4 Seengf-lingv faif Ba-nav-ba hemv Soouh-lov uk booiv,

geef-loh ziuh longf doongv Si-liuv-gi vooi,

lokf ninh ngov luaf booiv Saif-fu-luf-si doouh.

5 Geef-loh doongv Sa-la-miv vooi,

ziuh loouh lengv-hunf Yiuh-haif gee gookf mooqf huif hangv vooi suanf gang Siangf-dif gee fukf im.

Ye-hanf di moh geef-loh huk ngih moof.

6 Geef-loh ngeeu doouh neeh mee hoouf hoou zi doongv Faf-fov,

am heekf lengv-hunf Yiuh-haif huf hee yam Ba-yev-so hee,

geef tih huk daf hoouh gee,

tih gev sian zi huf hee.

7 Geef hemv seengh ziangh Sif-hhiuv-boouh-lov siangf-siangf yoou ningf goonf.

Sif-hhiuv-boouh-lov tih lengv-hunf nyaif huf hee,

geef sing Ba-nav-ba hemv Soouh-lov miaf,

dif hingf geef-loh gang Siangf-dif gee fukf im.

8 Danf tih huk yif hangv yif ho gee Yih-lih-mah^a gukf lingf fanh deeif seeh huv gee,

yam seengh ziangh meenf ngah siang sinf Zu.

9 Soouh-lov ya yam Boouh-lov hee,

geef bif Seengf-lingv sung moonh,

ziuh vook Ba-yev-so itf it teenf hee,

10 bov,

"Leekf yif hangv meef neeh huf hee,

meef timv seeu timv goouv seeu inv seeu bang vooi,

itf siatf gung ngif gee teeh meef zung fanh deeif,

meef dif huk Siangf-dif gee zinv li bev doongv gi tif nif?

11 En teeif Zu dif fatf meef,

biang meef dav lak se meh,

ziamf siv meenf dekf lai huh."

Dav geef deei hee mah siangf ziuh mok vooi,

yoop vooi,

geef ziuh leeuf ziqf duf gamf hoouh,

hhuf lengv-hunf diuf geef yin sunv geef.

12 Seengh ziangh dekf huh teeh neeh hhinh hee ziuh sinf Zu vooi.

Geef hingf heekf Zu gee giauf doouh gamh doongv hhiv guaif ya eengv.

13 Boouh-lov hemv lengv-hunf hemv geef yoou ningf goonf neeh gee lokf Faf-fov ngov luaf doongv Foongv-feei-lif-yaf gee Bev-zia,

Ye-hanf ziuh lif hhooiv geef-loh,

leengv Ye-luf-sa-leengh vooi.

14 Geef-loh lokf Bev-zia gif zukf booiv,

doongv Bih-si-tih gee An-tiv-a vooi.

Doongv An-sikf-veenf^b geef-loh ziuh loouh huif hangv vooi ngov.

15 Lai lengv-hunf huf hee hookf Mov-si gee lutf fapf sek hemv sek sian zi tia gee duanf hee inv vooi,

guanh huif hangv gee ziuh yam lengv-hunf booiv yam geef-loh,

bov,

"Engv tok hauf gee haf,

meef-loh voon na zeekf lai go gai gee dif guh lif hemv goonf gee,

en teeif ziuh gang lo."

16 Boouh-lov ziuh nyunv uif vooi,

bi moof bov,

"Yih-seef-liatf gee lengv-hunf hemv hhiv ha gingf vuif Siangf-dif gee lengv-hunf haf!

Meef-loh hingf hauf gang.

17 Yih-seef-liatf lengv-hunf gee Siangf-dif liakf zuh zung hauf-loh gee vooi.

Biang geef-loh ziamf siv zih yoou lengv Ai-gipf gee tif hoouh,

fat siv meenf huh giauh liauh vooi;

seeif looif Siangf-dif ya yungh geef daf neengv gee moof yin geef-loh lokf lengv neeh hhootf hee uk miaf;

18 yoou da loouh gee tif hoouh,

Siangf-dif tuh^c geef-loh daf hhaif tee teepf veeif.

19 Siangf-dif miatf lengv Gia-noomv gee sit mooqf minv zukf booiv vooi,

ziuh oouv lengv neeh gee sev zee geef-loh huk goonv.

20 Neeh duanf likf seeh daf hhaif lai tee bek ngoh teepf veeif.

Seeif looif Siangf-dif hooi geef-loh lipf sif si guanh lih geef-loh,

zi doongv sian zi Sa-muh-eev gee tif hoouh.

