4 Bih-deekf ziuh seengv teeh neeh gee it ngoh it teepf zee geef-loh,

geef bov,

5 "Hauf yoou heeuv Ye-faf doouh goouf gee tif hoouh,

see siang mee deuf booiv gakf hhootf hee,

dekf huh siau zeef yianv gee gingh siangf mee,

lai goouh gee zing hoopf fef hee teenf hee,

gatf ti mooqf gook suih lokf baiv fa longf miaf,

zi doongv dau na hauf.

6 Hauf zuf if dekf gee tif hoouh,

huh da ninh deengf gookf zuangv ti mooqf gok gee dungf veetf hemv da sangv gee dungf veetf gangf mingf leeqf-leeq gee,

gangf nokf vinv baiv fa gee.

7 Hauf ya hingf huh lai sauv mee bov hauf,

'Bih-deekf haf uif miaf,

ga goouh neeh gee miaf goonv.'

8 "Hauf bov,

'Zu haf,

zuatf deeif meenf noov lai!

Too lai goouh zeq ha tih goouh meenf bang gee,

hauf lokf hau meenf goonv gua.'

9 "Haih ngeeih fooif,

lai sauv mee lokf baiv fa tanv,

'Siangf-dif huk bang gua gee,

meef meenf hau bov zeq.'

10 Teenf hee linf-linf tamv fooif,

too lai gee goouh ziuh zung suv leengv baiv fa vooi.

11 "Ngamf-ngamf neeh tif hoouh,

lai lengv-hunf tamv huf nyunv yoou bak deenh lanf hauf zih zih neeh mee,

geef-loh tih vanh faif lokf Gai-sav-lif-yav miaf div hauf gee.

12 Seengf-lingv yam hauf di moh geef-loh booiv,

meenf ngah huaiv ngiv geef-loh.

Ya lai engv tok neeh sok huf di moh hauf booiv,

hauf-loh hemv goonf loouh lanf lengv-hunf neeh huf hee vooi.

13 Lengv-hunf neeh huf hee ziuh seengv hauf-loh,

geef tih di leeuf dekf huh hian seeh huf hee nyunv yoou da lanf geef,

hemv geef gang bov,

'Meef hheem faif lengv-hunf booiv Ye-faf sing Si-meenv miaf,

geef ya yam Bih-deekf hee.

14 Geef lai go dif seengv meef,

eenv veeih go neeh gee meef hemv meef suanf lanf zung hhoo yi deekf giuf.'

15 "Hauf giangf gang go,

Seengf-lingv ziuh longf miaf geen baiv huf geef-loh vooi,

zing dang soo giangf yoou baiv huf doouf-loh teenf hee.

16 Hauf ziuh tiang uif Zu gang gua gee go,

bov,

'Ye-hanf oouv namh miaf tuk leei,

danf tih Siangf-dif dif oouv Seengf-lingv miaf hooi meef-loh tuk leei.'

17 Gif yianv Siangf-dif ya sev Seengf-lingv zee geef-loh,

zing gua na doouf-loh siang sinf Zuh Yev-so Gi-dukf gee tif hoouh sev zee doouf-loh teenf hee,

hauf tih naf nee,

dif lanf lai Siangf-dif haf?"

18 Hemv goonf hingf heekf go neeh gee,

ziuh meenf gang go vooi,

zung ngenv Siangf-dif bov,

"Ziuf teenf hee dekf,

Siangf-dif ya sev gi huif zee lengv-hunf hhiv ha minv zukf gee,

biang geef-loh huiv gaih deekf doongv seeng mingf."

19 Meenv huv eenv veeih teeh Si-tiv-fanh neeh hhinh hee bif haih deuf tan neeh gee,

deuf zi doongv Feei-niv-gi hemv Saif-fuh-luf-si gangf An-tiv-a.

Geef-loh danf-danv suanf fukf im sev zih yoou ninh gee Yiuh-haif lengv-hunf.

20 Danf tih hhiv zung lai lengv-hunf Saif-fuh-luf-si gee hemv lengv-hunf Guh-lif-naif gee,

geef-loh doongv An-tiv-a vooi,

ya suanf Zuh Yev-so gee fukf im sev lengv-hunf Si-laf gee^a.

21 Zu gee neengv likf hemv geef-loh yoou ningf goonf,

ziuh lai haih liauh lengv-hunf siang sinf Zu,

zuanh leengv ningf Zu vooi.

22 Ye-luf-sa-leengh giauf huif gee lengv-hunf hingf huh siau sikf neeh gee vooi,

geef-loh ziuh faif Ba-nav-ba booiv An-tiv-a.

23 Geef doongv ninh vooi,

dekf huh Siangf-dif boongv tooh sinf huv gee,

ziuh meenf huh giauh eengv,

ya guh lif geef-loh hheem it timv it i ih hhoouf Zu.

24 Ba-nav-ba tih lengv-hunf maif huf hee,

geef bif Seengf-lingv sung moonh,

hheekf see lai sinf sim.

Ziuh lai haih liauh lengv-hunf siang sinf Zu vooi.

25 Geef yuh booiv heeuv Daf-suf mee vooi div Soouh-lov.

26 Div heekf vooi,

ziuh yin geef booiv An-tiv-a.

Geef-loh yoou ninh veeif hee zukf zuk,

hemv sinf huv gee yoou giauf huif zipf huif,

ya maiv haih liauh lengv-hunf.

Yam meenv huv tih Gi-dukf huv tih lokf An-tiv-a yam uif gee.

27 Neeh tif hoouh,

lai sian zi gi huf lokf Ye-luf-sa-leengh longf doongv An-tiv-a.

28 Hhiv zung lai huf hee yam Yaf-gia-buf hee,

Seengf-lingv seengv geef vooi,

geef ziuh nyunv uif bov suanv sif gaif gee gok gav dif lai daiv yiak meenf huh giauh nyoo.

Doongv Geev-lauh-tiu huk Loh-mah voongf dooi gee tif hoouh,

ziuh titf-titf lai teeh neeh gee vooi.

29 Meenv huv gee ziuh giatf dingf anf toof-too gee neengv likf gian sinf,

hong sev engv tok zih yoou Yiuh-haif neeh gee.

30 Geef-loh ziuh teenf huk vooi,

dooh Ba-nav-ba hemv Soouh-lov hong sinf neeh gee booiv ningf Ye-luf-sa-leengh gee ziangh lauh.