee zung vanf deuf lokf lengv-hunf neeh gee uk miaf;

ya lai haih liauh han huanf gee,

gok hoih gee zung maif vooi.

8 Eenv veeih teeh neeh gee suanf heeuv gee lengv-hunf zung eengv.

9 Lai lengv-hunf huf hee yam Si-meenv hee,

yoou heeuv neeh mee huk yif hangv yif ho,

geef ya toof-too bov geef zuif heen,

tee Sa-mah-lif-yaf gee lengv-hunf zung hhiv guaif.

10 Suanf heeuv gee lengv-hunf lokf nook doongv nyoo zung hingf sav geef,

ya bov,

"Lengv-hunf neeh huf hee lai Siangf-dif gee neengv likf,

tih daf neengv zeh huf hee."

11 Geef-loh zung hingf sav geef,

tih eenv veeih geef duf ga huk yif hangv yif ho haih foong vooi,

tee geef-loh hhiv guaif.

12 Zi doongv geef-loh hingf heekf Feei-lif suanf Siangf-dif gok gav gee fukf im hemv nooiv Yev-so Gi-dukf mee,

geef-loh ziuh siang sinf vooi,

meenf guan da hhiangh maih leekf zung tuk leei vooi.

13 Linf Si-meenv toof-too ya siang sinf vooi.

Geef tuk leei hoouh looif siangf-siangf hemv Feei-lif yoou ningf goonf,

dekf huh Feei-lif huk seenv zif hemv huk meenf huh giauh meenf fingf tiangf gee teeh,

ziuh hheekf see hhiv guaif.

14 Yoou Ye-luf-sa-leengh gee seeh huv hingf huh Sa-mah-lif-yaf gee lengv-hunf siang sinf fukf im vooi,

ziuh faif Bih-deekf hemv Ye-hanf booiv ningf geef-loh.

15 Geef-loh voon na doongv ninh vooi,

ziuh hooi yoou ninh gee meenv huv doouh goonf,

hau biang geef-loh deekf doongv Seengf-lingv.

16 Eenv veeih Seengf-lingv enf meenf giangf yoou baiv huf geef-loh naf nee yoou,

geef-loh nah oouv nooiv Zuh Yev-so mee tuk leei toof-too vooi.

17 Geef-loh voon na zav moof geen baiv hau meenv huv gee,

meenv huv gee ziuh deekf doongv Seengf-lingv vooi.

18 Si-meenv dekf huh seeh huv gee zav moof ziuh lai Seengf-lingv longf miaf,

geef ziuh oouv sinf sev geef-loh voon na,

19 bov,

"Ya sev neengv likf neeh gee zee hauf teef,

biang hauf zav moof geen naf nee,

naf nee ziuh lai Seengf-lingv."

20 Danf tih Bih-deekf bov geef bov,

"Meef hemv sinf meef gee hongf goonf booiv daiv lo!

Eenv veeih meef yih vuiv Siangf-dif sev gee Seengf-lingv tih hhoo yi oouv sinf miaf vianv gee.

21 Teeh neeh hhinh hee meef zuatf deeif meenf lai feenh,

eenv veeih meef yoou dau na Siangf-dif timv mee meenf maif.

22 Too yi,

meef hheem veeih soih meef gee huiv gaih hhuf Zu,

i sook Zu dif min meef da timv gee see siangh booiv.

23 Hauf dekf uk meef eenv veeih timv seeu hauf-loh,

timv meef mee meenf huh giauh ngaif tuh,

bif soih gee gatf on vooi."

24 Si-meenv bov,

"Hhuf meef-loh hooi hauf hhuf Zu,

biang hauf meenf ngah am heekf teeh meef-loh gang neeh gee hhinf hhinh."

25 Bih-deekf hemv Ye-hanf hooi Yev-so gianf zingf hemv suanf gang Zu gee fukf im hoouh looif,

ziuh leengv Ye-luf-sa-leengh vooi.

Geef-loh da sunv gingv gua Sa-mah-lif-yaf gee haih liauh mooqf voo,

ya suanf fukf im sev yoou ninh gee lengv-hunf.

26 Lai veenf hee,

lai Zu gee hian seeh huf hee yam Feei-lif bov,

"Uif miaf,

meef lokf noomf booiv,

lokf Ye-luf-sa-leengh longf Zia-sa neeh hiuf sunv booiv."

Sunv neeh hiuf hee yoou da loouh.

27 Feei-lif ziuh uif miaf booiv vooi.

Yoou da sunv am heekf hak nyoo huf hee,

tih lengv-hunf Ai-saif-eev-bih-yaf gee,

geef hooi Ai-saif-eev-bih-yaf gee nih voongv Gan-daf-zi^a guanh sinf ngoonf,

hhinf geef mee meenf huh giauh nyoo.

Geef geen Ye-luf-sa-leengh huk lih baif miaf.

28 Geef leengv booiv gee tif hoouh,

ngov yoou baiv siav maqf fuh hee,

hookf sek Yih-saif-yav gee,

Yih-saif-yav tih sian zi huf hee.

29 Seengf-lingv yam Feei-lif bov,

"Meef booiv ningf siav neeh fuh hee vooi,

di moh siav fuh hee booiv."

30 Feei-lif ziuh deuf booiv ningf siav neeh fuh hee vooi,

hingf huh hak neeh huf hee hookf sek Yih-saif-yav gee,

ziuh tooi geef bov,

"Meef hookf gee meef mingf fekf meenf?"

31 Geef tanv bov,

"Meenf lai lengv-hunf maiv hauf,

hauf di leeuf took nif?"

Geef ziuh sing Feei-lif geen siav vooi,

hemv geef ngov yoou ningf goonf.

32 Hak neeh huf hee hookf gee neeh duanf ging veenv tih bov,

Naf nee hhoo yi gang lai uk heeuf daif geef gee nif?

Eenv veeih mingh geef hiuf hee lokf dauf matf bif geep booiv vooi."^b

34 Hak neeh huf hee tooi Feei-lif bov,

"Sian zi yoou ging veenv neeh duanf gang gee tih naf nee nif?

Tih gang geef toof-too ha tih gang gakf na nif?"

35 Feei-lif ziuh lokf ging veenv neeh duanf gang uif,

hemv geef gang guan i Yev-so gee fukf im.

36 Geef-loh booiv booiv,

am heekf lengv hhootf hee lai namh,

hak neeh huf bov,

"Noh,

yoou nooih lai namh noh,

lai gai gee lanf lai hauf tuk leei nif?"

37 Feei-lif bov,

"Meef zeekf zinv timv siang sinf ziuh hhoo yi."

Geef tanv bov,

"Hauf siang sinf Yev-so Gi-dukf tih Leekf-da-hhiangh Siangf-dif huf hee."^c

38 Hak neeh huf hee ziuh yam siav hengf on vooi,

geef-loh voon na ziuh loouh da namh vooi,

Feei-lif ziuh hemv geef tuk leei.

39 Geef-loh lokf da namh geen miaf gee tif hoouh,

Zu gee Lingv diuh Feei-lif booiv vooi.

Hak neeh huf hee ya meenf huh geef fooif hemv vooi,

ziuh eengf-eengv leengv booiv vooi.

40 Seeif looif lai lengv-hunf yoou Yav-sov-du heeuv am heekf Feei-lif.

Feei-lif booiv heeuv neeh gee hoou vooi,

doongv leeuf duf suanf fukf im,

zi doongv Gai-sav-lif-yav heeuv.