21 Seeif looif geef-loh hhuf Siangf-dif lipf voongf huf hee zee geef-loh,

Siangf-dif ziuh lokf Bianf-yav-mianv neeh ziv hee liakf leekf da hhiangh Gi-sif huf hee Soouh-lov miaf huk voongf geef-loh,

huk tee teepf veeif.

22 Seeif looif,

Siangf-dif biang Soouh-lov longf haif vooi;

ziuh lipf Daf-vuif miaf huk voongf geef-loh,

Siangf-dif ya hooi geef huk gianf zingf bov,

'Hauf div heekf leekf da hhiangh Ye-si huf hee Daf-vuif,

geef zuif hoopf timv hauf,

geef dif zun siuh hauf itf siatf gee zih if.'^d

23 Siangf-dif ziuf geef eef gee,

duf ga lokf lengv-hunf neeh huf hee gee leekf lanv hooi lengv-hunf Yih-seef-liatf gee sut Giuf-zu huf hee vooi,

ziuh tih Yev-so.

24 Yev-so meenf uk miaf huk gongv Siangf-dif gee yoou,

Ye-hanf duf ga hemv too lai lengv-hunf Yih-seef-liatf gee suanf gang huiv gaih gee tuk teei vooi.

25 Ye-hanf dif huanv singv yimf buf geef gee gee tif hoouh,

bov,

'Meef-loh yih vuiv hauf tih naf nee?

Hauf meenf tih Gi-dukf;

danf tih hoouh looif dif lai huf hee miaf,

hauf ziuh tih hooi geef geq ba haif duf meenf fui.'"

26 Boouh-lov gif zukf gang bov,

"Engv tok hauf gee haf,

Yav-bov-la-hanf gee leekf lanv hemv yoou da meef-loh gingf vuif Siangf-dif gee lengv-hunf haf,

Siangf-dif go lengv-hunf gee fukf im tih suanf sev hauf-loh gee.

27 Lengv-hunf zih yoou Ye-luf-sa-leengh gee hemv lingh doouh geef-loh gee,

eenv veeih meenf took neeh huf Yev-so ziuh tih Gi-dukf,

geef-loh ya meenf mingf fekf mui mooqf An-sikf-veenf hookf sek sian zi tia tia neeh gee,

geef-loh ziuh oouv Yev-so dingf seeh hingv vooi,

zing goh gua na gee sian zi gang gee teenf hee.

28 Tuif yianf saf meenf uk geef lai gai gee soih tih gaiv lai daiv gee,

ya iau hhiuv yam Bih-la-to ga geef daiv vooi.

29 Ging veenv tia guan i geef itf siatf gee teeh geef-loh huk inv hoouh looif,

ziuh lai lengv-hunf oouv geef lokf sipf zeef giaf longf miaf,

biang loouh da feenf vooi.

30 Danf tih Siangf-dif biang geef lokf da lengv-hunf daiv tingf leengv vooi.

31 Geef tingf leengv hoouh looif lai tif ganv duanf hee,

biang lengv-hunf hemf moh geef lokf Gia-lif-lif geen Ye-luf-sa-leengh neeh gee dekf huh geef.

Lengv-hunf neeh gee en teeif yoou da bek ting gee hooi geef huk gianf zingf.

32 Hauf-loh seengv maif siau sikf mee zee meef-loh:

ziuh tih Siangf-dif eef dif sev zuh zung hauf-loh gee,

33 hongv gua Yev-so tingf leengv,

yoou leekf lanv geef-loh gee,

ziuh tih yoou hauf-loh neeh tooi hee bin tingf titf vooi.

Zing goh si fian haih ngeeih fian tia gee teenf hee,

"'Meef tih leekf da hhiangh hauf huf hee,

veenf nooih hauf lai meef.'^e

34 Guan i Siangf-dif biang Yev-so lokf da lengv-hunf daiv tingf leengv,

yungh yuanh meenf deeif lai,

Siangf-dif teenf gang gua,

geef bov,

"'Hauf dif oouv hauf eef sev Daf-vuif,

seengf giatf hhooh hhoouf gee neeh mooqf fok feenh sev meef-loh.'^f

35 "Ya lai si fian hhootf hee tia bov,

'Meef meenf hooi biang Seengf-zeh meef huf hee deeif yoou da feenf.'^g

36 "Go neeh gee meenf tih gang Daf-vuif gee,

tuif yianf Daf-vuif tooi hee zung ziuf Siangf-dif gee zih if booiv huk,

danf tih geef gua vooi^h,

bok yoou ningf zuh zung geef gee,

ya deeif vooi;

37 nah lai Siangf-dif biang geef tingf leengv gee Neeh-huf-hee meenf deeif.

