Boouh-lov yoou Gee-linv-to
18
1 Teeh neeh gee hoouh looif,
Boouh-lov ziuh lif hhooiv Yav-dianh,
miaf doongv Gee-linv-to vooi.
2 Geef yoou ninh am heekf lengv-hunf Yiuh-haif huf hee yam Yaf-zi-la hee.
Yaf-zi-la lai yoou Beenh-du,
geef hemv maih geef huf hee Baiv-gi-la nauf-nau yif lokf If-daf-lif miaf,
eenv veeih Loh-mah voongf dooi Geev-lauh-tiu mingf lingf too lai gee Yiuh-haif lengv-hunf zung lif hhooiv Loh-mah.
Boouh-lov ziuh booiv div geef-loh.
3 Eenv veeih Boouh-lov hemv geef-loh hongf goonf zung tih huk zangf feengv div goonv gee,
Boouh-lov ziuh zih yoou ninh hemv geef-loh hongf goonf huk gongv.
4 Leeuf mooqf An-sikf-veenf,
Boouh-lov duf loouh huif hangv vooi hemv lengv-hunf gee bianf leenf,
hhin lengv-hunf Yiuh-haif gee gangf lengv-hunf Si-laf gee siang sinf Zu.
5 Si-la hemv Tiv-mov-haif lokf Mah-ziv-deenf miaf Gee-linv-to hoouh looif,
Boouh-lov ziuh zuan sim booiv suanf gang fukf im,
hemv lengv-hunf Yiuh-haif gee zingf mingv Yev-so ziuh tih Gi-dukf.
6 Danf tih lengv-hunf Yiuh-haif gee fanh deeif geef,
vuh yukf geef,
Boouh-lov ziuh yeengh hho yua hhangf ngif,
bov,
"Soih meef-loh gee guiv leengv meef-loha,
hemv hauf meenf lai gai gee guan hifb.
Lokf nooih hoouh looif,
hauf dif booiv ningf lengv-hunf hhiv ha minv zukf gee."
7 Boouh-lov ziuh lif hhooiv geef-loh,
booiv lanf Tiv-to-yiuh-sif-du vooi,
lengv-hunf neeh huf hee tih gingf baif Siangf-dif gee,
lanf geef mee loof-loo ningf huif hangv.
8 Guanh lih huif hangv gee Gi-lif-si-buf hemv geef suanf lanf zung sinf Zu vooi,
ya lai haih liauh lengv-hunf Gee-linv-to gee hingf heekf fukf im hoouh looif,
ziuh siang sinf ya tuk leei vooi.
9 Lai goomh hee,
Zu hongv gua siau zeef yianv gee gingh siangf hemv Boouh-lov gang bov,
"Meenf ngah mangf,
biang timv booiv gang,
meenf ngah hengf.
10 Eenv veeih lai hauf hemv meef yoou ningf goonf,
itf dingf meenf lai naf nee haih lai meef,
eenv veeih yoou heeuv neeh mee lai haih liauh bek ting tih hauf gee."
11 Boouh-lov yoou ninh zih veeif hee sok mooqf geuf,
maiv Go Siangf-dif gee zee geef-loh.
12 Doongv Zia-liuv huk Yaf-gai-yaf seengh ziangh gee tif hoouh,
lengv-hunf Yiuh-haif gee hemv goonf hongf timv uif miaf gung gikf Boouh-lov,
leeh geef booiv fapf hingv vooi,
13 bov,
"Lengv-hunf neeh huf hee ziuv teef bek ting gee,
meenf anf lutf fapf booiv gingf baif Siangf-dif."
14 Boouh-lov giangf dif gang go,
Zia-liuv ziuh bov lengv-hunf Yiuh-haif gee,
"Lengv-hunf Yiuh-haif meef-loh neeh gee,
teeh neeh gee zeekf tih imf uang gee,
ha tih famh soih gee,
hauf ziuh ing gai yungh timv hingf meef-loh gang.
