7 Sing hhiv sitf,

hauf-loh hemv goonf zipf huif dif loot bing goonv gee tif hoouh,

Boouh-lov gang go Siangf-dif gee,

eenv veeih bak zeekf geef dif booiv vooi,

ziuh gang doongv da hheenf.

8 Hauf-loh yoou baiv deng loouf gee foongf mee zipf huif,

da ninh ziu deei dunf hee.

9 Lai leekf hauh tengv huf hee yam Yiuh-tui-guh hee,

ngov yoou bak suangv,

eenv veeih Boouh-lov gang haif foong vooi,

geef hingf nuai ziuh suanv vooi,

det lokf tamv loouf longf miaf.

Hemv goonf longf booiv tooh geef uif,

huh geef duf ga daiv vooi.

10 Boouh-lov ziuh longf booiv,

hhupf yoou baiv huf geef,

gut geef loouh bov,

"Meef-loh meenf ngah hhuangf,

geef enf lai hheei yoou."

11 Boouh-lov yuh geen loouf vooi,

loot bing goonv vooi,

ya gif zukf gang haih foong,

zi doongv veenf bangv nah booiv.

12 Hemv goonf hong leekf hauh tengv neeh huf hee maif-maif booiv vooi,

geef-loh ziuh meenf huh giauh deekf doongv an uif.

13 Boouh-lov yam hauf-loh sian ngov luaf booiv Yaf-suf,

yoou ninh foou geef,

eenv veeih geef dif toof-too booiv sunv booiv.

14 Geef yoou Yaf-suf hemv hauf-loh am goonf vooi,

hauf-loh ziuh zip geef geen luaf,

lokf ninh booiv doongv Miv-tui-lif-niv.

15 Haih ngeeih veenf,

hauf-loh lokf ninh ngov luaf doongv Gi-a gee doi minh;

haih tamv veenf doongv Sa-mov doouh;

haih ti veenf doongv Miv-lif-du.

16 Eenv veeih Boouh-lov tiang yoou Ngoh-sunv-ziatf zee sianv gan doongv Ye-luf-sa-leengh,

ziuh giatf dingf meenf hengf yoou Yih-fov-soh,

ha zinf yoou Yaf-si-yaf seengh ngoh tif ganv.

17 Boouh-lov faif lengv-hunf lokf Miv-lif-du booiv Yih-fov-soh,

sing ziangh lauh giauf huif gee miaf.

18 Geef-loh miaf vooi,

Boouh-lov ziuh bov,

"Meef-loh ya huh,

lokf hauf giangf miaf Yaf-si-yaf zi doongv en teeif,

hauf tih di leeuf doi meef-loh gee,

19 tih di leeuf fokf teeh Zu gee,

hauf gi tif duf hhiam beei,

siangf-siangf leeiv namh dav,

ya eenv veeih lengv-hunf Yiuh-haif gee haih hauf,

hauf meenf huh tuh giau liauh hho gua.

20 Meef-loh ya huh,

doi meef-loh lai ik gee teeh,

hauf gai gee duf meenf mangf,

zung seengv meef-loh vooi,

meenf guan tih yoou dau na hemv goonf,

ha tih yoou lanf meef-loh,

hauf zung tih teenf hee seengv meef-loh maiv meef-loh vooi.

21 Hauf ya doi lengv-hunf Yiuh-haif gee hemv lengv-hunf Si-laf gee huk gianf zingf gua,

hhinh geef-loh hheem huiv gaih leengv ningf Siangf-dif,

doi doouf-loh gee Zuh Yev-so lai sinf sim.

22 "En teeif Seengf-lingv soiv hauf^a meng ziqf booiv Ye-luf-sa-leengh,

hauf meenf huh yoou ninh dif am heekf gai teeh.

23 Hauf nah huh yoou heeuv leeuf mooqf Seengf-lingv duf ngiamf-ngiamf teenf hee seengv hauf,

hauf dif ngov gamv,

hauf dif tuh hhuh nanf.

24 Danf tih mingh hauf hiuf hee doi hauf miaf gang meenf zungf iauf,

hauf nah tiang booiv sunv hauf hiuf hee inv,

huanv singv Zuh Yev-so gauv sev hauf gee yimf buf,

ziuh tih hooi Siangf-dif een dianh gee fukf im huk gianf zingf.

25 "Hauf siangf-siangf miaf lengv meef-loh gee,

leeuf ziqf duf ngeeu hoou vooi,

suanf Siangf-dif gok gav gee teeh.

En teeif hauf huh,

lokf nooih hoouh looif meef-loh meenf huh dav hauf fooif hemv vooi.

26 Too yi veenf nooih hauf sian seengv meef-loh,

zeekf hoouh looif Siangf-dif dingf soih^b meef-loh naf nee gee,

meenf guan hauf gee teeh.

27 Eenv veeih hauf duf ga seengv Siangf-dif suanv buf gee gif huaf zee meef-loh vooi,

meenf lai ziqf teengh.

28 Meef-loh toof-too hheem nook timv,

ya hheem ziauf guf neeh hhootf gee sinf huv maif-maif geef,

eenv veeih Seengf-lingv duf ga gauv geef-loh sev meef-loh guanh vooi,

lengv-hunf giauf huif neeh gee tih Zu oouv baq toof-too gee booiv vianv^c leengv miaf gee.

29 Hauf huh hauf booiv hoouh looif,

itf dingf lai lengv-hunf ook zing langv teenf hee loouh da meef-loh vooi haih sinf huv^d gee.

30 Yimf doongv yoou da meef-loh,

ya itf dingf lai lengv-hunf hokf i gang go Siangf-dif gee bev vooi,

ziuv teef meenv huv gee hemf moh geef-loh.

31 Too yi meef-loh hheem hheekf see nook timv,

hheem oov hauf neeh tamv veeif zi miaf,

tih di leeuf veenf-veenf goomh-goomh ziangf hangh leeiv namh dav,

hhin meef-loh maiv meef-loh gee.

32 "En teeif hauf gauv meef-loh zee Siangf-dif,

hauf siang sinf geef itf dingf ziauf guf meef-loh,

go geef gee dif boongv tooh meef-loh,

biang meef-loh deekf doongv zai feeiv,

hhoo yi hemv lengv-hunf Siangf-dif liakf neeh gee hongf goonf hiangh siuf baiv fa gee sanh ngiapf.

33 Hauf lokf hau meenf lai ham gimv,

ham ngoonf ha tih ham hho yua naf nee gee gua.

34 Meef-loh ya huh,

hauf hhoouf moof deei hee huk gongv,

tiangh hauf gangf lengv-hunf hemv hauf yoou ningf goonf neeh gee.

35 Gai gee teeh hauf duf huk bangh yiangf sev meef-loh dekf,

biang meef-loh huh hheem zing hauf teenf hee gukf lingf huk gongv,

boongv tooh neef lai si iauf neeh gee,

ya hheem oov go Zuh Yev-so gee loouh,

geef bov,

'Sev uk booiv bih zip loouh miaf geengf lai fok.'"

36 Boouh-lov gang go neeh gee inv vooi,

ziuh hhuih longf hemv geef-loh hongf goonf doouh goouf.

37 Hemv goonf zung ngai vooi,

gut geef hoomv geef.

38 Geef-loh zuif tiangv timv gee tih,

Boouh-lov bov "Lokf nooih hoouh looif meef-loh meenf huh dav hauf fooif hemv vooi".

Seeif looif geef-loh ziuh hong geef geen luaf vooi.