3 Boouh-lov bov,

"Hauf tih lengv-hunf Yiuh-haif gee,

lai yoou Gi-lif-gia gee heeuv Daf-suf mee,

danf tih yoou heeuv Ye-luf-sa-leengh tengv nyoo,

hemv Zia-mah-liatf hookf zipf lokf nook miaf,

hemv geef hookf zipf doouf-loh zuh zung ngiamv geekf gee lutf fapf,

meenf huh giauh ooi giauh goonh fokf teeh Siangf-dif,

zing meef-loh veenf nooih teenf hee.

4 Gua na hauf siangf-siangf haih lengv-hunf siang sinf Yev-so neeh gee,

ya lai haih daiv gee,

meenf guan maih leekf da hhiangh zung hoof hoop loouh gamv vooi.

5 Daf gif see hemv ziangh lauh gee zung hhoo yi zingf mingv hauf huk teeh neeh gee gua.

Hauf ya oouv tin geef-loh tia sev ziangh lauh Daf-mah-seef-geev neeh gee,

booiv ninh hoof lengv-hunf siang sinf Yev-so neeh gee,

dai leengv Ye-luf-sa-leengh vooi seengv fapf."

6 "Daf hhaif veenf da gee tif hoouh,

hauf booiv dif doongv Daf-mah-seef-geev vooi,

it ziu lai guang suanf gee meenf huh giauh bangv lokf baiv fa longf miaf,

ti minh nyoof hauf.

7 Hauf ziuh ling longf dauf matf vooi,

hingf huh lai sauv mee bov hauf,

'Soouh-lov haf,

Soouh-lov!

Meef veeih gai hangh haih hauf nif?'

8 Hauf tanv bov,

'Zu haf,

meef tih naf nee?

' Geef bov,

'Hauf ziuh tih meef bik haih gee Nah-saf-leekf lengv-hunf Yev-so.'

9 Hemf moh hauf booiv gee lengv-hunf dekf huh guang suanf neeh gee,

hingf heekf sauv neeh mee,

danf tih meenf hingf lai sing sov sauv neeh mee gang gai gee.

10 Hauf bov,

'Zu haf,

hauf hheem huk gai gee?

' Zu bov,

'Uif miaf,

loouh Daf-mah-seef-geev vooi,

too lai meef dif huk gee teeh,

yoou ninh dif lai lengv-hunf seengv meef.'

11 Eenv veeih guang suanf neeh gee haif bangv vooi,

dav hauf deei hee meenf dekf lai huh vooi,

lengv-hunf hemf moh hauf booiv neeh gee ziuh diuf moof hauf,

yin hauf loouh Daf-mah-seef-geev vooi."

12 "Yoou Daf-mah-seef-geev lai lengv-hunf huf hee yam Yaf-nav-niv-yaf hee,

geef lengv-hunf nee gingf vuif Siangf-dif ya zun siuh lutf fapf,

Yiuh-haif lengv-hunf too lai zih yoou ninh neeh gee zung ngenv geef.

13 Geef miaf div hauf,

nyunv yoou ningf hauf gang bov,

'Soouh-lov engv tok haf,

en teeif meef hhoo yi dekf huh vooi.

' Hauf giangf doongf hau dekf,

ziuh dekf huh geef vooi.

14 Geef yuh bov,

'Doouf-loh zuh zung bai gee neeh huf Siangf-dif liakf meef vooi,

biang meef mingf fekf geef gee zih if,

ya dekf huh gung ngif gee Neeh-huf-hee,

geef ya hemv meef gang go vooi.

15 Eenv veeih meef dif oouv meef dekf huh hingf huh gee itf siatf,

veeih geef seengv teeh neeh gee zee too lai gee lengv-hunf.

16 En teeif meef hangh foou gai gee yoou?

Uif miaf booiv tuk leei,

hhuf Zu tuk soih meef gee bang booiv.'"

17 "Seeif looif hauf leengv doongv Ye-luf-sa-leengh,

yoou Seengf-dianf doouh goouf gee tif hoouh,

dekf huh siau zeef yianv gee gingh siangf mee,

18 dekf huh Zu bov hauf bov,

'Meef meng ziqf lif hhooiv Ye-luf-sa-leengh,

mengf-meng geef,

eenv veeih meef hooi hauf huk gianf zingf,

lengv-hunf yoou nooih gee itf dingf meenf hheeng ziapf siuf.'

19 Hauf bov,

'Zu haf,

geef-loh zung huh hauf gua na booiv gookf mooqf huif hangv vooi,

hoof lengv-hunf siang sinf meef neeh gee,

git geef-loh hoop geef-loh loouh gamv vooi.

20 Hooi meef huk gianf zingf gee Si-tiv-fanh bif vanh ga gee tif hoouh,

hauf ya nyunv yoou ningf bov maif,

ya hooi lengv-hunf ga geef neeh gee foou hho yua.'

21 Zu bov hauf bov,

'Meef booiv lo!

Hauf dif faif meef uk booiv,

booiv lengv looif-looiv gee vooi suanf teeh hauf gee zee hhiv ha minv zukf gee lengv-hunf.'"

22 Hemv goonf it hingf heekf geef gang go neeh gee hee,

ziuh sauv lookf-look yanh bov,

"Lengv-hunf neeh zuangv hee,

ga geef booiv,

meenf ngah teengh geef yoou vooi!"

23 Hemv goonf zung yanh vinv vooi,

ya fengf hho yua gee vooi,

fung bongf gee geen fa vooi.

24 Senv fu ziangh ziuh mingf lingf dai Boouh-lov loouh da loouf vooi,

yam leekf bingv oouv binv miaf viat geef tooi geef,

dif tiang huh lengv-hunf gee veeih gai yanh geef teenf hee.

25 Leekf bingv gee giangf oouv heeif nangv miaf gatf Boouh-lov gee tif hoouh,

geef ziuh bov baiv fu ziangh Loh-mah gun deeif nyunv yoou ningf geef neeh huf hee bov,

"Lengv-hunf Loh-mah gee,

duf meenf dingf soih yoou,

meef-loh ziuh git geef,

meef-loh teenf huk heekf meenf?"

26 Baiv fu ziangh hingf heekf go neeh gee hee vooi,

ziuh booiv boouf goouf Loh-mah gun deeif gee senv fu ziangh,

bov,

"Neeh ziu meef ngaif huk vooi!

Lengv-hunf neeh huf hee tih lengv-hunf Loh-mah gee."

27 Senv fu ziangh ziuh miaf tooi Boouh-lov,

bov,

"Meef bov,

meef tih lengv-hunf Loh-mah gee haf?"

Boouh-lov tanv bov,

"Heqh."

28 Senv fu ziangh yuh bov,

"Hauf faih haih liauh sinf nah vianv lai heekf seen feenf Loh-mah mee."

Boouh-lov bov,

"Hauf lai uk miaf ziuh tih vooi."

29 Lengv-hunf dif git Boouh-lov tooi Boouh-lov neeh gee mah siangf ziuh booiv vooi,

senv fu ziangh huh Boouh-lov tih lengv-hunf Loh-mah gee,

ya eenv veeih yam lengv-hunf gatf geef gua,

ziuh meenf huh giauh mangf.

30 Haih ngeeih veenf,

senv fu ziangh tiang huh lengv-hunf Yiuh-haif gee veeih gai goou Boouh-lov,

ziuh tek geef uk miaf,

mingf lingf gif see ziangh hemv suangf gung huif gee lengv-hunf inf-inv miaf vooi,

ziuh dai Boouh-lov longf miaf,

yam geef nyunv yoou dau na hemv goonf.