5 Danf tih lengv-hunf Yiuh-haif gee timv seeu Boouh-lov hemv Si-la,

ziuh booiv iauf leekf seeu lanf zaih hoouf hee miaf doouh luanf,

ziuv teef suanf heeuv gee lengv-hunf,

seeif looif ya ong loouh lanf Ye-sun vooi,

dif hoof Boouh-lov hemv Si-la gauv sev lengv-hunf da heeuv gee.

6 Meenf div lai heekf geef-loh voon na,

ziuh hoof Ye-sun hemv engv tok gi huf leeh booiv ningf hak gee vooi,

geef-loh luanh bov,

"Lengv-hunf neeh hoouf hee doongv leeuf duf doouh luanf,

en teeif miaf doongv nooih vooi,

7 danf tih Ye-sun luf geef-loh yoou lanf geef.

Lengv-hunf neeh gee vuih famh Loh-mah voongf dooi Hhaih-saf gee mingf lingf vooi,

bov enf lai gakf huf voongf yoou,

yam Yev-so hee."

8 Bek ting gee hemv hak neeh gee hingf heekf go neeh gee zung mangf hhuangf vooi,

9 ziuh yam Ye-sun hemv hhiv ha gee lengv-hunf suanv buf gauv boouh zingf gim hoouh looif,

nah tek geef-loh vooi.

10 Neeh goomh hee,

engv tok hoouf hee mah siangf hong Boouh-lov hemv Si-la booiv Fif-liv-yaf.

Geef-loh voon na doongv ninh vooi,

ziuh loouh lengv-hunf Yiuh-haif gee huif hangv vooi.

11 Lengv-hunf yoou ninh gee maif gua lengv-hunf Te-sav-lov-niv-zia gee vooi,

eengf-eengv ziapf siuf fukf im,

veenf-veenf saf ging veenv,

dekf teeh neeh gee tih meenf tih teenf hee.

12 Giatf guah yoou da geef-loh lai haih liauh lengv-hunf siang sinf vooi,

ya lai maih leekf Si-laf bif vanh zun zungf gee dunf hee hemv da hhiangh dunf hee zung siang sinf vooi.

13 Danf tih Yiuh-haif lengv-hunf yoou Te-sav-lov-niv-zia neeh gee huh Boouh-lov ya yoou Fif-liv-yaf suanf Siangf-dif gee fukf im,

ziuh booiv ninh vooi doouh luanf ziuv teef bek ting gee.

14 Engv tok gee ziuh mah siangf hong Boouh-lov booiv ningf hai vooi,

Si-la hemv Tiv-mov-haif enf luf yoou Fif-liv-yaf yoou.

15 Lengv-hunf hong Boouh-lov booiv neeh gee hong geef zi doongv Yav-dianh,

Boouh-lov ziuh yam geef-loh leengv booiv,

yam Si-la hemv Tiv-mov-haif mengf-meng miaf ningf geef,

geef-loh ziuh leengv booiv vooi.

16 Boouh-lov yoou Yav-dianh foou Si-la hemv Tiv-mov-haif gee tif hoouh,

dekf huh gungv gee dik heeuv neeh mee vooi,

timv geef mee meenf huh giauh geen gip ngaif tuh.

17 Geef ziuh booiv huif hangv hemv lengv-hunf Yiuh-haif gee gangf lengv-hunf hhiv ha minv zukf gingf vuif Siangf-dif neeh gee bianf leenf,

ya veenf-veenf booiv da heeuv vooi,

hemv am heekf gee lengv-hunf bianf leenf.

18 Ya lai Yih-bih-guh-lov hemv Si-to-yaf neeh voon mooqf faif gee zeekf hiakf gia hemv Boouh-lov zeeng leenf,

lai feenh hee bov,

"Lengv-hunf gang go denv gang go ngoou neeh huf hee dif gang gai gee nooh?"

Ya lai feenh hee bov,

"Geef dif-di suanf gang gungv nguaif gukf gee."

Geef-loh teenf gang,

tih eenv veeih Boouh-lov suanf gang Yev-so hemv tingf leengv gee fukf im.

19 Geef-loh dai Boouh-lov doongv Yaf-lef-ba-guh vooi tooi geef,

bov,

"Meef gang siau sikf nauh neeh mee,

meef hhoo yi seengv hauf-loh meenf?

