4 Gee-inh-liuv mangf nyan vooi,

vook geef itf-it teenf hee,

bov,

"Zu haf!

Huk gai?"

Hian seeh huf hee bov,

"Meef doouh goouf hemv boongv tooh bek ting gee Siangf-dif duf ga oov da timv vooi.

5 En teeif meef hheem faif lengv-hunf booiv heeuv Ye-faf mee vooi,

sing Si-meenv miaf,

geef ya yam Bih-deekf hee.

6 Geef zih yoou ningf hai yoou lanf bef huk nangv huf hee nenh,

bef neeh huf hee ya yam Si-meenv hee."

7 Hian seeh hemv geef gang go neeh huf hee leengv booiv hoouh looif,

Gee-nih-liuv ziuh yam leekf nof voon huf hemv gingh vuif siangf-siangf di moh geef neeh huf hee miaf,

gingh vuif neeh huf hee ya gingf vuif Siangf-dif,

8 Gee-nih-liuv seengv neeh itf siatf gee teeh zee geef-loh vooi,

ziuh faif geef-loh booiv Ye-faf.

9 Haih ngeeih veenf veenf da,

geef-loh booiv dif doongv Ye-faf vooi,

neeh tif hoouh Bih-deekf geen deng lanf vooi doouh goouf.

10 Geef boqf yiak vooi,

tiang goonv goouh.

Gav lanf neeh mee hungf fiah da moof nenh,

Bih-deekf dekf huh siau zeef yianv gee gingh siangf mee.

11 Geef dekf huh fa mee hheeif vooi,

lai goouh hhootf hee zing hoopf fef hee teenf hee,

gatf ti mooqf gook suih dauf matf vooi.

12 Da ninh deengf dauf matf gookf zuangv ti mooqf gok gee dungf veetf hemv mingf leeqf-leeq gee gangf nokf vinv baiv fa gee.

13 Yuh lai sauv mee bov,

"Bih-deekf haf uif miaf,

ga goouh neeh gee miaf goonv."

14 Danf tih Bih-deekf bov,

"Zu haf,

zuatf deeif meenf noov lai!

Too lai goouh zeq goouh meenf bang gee,

hauf lokf hau meenf goonv gua."

15 Sauv mee yuh bov geef fooif hemv,

"Siangf-dif huk bang gua gee,

meef meenf hau bov zeq."

16 Teenf hee linf-linf tamv fooif,

goouh neeh gee ziuh mah siangf suv leengv baiv fa vooi.

17 Bih-deekf tiang booiv tiang leengv,

meenf huh gingh siangf neeh mee tih gai gee if see,

lengv-hunf Gee-nih-liuv faif miaf neeh gee,

duf ga miaf doongv bak deenh Si-meenv bef huk nangv neeh huf hee vooi.

18 Geef-loh nyunv yoou bak deenh sauv lookf-look tooi bov,

"Si-meenv yam tih Bih-deekf neeh huf hee tih meenf tih zih yoou nooih?"

19 Bih-deekf enf tiang neeh mee siau zeef yianv gee gingh siangf yoou,

Seengf-lingv ziuh seengv geef bov,

"Noh,

lai lengv-hunf tamv huf miaf div meef nenh.

20 Uif miaf,

longf booiv lo,

di moh geef-loh booiv,

meenf ngah huaiv ngiv,

eenv veeih geef-loh tih hauf faif miaf gee."

21 Bih-deekf ziuh longf miaf hemv geef-loh gang bov,

"Hauf ziuh tih Bih-deekf meef-loh div div gee neeh huf hee,

meef-loh miaf div hauf huk gai?"

22 Geef-loh tanv bov,

"Baiv fu ziangh Gee-nih-liuv faif hauf-loh miaf,

geef tih ngif yinv huf hee,

ya gingf vuif Siangf-dif,

suanf Yiuh-haif gee lengv-hunf duf zun gingf geef.

Lai hian seeh huf hee seengv geef,

yam geef sing meef booiv lanf geef,

dif hingf meef gang go."

23 Bih-deekf ziuh yam geef-loh loouh lanf vooi luf geef-loh gua goomh.

Haih ngeeih veenf Bih-deekf ziuh di moh geef-loh booiv,

ya lai engv tok Ye-faf gee gi huf hemv di moh geef booiv.

24 Haih tamv veenf geef-loh doongv Gai-sav-lif-yav gee tif hoouh,

Gee-nih-liuv duf ga sing sinf sik feengf yu geef gee miaf vooi,

yoou lanf foou geef-loh nenh.

25 Bih-deekf giangf loouh booiv,

Gee-nih-liuv ziuh geen miaf doong geef,

hhuih hhupf yoou na gok geef bai geef.

26 Danf tih Bih-deekf diuf geef uif,

bov,

"Uif miaf,

hauf ya tih lengv-hunf."

27 Bih-deekf hemv geef it minh gang go it minh loouh lanf,

dekf huh lengv-hunf dunf hee duf ga zipf zung yoou ninh vooi,

28 ziuh bov geef-loh bov,

"Meef-loh ya huh,

Yiuh-haif lengv-hunf gee hemv hhiv ha minv zukf gee lengv-hunf gua goonf beenh laiv tih meenf hoopf guiv leei gee.

