3 Boouh-lov bov,

"Teenf hee meef-loh tuk gee tih gai gee leei nif?"

Geef-loh tanv bov,

"Ye-hanf gee."

4 Boouh-lov bov,

"Ye-hanf tuk gee leei tih huiv gaih gee,

geef seengv bek ting gee hheem siang sinf miaf bih geef seeif gee neeh huf hee,

ziuh tih Yev-so."

5 Geef-loh hingf heekf go neeh gee,

ziuh feengf nooiv Zu Yev-so mee tuk leei vooi.

6 Boouh-lov zav moof geen baiv hau geef-loh,

hooi geef-loh doouh goouf,

Seengf-lingv ziuh longf miaf geen baiv huf geef-loh vooi,

geef-loh ziuh gang go geef-loh beenh laiv meenf took gang gee uk miaf,

ya gang ngif ngianv.

7 Lengv-hunf neeh gee inf-inv daf hhaif lai teepf ngeeih na.

8 Boouh-lov linf-linf tamv mooqf geuf loouh huif hangv vooi,

looiv nyoof-nyoo gang Go Siangf-dif gee hemv vanh bianf leenf Siangf-dif gok gav gee teeh,

hhin lengv-hunf gee siang sinf Zu.

9 Danf tih lai lengv-hunf feenh hee i luaq meenf hheeng siang sinf,

yoou dau na hemv goonf zooh tiv an sunv Siangf-dif hiuf hee.

Boouh-lov ziuh lif hhooiv geef-loh vooi,

ya yam meenv huv gee meenf ngah loo ningf geef-loh.

Geef veenf-veenf duf yoou lanf hookf Tui-lav-nuv mee hemv vanh bianf leenf.

10 Boouh-lov teenf hee huk voon veeif,

biang lengv-hunf zih yoou Yaf-si-yaf neeh gee,

meenf guan tih Yiuh-haif gee ha tih Si-laf gee,

zung hingf heekf Zu gee fukf im vooi.

11 Siangf-dif hongv gua Boouh-lov huk haih liauh hheekf see meenf fingf tiangf gee teeh.

12 Yimf doongv lengv-hunf oouv siuh fef ha tih oouv vuih gin Boouh-lov yungh gua neeh gee,

booiv zav geen baiv huf lengv-hunf fingh gee,

fingh gee ziuh maif vooi,

yif hangv gee ya uk booiv vooi.

13 Neeh tif hoouh,

lai lengv-hunf Yiuh-haif gi huf leeuf ziqf duf booiv hoou,

nemh zeeuf voouf yif hangv,

geef-loh ya tiang zef nooiv Zuh Yev-so mee booiv voouf yif hangv,

doi lengv-hunf yif hangv geen huf neeh gee,

bov,

"Hauf oouv nooiv Yev-so Boouh-lov suanf-suanf neeh mee,

mingf lingf meef-loh uk miaf."

14 Leekf-da-hhiangh Sif-gi-huav sit huf ya huk teeh neeh gee,

Sif-gi-huav tih Yiuh-haif lengv-hunf gee gif see ziangh.

15 Danf tih yif hangv bov geef-loh bov,

"Hauf took Yev-so,

hauf ya huh Boouh-lov,

meef-loh tih naf nee nif?"

16 Lengv-hunf yif hangv geen huf gee neeh huf hee ziuh hhum geen baiv huf geef-loh,

hhum heekf voon huf det vooi,

git yingf geef-loh vooi,

git geef-loh tiangv vooi,

biang geef-loh geq nangv lingf-lingv lokf lanf neeh mee deuf uk booiv.

17 Too lai lengv-hunf zih yoou Yih-fov-soh neeh gee,

meenf guan tih lengv-hunf Yiuh-haif gee ha tih lengv-hunf Si-laf gee,

zung huh teeh neeh gee vooi,

geef-loh ya meenf huh giauh mangf.

Lokf ninh uif lengv-hunf gee ziuh ngenv nooiv Zuh Yev-so mee.

18 Lai haih liauh duf ga siang sinf vooi gee lengv-hunf miaf singv nginf ya gung hhai toof-too huk gua gee teeh.

19 Ya lai haih liauh huk daf hoouh gee,

oouv sek geef-loh gee miaf biang yoou ningf goonf,

doi na hemv goonf ngupf vooi.

Geef-loh hhoouf sek neeh gee inf-inv dooi lai ngoonf fiakf nga vanh.

20 Teenf hee,

Zu gee fukf im meenf huh giauh lai neengv likf,

mef suanf mef look,

siang sinf gee lengv-hunf ya mef miaf mef liauh.

21 Teeh neeh gee hoouh looif,

Boouh-lov giatf dingf lokf Mah-ziv-deenf hemv Yaf-gai-yaf neeh fiangf hee booiv Ye-luf-sa-leengh.

Geef bov,

"Hauf doongv ninh vooi,

ya hheem booiv Loh-mah dekf ziu."

22 Geef ziuh faif ngih moof geef voon huf booiv Mah-ziv-deenf,

ngih moof neeh voon huf tih Tiv-mov-haif hemv Yih-la-du,

Boouh-lov toof-too ziamf siv luf yoou Yaf-si-yaf.

