5 Bih-deekf bif hoop da gamv neeh duanf tif ganv,

danf tih giauf huif gee lengv-hunf zung gukf lingf hooi geef doouh goouf Siangf-dif.

6 Haih ngeeih veenf Hi-lutf dif sih lih Bih-deekf,

neeh goomh hee Bih-deekf bif lian het voon hiuf langv loouh vooi,

lap yoou da leekf bingv voon huf,

ya lai leekf bingv gee foou vook yoou bak deenh.

7 It ziu lai Zu gee hian seeh huf hee nyunv yoou ningf Bih-deekf,

ya lai guang suanf nyoof lanf mee bangf-bangv vooi,

hian seeh huf hee bau lokf ningf tek Bih-deekf loouh,

bau geef angv vooi,

bov,

"Meng ziqf uif miaf!"

Lian het gee ziuh luat lokf baiv moof geef longf miaf vooi.

8 Hian seeh huf hee yam geef bov,

"Gatf ba loou loouh,

dingv haif loouh."

Geef ziuh teenf huk vooi.

Hian seeh neeh huf hee yuh bov,

"Lumf yua bak hiuf hemv loouh,

di moh hauf booiv."

9 Bih-deekf ziuh uk miaf di moh hian seeh neeh huf hee booiv,

danf tih geef meenf huh hian seeh neeh huf hee huk gee tih zinv gee,

hhif bov geef dekf huh siau zeef yianv gee gingh siangf vooi.

10 Geef-loh gua haih it soongf gamv hemv haih ngeeih soongf gamv vooi,

gamv neeh voon soongf zung lai leekf bingv dekf ban,

geef-loh ziuh miaf doongv deenh het hongv booiv da heeuv neeh mee vooi,

deenh neeh mee ziuh toof-too hheeif vooi.

Geef-loh uk miaf,

gua gaiv hiuf hee hoouh looif,

it ziu hian seeh neeh huf hee ziuh lif hhooiv geef booiv vooi.

11 Neeh tif hoouh,

Bih-deekf nah mingf fekf gua miaf,

bov,

"En teeif hauf huh titf-titf tih Zu faif hian seeh geef gee miaf go hauf luat moof Hi-lutf,

biang Yiuh-haif lengv-hunf tiang gee itf siatf faih teeh vooi."

12 Geef mingf fekf vooi,

ziuh booiv lanf Mah-lif-a,

Mah-lif-a tih maih lai Ye-hanf huf hee,

Ye-hanf ya yam Mah-hheev hee,

dang siv lai lengv-hunf dunf hee yoou ninh doouh goouf.

13 Bih-deekf hhauv deenh da bang mee yam,

lai maih nof huf hee yam Lov-daf hee deuf uk miaf heengf.

14 Geef hingf huh sauv Bih-deekf mee,

duf ga eengv buh bangh hheeif deenh vooi,

ziuh deuf loouh booiv seengv hemv goonf,

bov,

"Bih-deekf nyunv yoou bak deenh nenh."

15 Geef-loh bov,

"Meef denv vooi haf!"

Danf tih maih nof neeh huf hee nge-nge bov,

"Titf-titf tih geef!"

Geef-loh bov,

"Nge tih hian seeh geef huf hee."

16 Bih-deekf ziangf hangh hhauv deenh;

geef-loh hheeif deenh vooi,

huh titf-titf tih geef,

ziuh meenf huh giauh hhiv guaif.

17 Bih-deekf viqf moof yam geef-loh meenf ngah gang go,

ziuh seengv geef-loh Zu di leeuf yin geef uk gamv;

yuh zuk geef-loh,

bov,

"Meef-loh hheem seengv teeh neeh gee zee Yav-gookf hemv engv tok hoouf hee."

Zuk inv geef ziuh booiv gakf hhootf vooi.

18 Veenf bangv vooi,

leekf bingv gee meenf huh Bih-deekf booiv leeuf vooi,

geef-loh ziuh luanf dangf inv vooi.

19 Hi-lutf doongv lengv duf div geef,

meenf div lai heekf,

ziuh hoof leekf bingv vook Bih-deekf neeh hoouf hee miaf tooi go,

ya mingf lingf ga geef-loh booiv vooi.

Seeif looif Hi-lutf lif hhooiv Yiuh-haif,

longf Gai-sav-lif-yav vooi,

zih yoou ninh.

20 Hi-lutf hheei hhif lengv-hunf Tui-lov hemv Si-dunf gee.

Geef-loh ziuh faif daif biauh booiv div Bov-la-si-du,

geef tih zungh guanh Hi-lutf huf hee,

sing geef hooi gang singv hemv Hi-lutf maif goonf,

geef ya hongf i vooi.

Eenv veeih heeuv Tui-lov hemv Si-dunf neeh voon mooqf tih hhoouf Hi-lutf guanh lih gee lengv foongv gungf ingf liangv sikf gee.

21 Doongv gang maif gee neeh veenf hee,

Hi-lutf dingv foouf dingv mauh ngov yoou baiv haif,

doi na bek ting gee gang go.

22 Bek ting gee sauv lookf-look yanh bov,

"Sauv neeh mee tih sauv Siangf-dif mee,

meenf tih sauv lengv-hunf mee."

23 Eenv veeih Hi-lutf meenf guiv yungv yauf sev Siangf-dif,

Zu gee hian seeh ziuh mah siangf fatf geef,

geef bif mingf gapf,

ziuh hunh hheei vooi.

24 Danf tih Siangf-dif gee fukf im mef suanf mef hhuat,

ya mef suanf mef look.

25 Ba-nav-ba hemv Soouh-lov hong sinf gian hhuanh neeh gee doongv vooi,

ziuh yin Ye-hanf lokf Ye-luf-sa-leengh leengv miaf,

Ye-hanf ya yam Mah-hheev hee.