huv 14

Yoou Yih-gee-nianf

1 Boouh-lov hemv Ba-nav-ba doongv Yih-gee-nianf vooi,

geef-loh zing fingf tif teenf hee loouh lengv-hunf Yiuh-haif gee huif hangv vooi gang go Siangf-dif gee,

ziuh lai haih liauh lengv-hunf Yiuh-haif gee hemv lengv-hunf Si-laf gee sinf Zu vooi.

2 Danf tih lengv-hunf Yiuh-haif meenf sinf Zu neeh gee ziuv teef lengv-hunf hhiv ha minv zukf gee,

biang timv geef-loh gee zookf engv tok gee,

fanh deeif engv tok gee.

3 Boouh-lov hemv Ba-nav-ba zih yoou ninh haih foong,

hhoouf Zu looiv nyoof-nyoo suanf Go Siangf-dif gee,

Zu sev neengv likf zee geef-loh huk seenv zif hemv huk hhiv guaif gee teeh,

zingf mingv Siangf-dif boongv tooh hemv go lengv-hunf gee Go tih zinv gee.

4 Lengv-hunf da heeuv gee ziuh feenv dangh feenv faif vooi,

feenh hee hongf lengv-hunf Yiuh-haif gee,

feenh hee hongf seeh huv gee.

5 Neeh tif hoouh,

lengv-hunf hhiv ha minv zukf gee hemv lengv-hunf Yiuh-haif gee gangf lingh doouh geef-loh gee hemv goonf zung ong geen miaf,

dif vuh yukf seeh huv gee,

oouv dinf zakf geef-loh.

6 Seeh huv gee huh vooi,

ziuh deuf booiv Liv-goou-niv gee heeuv Luf-si-teev hemv heeuv Teef-fif,

gangf lengv yoou ningf heeuv neeh voon mooqf gee vooi,

7 yoou ninh gif zukf suanf fukf im.

Yoou Luf-si-teev

8 Yoou heeuv Luf-si-teev mee lai lengv-hunf huf hee gok deei hee meenf lai lingf,

gi tif duf ngov yoou ninh,

geef gok hhoih lokf haiv miaf,

lokf hau meenf booiv sunv gua.

9 Geef yoou ninh hingf Boouh-lov gang Go Siangf-dif gee;

Boouh-lov vook geef itf-it teenf hee,

huh geef lai sinf sim hhoo yi yiav lai maif,

10 ziuh sauv lookf-look bov,

"Uif miaf,

nyunv gok deei hee teenf-teenf geef!"

Lengv-hunf neeh huf hee ziuh taq uif,

ya booiv sunv vooi.

11 Hemv goonf dekf huh Boouh-lov huk teeh neeh gee,

ziuh sauv lookf-look gang go Liv-goou-niv gee bov,

"Lai tinv gav bin tingf lengv-hunf,

miaf doouf-loh neeh hhootf vooi."

12 Hemv goonf yam Ba-nav-ba tih gungv Zeeuf-si,

eenv veeih Boouh-lov daif heeuv gang go,

ziuh yam Boouh-lov tih gungv Si-eev-miv.

13 Yoou ningf heeuv neeh mee,

lai miuh gungv Zeeuf-si mee,

miuh neeh mee gee gif see diuf hookf nguf gi huf hemv feh hua zuan gee miaf doongv bak deenh heeuv vooi,

dif hemv bek ting gee hongf goonf hianf sev seeh huv gee.

14 Ba-nav-ba hemv Boouh-lov neeh voon huf seeh huv,

hingf huh singv hhuangf neeh gee,

ziuh tiangv timv hheei hhif iakf hho yua toof-too gee vooi,

ong loouh da lengv-hunf hoouf hee,

sauv lookf-hook yanh bov,

15 "Meef-loh hemv goonf veeih gai huk teeh neeh gee nif?

Hauf-loh ya tih lengv-hunf,

hemv meef-loh hongf goonf.

Hauf-loh suanf fukf im neeh mee sev meef-loh,

tih yam meef-loh meenf ngah bai gungv gev meenf lai yungh neeh gee vooi,

hheem zuanh leengv ningf soouh fa soouh matf soouh hai hemv soouh yoou da ninh too lai gee itf siatf,

yungh yuanh duf yoou gee neeh huf Siangf-dif.

16 Yoou gua na gee tooi ganv,

Siangf-dif suf saih hhiv ha minv zukf gee lengv-hunf,

ooi huk gai gee ziuh huk gai gee.

17 Danf tih geef ya siangf-siangf hongv gua maif gee teeh,

zingf mingv geef titf-titf sunv zaif.

Zing goh geef lokf baiv fa sev namh funv zee meef-loh,

biang meef-loh anf tif ganv lai fung siu,

goonv zuk goonv neeuf,

timv gee suh saih."

18 Ba-nav-ba hemv Boouh-lov gang go neeh gee inv,

nah lanf lai on lengv-hunf neeh hoouf hee meenf hianf goouh sev geef-loh.

19 Danf tih lai lengv-hunf Yiuh-haif lokf An-tiv-a hemv Yih-gee-nianf miaf neeh gee,

ziuv teef hemv goonf oouv dinf zakf Boouh-lov,

yih vuiv zakf geef daiv vooi,

ziuh hav geef uk heeuv vooi fengf.

20 Meenv huv gee miaf vif geef gee tif hoouh,

geef ziuh nyunv uif,

loouh heeuv vooi.

Leengv Sif-lif-a gee An-tiv-a

Haih ngeeih veenf,

geef hemv Ba-nav-ba leengv Teef-fif vooi.

21 Geef-loh voon na yoou heeuv Teef-fif mee suanf fukf im,

biang haih liauh lengv-hunf huk meenv huv vooi.

Seeif looif geef-loh ziuh leengv Luf-si-teev,

Yih-gee-nianf,

An-tiv-a vooi.

22 Geef-loh leengv doongv leeuf duf gian guf meenv huv gee,

guh lif geef-loh hheem lai sinf sim yungh yuanh ih hhoouf Zu,

yuh bov geef-loh,

"Doouf-loh dif loouh Siangf-dif gee gok gav,

itf dingf hheem tuh haih liauh hhuh nanf."

23 Geef-loh voon na hooi gookf mooqf giauf huif anf lipf ziangh lauh,

hongv gua gim goonv doouh goouf,

gauv geef-loh sev geef-loh siang sinf gee Zu.

24 Seeif looif geef-loh voon na gingv gua Bih-si-tih,

miaf doongv Foongv-feei-lif-yaf,

25 yoou Bev-zia gang Go Siangf-dif gee hoouh looif,

ziuh lokf ninh longf Yaf-daf-lif vooi.

26 Lokf Yaf-daf-lif ngov luaf leengv An-tiv-a.

Giangf hhai sih ziuh tih yoou lengv neeh hhootf hee,

hemv goonf faif geef-loh uk booiv huk gongv,

hhoouf Siangf-dif gee een dianh,

en teeif geef-loh duf ga huanv singv leengv miaf vooi.

27 Geef-loh leengv doongv ninh ziuh yam meenv huv gee inf-inv miaf,

seengv geef-loh Siangf-dif di leeuf hongv gua geef-loh voon na huk gee teeh,

gangf di leeuf nyi sunv sinf Zu hiuf hee zee lengv-hunf hhiv ha minv zukf gee.

28 Geef-loh voon na yoou ninh hemv meenv huv gee zih haih foong.