23 Yoou neeh tif hoouh,

sunv Siangf-dif hiuf hee tee lengv-hunf Yih-fov-soh gee daf boouf luanf.

24 Lai bef git ngoonf huf hee yam Tiv-miv-tiu hee,

zuan meenv oouv ngoonf miaf huk ga deengf foof Yaf-tiv-miv neeh huf tinf gee.

Geef biang lengv-hunf huk ngipf neeh zuangv gee hanf meenf huh giauh sinf vooi.

25 Geef yam geef-loh hemv yam lengv-hunf yoou ningf huk gongv neeh zuangv gee inf-inv miaf,

bov,

"Meef-loh huh,

doouf-loh tih hhoouf huk ngipf neeh mee nah fat saif gee.

26 Danf tih,

en teeif Boouh-lov neeh huf hee meenf danf-danv yoou Yih-fov-soh,

ya sav meenf liauh yoou suanf Yaf-si-yaf,

ziuv teef haih liauh lengv-hunf,

bov,

'Lengv-hunf hheek gee meenf tih tinf.

' Teeh neeh gee meef-loh ya dekf huh hingf huh vooi.

27 Ziuf teenf hee longf booiv,

vanh meenf danv dekf meenf uif hangv ngiapf doouf-loh neeh mee,

linf miuh foof Yaf-tiv-miv neeh mee ya meenf lai yungh vooi,

yimf doongv suanf Yaf-si-yaf hemv suanv sif gaif lengv-hunf bai gee foof Yaf-tiv-miv ya hhua haiv vooi,

geef heen ya meenf lai lengv-hunf huh vooi."

28 Geef-loh hingf vooi,

ziuh hhif tuf-tuf teenf hee yanh bov,

"Lengv-hunf Yih-fov-soh gee foof Yaf-tiv-miv zuif heen!"

29 Suanf heeuv zung luanh vinv vooi.

Geef-loh ziuh hoof hemf moh Boouh-lov gee Gai-yiuh hemv Yaf-lih-tav-guh loouh vooi,

geef-loh voon na tih lengv-hunf Mah-ziv-deenf gee,

hemv goonf hongf timv ong loouh da hif yuanf vooi.

30 Boouh-lov tiang booiv ningf lengv-hunf neeh hoouf hee,

danf tih meenv huv gee meenf sev geef booiv.

31 Ya lai lingh doouh Yaf-si-yaf gi huf tih feengf yu Boouh-lov gee,

geef-loh faif lengv-hunf miaf hhin Boouh-lov,

meenf ngah moouf hiamh loouh hif yuanf.

32 Neeh tif hoouh lengv-hunf gee vif yoou ninh luanh vinv vooi,

lai feenh hee luanh eenv,

lai feenh hee luanh iv,

haih liauh lengv-hunf duf meenf huh veeih gai vif miaf nooih.

33 Lai lengv-hunf toongh Yaf-lif-san-daf lokf da lengv-hunf hoouf hee uk miaf,

lengv-hunf Yiuh-haif gee ziuh toongh geef geen na vooi.

Yaf-lif-san-daf ziuh viqf moof,

dif hemv bek ting gee gang go.

34 Danf tih hemv goonf it huh geef tih lengv-hunf Yiuh-haif gee,

ziuh hongf goonf sauv saif-saif yanh bov,

"Lengv-hunf Yih-fov-soh gee foof Yaf-tiv-miv zuif heen!"

Daf hhaif yanh lai voon mooqf zungv hau teenf hee.

35 Heeuv neeh mee gee su gif yam hemv goonf meen vooi,

ziuh bov,

"Lengv-hunf Yih-fov-soh gee haf!

Lai naf nee meenf huh heeuv meef-loh neeh mee tih foou vook miuh foof Yaf-tiv-miv mee,

hemv foou vook tiang dok lokf baiv fa longf miaf neeh mee nif?

36 Gif yianv leeuf na duf huh teeh neeh gee tih titf gee,

meef-loh ziuh hheem meenf-meen geef,

meenf ngah sung dungf.

37 Meef-loh dai lengv-hunf neeh gee miaf nooih miaf,

danf tih geef-loh meenf lai lookf goouh da miuh gee,

ya meenf lai gang go famh foof Yaf-tiv-miv doouf-loh huf hee.

38 Zeekf tih Tiv-miv-tiu hemv lengv-hunf huk ngipf geef neeh mee gee dif goou naf nee,

doongv tif hoouh hhoo yi booiv fapf hingv vooi goou,

ya hhoo yi booiv ningf seengh ziangh neeh hhootf hee goou,

geef-loh hhoo yi hemv goonf goou goonf.

39 Zeekf meef-loh enf lai gakf gee teeh yoou,

ziuh hhoo yi anf zingf gui gee foong fapf booiv gaih giatf.

40 Veenf nooih meenf huh veeih gai boouf luanf,

i sook lingh doouh gee dif saf tooi hauf-loh veenf nooih gee boouf luanf,

hauf-loh ya meenf huh dif di leeuf tanv."

41 Geef gang go neeh gee inv,

ziuh yam hemv goonf tan booiv vooi.