Boouh-lov hooi toof-too bianf leenf
23
1 Boouh-lov vook lengv-hunf yoou gung huif neeh gee itf-it teenf hee,
bov,
"Engv tok hauf gee haf!
Hauf yoou dau na Siangf-dif huk teeh hengf hongh lokf hau zung tih anf liangf timv."
2 Daf gif see Yaf-nav-niv-yaf ziuh yam lengv-hunf nyunv yoou ningf geef neeh gee git bak Boouh-lov mee.
3 Boouh-lov bov geef,
"Gev maif meef neeh huf hee!
Siangf-dif dif git meef,
meef ngov yoou baiv haif tih dif anf lutf fapf miaf tooi hauf gee,
danf tih meef vuih famh lutf fapf,
mingf lingf lengv-hunf miaf git hauf."
4 Lengv-hunf nyunv yoou ningf neeh gee bov,
"Daf gif see Siangf-dif huf hee meef duf goom an haf?"
5 Boouh-lov bov,
"Engv tok hauf gee haf!
Hauf meenf huh geef tih daf gif see.
Eenv veeih yoou baiv ging veenv tia bov,
'Meenf zun zeeuf bek ting meef gee gee lingh doouh.'a"
6 Boouh-lov dekf uk lengv-hunf yoou ninh gee,
lai feenh hee tih Sa-du-gai danghb gee,
lai feenh hee tih Fatf-lif-saif dangh gee,
geef ziuh yoou da gung huif sauv lookf-look bov,
"Engv tok hauf haf!
Hauf tih lengv-hunf Fatf-lif-saif dangh gee,
ya tih lengv-hunf Fatf-lif-saif dangh gee leekf lanv.
Hauf bif vanh hoof miaf tooi go,
tih eenv veeih hauf siang sinf lengv-hunf daiv itf dingf tingf leengv."
7 Geef gang go neeh gee vooi,
lengv-hunf Fatf-lif-saif dangh gee hemv lengv-hunf Sa-du-gai dangh gee ziuh zengv goonf,
lengv-hunf gee ya feenv voon fiangf vooi.
8 Eenv veeih lengv-hunf Sa-du-gai dangh gee meenf siang sinf lengv-hunf daiv tingf leengv,
ya meenf siang sinf lai hian seeh hemv lai tinf lai yif hangv.
Danf tih lengv-hunf Fatf-lif-saif dangh gee,
zung siang sinf lai neeh gee.
9 Hemv goonf ziuh yanh meenf huh giauh look vooi,
lai lengv-hunf Fatf-lif-saif dangh gee gi huf,
geef-loh tih Siangf-dif lutf fapf gee lauh see,
geef-loh nyunv uif zengv bov,
"Hauf-loh dekf meenf uk lengv-hunf neeh huf hee lai gai gee sook,
hhoo neengf lai tinf lai yif hangv ha tih lai hian seeh hemv geef gang go gua."
10 Neeh tif hoouh zengv meenf huh giauh hiamv vooi,
senv fu ziangh Loh-mah gun deeif huf hee mangf geef-loh dif iakf Boouh-lov voon fiangf vooi,
ziuh mingf lingf leekf bingv gee longf booiv geep Boouh-lov lokf da lengv-hunf gee uk miaf,
dai geen loouf vooi.
11 Neeh goomh hee,
Zu nyunv yoou ningf Boouh-lov bov,
"Meenf ngah mangf,
meef yoou Ye-luf-sa-leengh di leeuf hooi hauf huk gianf zingf,
yoou Loh-mah meef ya dif di leeuf hooi hauf huk gianf zingf."
Lengv-hunf Yiuh-haif gee tiang gooi haih Boouh-lov
12 Doongv veenf bangv vooi,
lengv-hunf Yiuh-haif gee hemv goonf tiang gooi haih Boouh-lov,
geef-loh fat tooih bov,
"Zeekf meenf ga Boouh-lov daiv,
hauf-loh ziuh gai gee duf meenf goonv."
13 Hongf goonf tiang gooi fatf tooih neeh mee gee lengv-hunf lai tee teepf lengf na.
14 Lengv-hunf neeh gee booiv div gif see ziangh hemv ziangh lauh gee,
bov,
"Hauf-loh duf ga hemv goonf fat tooih vooi,
bov zeekf meenf ga Boouh-lov daiv,
hauf-loh ziuh gai gee duf meenf goonv.
15 En teeif meef-loh hemv gung huif gee lengv-hunf hheem booiv hong zi senv fu ziangh,
yam geef dai Boouh-lov miaf,
zoongv gev dif laif-laih saf tooi Boouh-lov,
hauf-loh duf ga zunh bif maif vooi,
foou geef miaf doongv da sunv ziuh ga geef booiv."