Danf tih Siangf-dif duf ga seengv hauf vooi,

meenf guan tih naf nee duf meenf hau dekf vanh tih zeq gee ha tih meenf bang gee.

29 Too yi meef-loh booiv sing hauf,

hauf meenf lai ziqf fanh deeif ziuh miaf vooi.

En teeif hauf tooi meef-loh,

meef-loh yam hauf miaf lai gai gee teeh nif?"

30 Gee-nih-liuv bov,

"Ti veenf sianv yoou neeh mooqf tif ganv,

ziuh tih veenf zoouf tamv dem zungv,

hauf zing fingf tif teenf hee yoou lanf doouh goouf,

it ziu lai lengv-hunf huf hee dingv hho yua gee bangv fiakf-fiakf teenf hee,

nyunv yoou dau na hauf,

31 bov,

'Gee-nih-liuv,

meef doouh goouf Siangf-dif duf ga hingf huh vooi,

meef boongv tooh bek ting gee Siangf-dif ya oov da timv vooi.

32 Meef hheem faif lengv-hunf booiv Ye-faf vooi sing Si-meenv miaf,

geef ya yam Bih-deekf hee.

Geef zih yoou ningf hai,

yoou lanf bef huk nangv huf hee,

bef neeh huf hee ya yam Si-meenv hee.'

33 Hauf ziuh mah siangf faif lengv-hunf booiv sing meef,

meef miaf vooi hauf-loh meenf huh giauh eengv.

En teeif hauf-loh zung yoou dau na Siangf-dif,

dif hingf Zu yam meef zuk hauf-loh itf siatf gee Go."

34 Bih-deekf ziuh bov,

"En teeif hauf titf-titf huh Siangf-dif doi naf nee duf tih gung fingv gee.

35 Yuanv miaf,

lengv-hunf neef gingf vuif Siangf-dif,

ya hengf teeh gung ngif neeh gee,

meenf guan geef tih leeuf mooqf minv zukf gee,

Siangf-dif duf ziapf siuf geef.

36 Siangf-dif hongv gua vanh veetf gee Zu,

ziuh tih Yev-so Gi-dukf suanf fingf anv gee fukf im,

oouv siau sikf neeh mee suanf sev lengv-hunf Yih-seef-liatf gee.

37 Meef-loh ya huh,

lokf Ye-hanf suanf tuk leei hoouh looif,

fukf im neeh mee lokf Gia-lif-lif seengh suanf uif,

suanf lengv Yiuh-haif gee hoou vooi.

38 Meef-loh ya huh Nah-saf-leekf gee Yev-so,

Siangf-dif di leeuf oouv Seengf-lingv hemv neengv likf diaqf geen baiv huf geef.

Geef ziuh booiv haih liauh lengv,

huk haih liauh maif teeh,

yiav too lai bif yif hangv hhungf zif gee lengv-hunf maif vooi,

eenv veeih Siangf-dif hemv geef yoou ningf goonf.

39 Yev-so yoou Yiuh-haif gee Ye-luf-sa-leengh hemv Yiuh-haif gee hhiv ha lengv foongv huk gee teeh,

hauf-loh hhoo yi zingf mingv neeh itf siatf gee teeh tih titf gee.

Geef-loh daf ling geef geen baiv mokf ga daiv vooi.

40 Danf tih haih tamv veenf,

Siangf-dif biang geef tingf leengv vooi,

ya sev lengv-hunf dekf huh geef.

41 Meenf tih sev too lai gee lengv-hunf dekf huh geef,

tih sev Siangf-dif liakf miaf hooi geef huk zingf mingv neeh gee dekf huh geef,

ziuh tih geef tingf leengv hoouh looif,

hauf-loh hemv geef hongf goonf goonv gee neeh hoouf hee.

42 Geef zuk hauf-loh hheem doi too lai gee lengv-hunf suan buf,

geef ziuh tih Siangf-dif liakf miaf simh fuanf lengv-hunf yoou lengv-hunf daiv gee Zu.

43 Too lai gee sian zi ya hooi geef huk gianf zingf,

bov,

'Too lai siang sinf geef gee lengv-hunf,

itf dingf hongv gua nooiv geef mee min soih gee booiv.'"

44 Bih-deekf enf gang go yoou,

Seengf-lingv ziuh longf miaf yoou baiv huf too lai lengv-hunf hingf geef gang go neeh gee vooi.

45 Neef zuh ziang hheem ngoof leei gee sinf huv hemv Bih-deekf hongf goonf miaf,

dekf huh Seengf-lingv sev gee neengv likf ya giuv yoou baiv huf lengv-hunf hhiv ha minv zukf gee,

geef-loh zung hhiv guaif.

46 Eenv veeih geef-loh hingf heekf lengv-hunf neeh gee gang gookf zuangv go,

ya ngenv Siangf-dif.

47 Bih-deekf ziuh bov,

"Lengv-hunf neeh gee gif yianv deekf doongv Seengf-lingv vooi,

hemv doouf-loh hongf goonf,

naf nee dif lanf lai on meenf zun oouv namh hooi geef-loh tuk leei nif?"

48 Geef ziuh yam oouv nooiv Yev-so Gi-dukf mee hooi geef-loh tuk leei.

Seeif looif,

geef-loh ya luf Bih-deekf zih gi veenf hemv.