15 Danf tih en teeif meef-loh zengv go,
zengv nooiv hemv zengv lutf fapf meef-loh gee,
meef-loh toof-too sih lih lo!
Hauf meenf ooi guanh teeh neeh gee."
16 Ziuh voouf geef-loh uk fapf hingv vooi.
17 Hemv goonf ziuh ziu zuh guanh huif hangv huf hee Sov-tiv-niv loouh vooi,
yoou na fapf hingv git geef.
Teeh neeh gee Zia-liuv ya meenf saf teeh.
Boouh-lov leengv doongv Sif-lif-a gee An-tiv-a
18 Boouh-lov yuh yoou ninh zih haih liauh veenf hemv,
seeif looif lif hhooiv engv tok hoouf hee,
hemv Baiv-gi-la gangf Yaf-zi-la ngov luaf booiv Sif-lif-a vooi.
Dif booiv zee sianv,
eenv veeih Boouh-lov eef gua,
geef ziuh yoou Zian-geev-lih ziuf lengv-hunf Yiuh-haif gee guiv leei lon hau vooi.
19 Geef-loh doongv Yih-fov-soh vooi,
Boouh-lov luf Baiv-gi-la hemv Yaf-zi-la yoou ninh,
toof-too loouh huif hangv vooi,
hemv lengv-hunf Yiuh-haif gee bianf leenf.
20 Hemv goonf luf geef zih gav veenf,
danf tih geef meenf hheeng,
21 dif booiv gee tif hoouh,
geef bov,
"Zeekf Siangf-dif hongf i,
hauf ya dif leengv miaf yoou."
Ziuh lokf Yih-fov-soh ngov luaf booiv vooi.
22 Boouh-lov doongv Gai-sav-lif-yav ziuh longf luaf vooi,
geen Ye-luf-sa-leengh tunf giauf huif gee,
seeif looif ziuh longf An-tiv-a vooi.
23 Geef yoou ninh zih duanf hee tif ganv hoouh looif,
ziuh lokf ninh booiv bak lengv Gia-la-haif hemv Fov-liv-gia gee hoouf-hoou vooi,
guh lif meenv huv gee biang geef-loh geengf lai sinf sim.
Yaf-bo-lov yoou Yih-fov-soh suanf fukf im
24 Lai lengv-hunf Yiuh-haif huf hee yam Yaf-bo-lov hee,
miaf doongv Yih-fov-soh vooi.
Geef lai yoou heeuv Yaf-lif-san-daf,
hheekf see lai hheeuh saivc,
zuif heen gaih sikf ging veenv.
25 Lengv-hunf neeh huf hee duf ga maif-maif hookf zipf gua vooi,
huh Siangf-dif di leeuf go lengv-hunfd,
geef meenf huh giauh ooi hemv vanh gang guan i Yev-so gee teeh,
zung gaih sikf teeh neeh gee sev vanh hingf,
danf tih geef nah took Ye-hanf suanf lengv-hunf hheem nginh soih huiv gaih,
ziapf siuf tuk leei toof-too.
26 Yaf-bo-lov hhai sih yoou huif hangv looiv nyoof-nyoo gang teeh neeh gee.
Baiv-gi-la hemv Yaf-zi-la hingf huh vooi,
ziuh zip geef miaf,
gaih sikf sunv Siangf-dif hiuf hee geengf mingf fekf sev geef hingf.
27 Yaf-bo-lov tiang booiv Yaf-gai-yaf,
engv tok hoouf hee ziuh guh lif geef,
ya tia tin yam meenv huv gee ziapf daif geefe.
Geef doongv ninh vooi,
boongv neef Siangf-dif dookf ziuh siang sinf Zu neeh gee meenf huh giauh liauh,
28 eenv veeih geef yoou dau na hemv goonf,
finh lengv-hunf Yiuh-haif gee meenf ding lai on,
geen gif ging veenv miaf zingf mingv Yev-so ziuh tih Gi-dukf.