16 Leekf booi Boouh-lov huf hee hingf huh gooi neeh mee vooi,
ziuh loouh buf deeif vooi seengv Boouh-lov.
17 Boouh-lov ziuh sing Loh-mah gun deeif gee baiv fu ziangh huf hee miaf,
bov,
"Sing meef yin leekf hauh tengv neeh huf hee booiv div senv fu ziangh,
geef lai teeh dif boouf goouf senv fu ziangh."
18 Baiv fu ziangh ziuh yin geef miaf doongv ningf senv fu ziangh vooi,
bov,
"Famf yinv Boouh-lov sing hauf booiv ningf geef neeh hhootf hee,
hhuf hauf yin leekf hauh tengv neeh huf hee miaf div meef,
bov geef lai teeh dif seengv meef."
19 Senv fu ziangh ziuh diuf lokf moof geef loouh,
yin geef booiv ningf vooi,
lookf-lookf tooi geef bov,
"Meef lai gai teeh dif seengv hauf?"
20 Geef tanv bov,
"Lengv-hunf Yiuh-haif gee duf ga hamf liangf maif vooi,
yam meef bak zeekf dai Boouh-lov booiv gung huif,
zoongv gev dif laif-laih saf tooi teeh geef gee.
21 Meef meenf ngah hingf go geef-loh gee,
eenv veeih geef-loh tee teepf lengf na foou yoou da sunv nenh,
hemv goonf duf ga fat tooih vooi,
bov zeekf meenf ga Boouh-lov daiv ziuh gai gee duf meenf goonv.
En teeif geef-loh duf ga zunh bif maif vooi,
nah foou meef hongf i nenh."
22 Senv fu ziangh ziuh zuk leekf hauh tengv neeh huf bov,
"Meenf ngah seengv vanh bov meef seengv teeh neeh gee zee hauf vooi."
Ziuh yam geef booiv vooi.
Gauv Boouh-lov sev zungh dukf
23 Senv fu ziangh ziuh yam baiv fu ziangh voon huf miaf,
bov,
"Zunh bif buf bing voon bek,
hhiv bing sit teepf gangf leekf bingv nganv siangv gee voon bek,
goomh nooih gu dem zungv booiv Gai-sav-lif-yav.
24 Ya hheem zunh bif maqf gi huf sev Boouh-lov hheeih,
hong geef fingf anv doongv ningf zungh dukf Feei-lif-si neeh hhootf hee."
25 Senv fu ziangh ziuh tia tin fungv hee bov,
26 "Geev-lauh-tiu Liv-si-yaf tooi zungh dukf Feei-lif-si daf yinv maif.
27 Lengv-hunf neeh huf hee bif lengv-hunf Yiuh-haif gee hoof loouh vooi,
zunh bif dif ga geef gee tif hoouh,
hauf huh geef tih lengv-hunf Loh-mah gee,
ziuh dai leekf bingv gee booiv go geef uk miaf.
28 Hauf dif tiang huh lengv-hunf Yiuh-haif gee veeih gai goou geef,
ziuh dai geef longf doongv geef-loh gee gung huif vooi.
29 Hauf saf huh geef-loh goou geef,
tih veeih geef-loh lutf fapf gee veenf hiv,
geef meenf lai famh gai gee gaiv lai daiv,
gaiv lai hoop gee soih.
30 Seeif looif lai lengv-hunf seengv hauf,
bov vanh tiang gooi dif ga geef,
hauf ziuh mah siangf hong geef booiv ningf meef,
ya mingf lingf lengv-hunf goou geef neeh gee booiv ningf meef goou geefc."
31 Leekf bingv gee ziuh ziuf senv fu ziangh gee mingf lingf booiv huk,
linf goomh hong Boouh-lov doongv An-tiv-faf-tiv vooi.
32 Haih ngeeih veenf leekf bingv hhiv ha gee ziuh leengv buf deeif vooi,
teengh hhiv bing gee gif zukf hong Boouh-lov booiv.
33 Hhiv bing gee doongv Gai-sav-lif-yav vooi,
ziuh gauv tin neeh fungv hee zee zungh dukf,
ya gauv Boouh-lov zee geef.
34 Zungh dukf dekf tin neeh fungv vooi,
ziuh tooi Boouh-lov tih leeuf mooqf seengh gee lengv-hunf,
geef huh Boouh-lov tih lengv-hunf Gi-lif-gia gee vooi,
35 ziuh bov,
"Foou lengv-hunf goou meef neeh gee miaf vooi,
hauf nah tim oon meef neeh mee."
Ziuh mingf lingf hoop Boouh-lov loouh fuh Hi-lutf mee vooi.