20 Eenv veeih meef suanf gang gee teeh hheekf see hhiv guaif,

hauf-loh dif tiang huh teeh neeh gee tih gai gee if see."

21 Yuanv miaf lengv-hunf Yav-dianh gee hemv lengv-hunf nguaif gukf zih yoou ninh neeh gee gai gee duf meenf huk,

zuan meenv gang sin veenv zutf sin veenv.

22 Boouh-lov nyunv yoou da Yaf-lef-ba-guh,

bov,

"Lengv-hunf Yav-dianh gee haf,

hauf huh meef-loh gai gee teeh duf ooi booiv bai gungv bai tinf.

23 Eenv veeih hauf ngeeu heeuv gee tif hoouh,

zuf if dekf lengv meef-loh bai gungv bai tinf neeh gee,

huh lai gif hanv mee,

baiv ninh tia bov,

'Hianf sev meenf took gee tinf'.

En teeif hauf seengv meef-loh meenf took ya booiv bai gee neeh huf tinf zee meef-loh.

24 "Geef tih soouh fa soouh matf hemv soouh yoou da ninh too lai itf siatf gee Siangf-dif,

gif yianv geef tih fa matf gee Zu,

ziuh meenf zih yoou lanf lengv-hunf huk neeh gee,

25 ya meenf si iauf lengv-hunf fokf teeh geef,

zing goh geef hhiat gai gee teenf hee.

Geef famh sev seeng mingf hemv hheei gangf too lai gee itf siatf zee lengv-hunf.

26 Geef lokf lengv-hunf^a huf hee soouh uk gookf mooqf minv zukf,

biang minv zukf neeh gee dik bak matf vooi,

ya sian dingf minv zukf neeh gee yoou giauh foong hemv zih yoou leeuf.

27 Siangf-dif teenf huk tih biang lengv-hunf booiv div geef,

i sook div booiv div leengv ziuh div heekf geef vooi.

Hhiv sitf Siangf-dif lif doouf-loh mui na lengv-hunf duf meenf looiv,

28 'Eenv veeih doouf-loh gee seeng huatf,

hingv dungf,

daiv yoou,

gai gee duf lokf geef.

' Ziuh zing meef-loh lengv-hunf tia tiv heeif deei neeh gee teenf hee,

lai feenh hee bov,

'Doouf-loh ya tih leekf lanv geef gee.'"

29 Boouh-lov gif zukf gang bov,

"Gif yianv doouf-loh tih leekf lanv Siangf-dif gee,

ziuh meenf ing gai yih vuiv Siangf-dif zing gungv gee teenf hee,

gungv gee tih lengv-hunf ziuf toof-too gee tiang fap,

hhoouf gok moof oouv gimv,

oouv ngoonf,

oouv dinf miaf hheek uk miaf gee.

30 Gua na lengv-hunf gee ngeenf meenf took,

Siangf-dif ya meenf gif giauf geef-loh,

danf tih en teeif Siangf-dif yam lengv-hunf gee leeuf na duf hheem huiv gaih.

31 Eenv veeih geef duf ga dingf tif ganv maif vooi,

dif hongv gua lengv-hunf geef liakf gee neeh huf hee,

anf gung ngif miaf simh fuanf suanv sif gaif.

Geef biang lengv-hunf neeh huf hee lokf da lengv-hunf daiv tingf leengv,

tih biang suanv sif gaif gee lengv-hunf huh lengv-hunf neeh huf hee tih geef liakf gee."

32 Hemv goonf hingf heekf geef gang lengv-hunf daiv tingf leengv gee teeh,

ziuh lai lengv-hunf liauv geef,

danf tih lai feenh hee bov,

"Dauf fooif hauf-loh ya dif tiang hingf meef gang teeh neeh gee yoou."

33 Teenf hee Boouh-lov ziuh lif hhooiv geef-loh vooi.

34 Danf tih lai lengv-hunf feenh hee hongf Boouh-lov,

ziuh siang sinf vooi,

hhiv zung lai huf hee tih yoou Yaf-lef-ba-guh huk hak gee,

yam Tiu-niv-siu hee,

ya lai maih leekf huf hee yam Daf-mah-lih hee,

ya lai lengv-hunf hhiv ha gee hemv.