38 "Too yi engv tok hauf gee haf,

meef-loh hheem huh,

hongv gua Yev-so daiv vooi,

ya tingf leengv vooi,

nah lai neeh mooqf min soih gee fukf im suanf sev meef-loh.

39 Meef-loh hhoouf zun siuh Mov-si gee lutf fapf meenf bin lai tingf lengv-hunf gung ngif gee,

neef hhoouf siang sinf Yev-so gee ziuh hhoo yi bin tingf lengv-hunf gung ngif gee.

40 Too yi meef-loh hheem zuf if,

ha zinf sian zi sek gang gee teeh fatf seeng yoou baiv huf meef-loh.

41 Zu bov,

'Neef vook meenf uif Siangf-dif gee lengv-hunf haf!

Meef-loh dif dekf,

dif hhiv guaif,

dif daiv,

eenv veeih meef-loh yoou gee tif hoouh,

hauf dif huk teeh hhinh hee,

zeekf lai lengv-hunf seengv meef-loh,

meef-loh ya meenf zun.'ⁱ"

42 Boouh-lov hemv Ba-nav-ba lokf huif hangv uk miaf gee tif hoouh,

hemv goonf zung sing geef-loh dauf mooqf An-sikf-veenf miaf gang go neeh gee fooif hemv.

43 Zipf huif inv hoouh looif,

lai lengv-hunf Yiuh-haif dunf hee hemv lengv-hunf hhiv ha minv zukf loouh Yiuh-haif giauf neeh gee hemf moh Boouh-lov hemv Ba-nav-ba.

Geef-loh voon na hemv geef-loh gang go,

hhin geef-loh hheem yungh yuanh ih hhoouf Siangf-dif gee een dianh.

44 Doongv dauf mooqf An-sikf-veenf vooi,

suanf heeuv gee lengv-hunf sav meenf liauh zung miaf huif hangv inv vooi,

dif hingf geef-loh gang Go Siangf-dif gee.

45 Danf tih lengv-hunf Yiuh-haif gee dekf huh lengv-hunf teenf liauh miaf,

ziuh meenf huh giauh timv seeu,

gang go ding Boouh-lov,

ya vuh yukf Boouh-lov.

46 Danf tih Boouh-lov hemv Ba-nav-ba looiv nyoof-nyoo gang bov,

"Go Siangf-dif gee beenh laiv tih ing gai sian suanf sev meef-loh gee;

danf tih meef-loh meenf hheeng ziapf siuf,

yih vuiv toof-too meenf fui lai deekf doongv yungh seeng,

too yi hauf-loh ziuh suanf fukf im neeh mee sev lengv-hunf hhiv ha minv zukf gee.

47 Eenv veeih Zu gua na teenf hee zuk hauf-loh bov,

"'Hauf duf ga biang meef huk bangv,

bangv nyoof hhiv ha minv zukf gee lengv-hunf vooi,

biang meef suanf giuf een hauf mee zi doongv gok fa lonh.'^j"

48 Lengv-hunf hhiv ha minv zukf gee hingf heekf go neeh gee,

ziuh meenf huh giauh eengv,

zung ngenv Go Zu gee maif,

too lai Siangf-dif sian liakf maif dif deekf doongv yungh seeng gee lengv-hunf zung sinf vooi.

49 Zu gee Go suanf lengv neeh hhootf hoou vooi.

50 Danf tih lengv-hunf Yiuh-haif gee booiv ziuv teef maih siang sinf Siangf-dif vanh ya zun zungf gee neeh hoouf hee hemv yoou heeuv neeh mee gang go lai ui sinf neeh gee,

miaf bik haih Boouh-lov hemv Ba-nav-ba,

diatf geef-loh luat lengv neeh hhootf vooi.

51 Geef-loh voon na doi na hemv goonf sam bongf baiv gok gee longf miaf,

ziuh booiv Yih-gee-nianf vooi.

52 Meenv huv An-tiv-a gee meenf huh giauh eengv,

geef-loh ya bif Seengf-lingv sung moonh.