3 Haih ngeeih veenf doongv Si-dunf vooi,

Yiu-liuv doi Boouh-lov meenf huh giauh maif,

fi zunh geef booiv div feengf yu gee,

biang feengf yu geef gee hhoo yi sev goouh zee geef goonv da sunv.

4 Hauf-loh yuh lokf ninh hhooiv luaf booiv,

eenv veeih doou van,

ziuh lokf ningf Saif-fuh-luf-si doouh bangh van booiv.

5 Seeif looif hauf-loh gua ningf hai Gi-lif-gia gee,

ya gua ningf hai Foongv-feei-lif-yaf gee vooi,

miaf doongv bak lengv Liv-gia gee Meeiv-la vooi.

6 Baiv fu ziangh yoou ninh div heekf luaf Yaf-lif-san-daf hauv hee dif booiv If-daf-lif,

geef ziuh yam hauf-loh geen luaf neeh hauv hee vooi.

7 Luaf hauv hee booiv meenf huh giauh seeif,

booiv haih liauh veenf nah booiv doongv ningf Geev-niv-tuv.

Eenv veeih van haif nyoo meenf booiv lai vooi,

ziuh lokf ningf Hheef-lih-teef bangh van booiv,

lokf Sav-mov-niv doi minh gua.

8 Hauf-loh lokf ningf hhoom laif-laih booiv,

booiv aif booiv teef nah booiv doongv Zia-oouf,

Zia-oouf loof-loo heeuv La-si-yaf mee.

9 Hauf-loh ngoh tif ganv dunf hee vooi,

duf ga gua Ziatf gim goonv mee^a vooi,

luaf booiv ya nguiv hiamh,

Boouh-lov ziuh hhin hemv goonf bov,

10 "Meef-loh haf,

ziuf hauf dekf,

doouf-loh zeekf gif zukf booiv,

meenf danv tih hua gee hemv luaf gee faih,

linf doouf-loh duf dif daiv mingh."

11 Danf tih baiv fu ziangh huf hee nah siang sinf luaf zu hemv hhooiv luaf gee,

meenf siang sinf Boouh-lov gang gee.

12 Ya eenv veeih yoou bak ngav neeh mee gua fa nit meenf hhoo maif,

feenh liauh lengv-hunf duf bov lif hhooiv neeh hhootf hee booiv Feei-niv-gi vooi gua fa nit.

Feei-niv-gi tih Hheef-lih-teef gee bak ngav mee,

fiangf hee hiang tooiv noomf,

fiangf hee hiang tooiv beek.

13 Neeh tif hoouh siau leekf van noomf ziqf hee miaf vooi,

geef-loh yih vuiv hhoo yi anf gif huaf booiv vooi,

ziuh suv neng gee uif,

lokf ningf Hheef-lih-teef doouh booiv.

14 Danf tih luaf hauv hee booiv meenf giauh foong,

it ziu uk van dongv beek mee meenf huh giauh nyoo lokf baiv doouh neeh fiangf hee miaf.

15 Van gee haif nyoo vooi,

hauf-loh meenf hhungf lai zif luaf hauv hee on,

ziuh suf saih van tung luaf hauv hee booiv.

16 Tung doongv leekf doouh Goou-daf neeh hhootf hee vooi,

hauf-loh ziuh lokf ninh bangh van booiv,

hauf-loh hemv goonf leeh aif leeh teef nah leeh leekf feu hauv hee geen miaf.

17 Leeh leekf feu hauv hee geen miaf hoouh looif,

ziuh oouv lamh miaf gatf luaf nyoo hauv hee lokf dooi doongv bak inf-inv loouh vooi,

ya mangf luaf hauv hee dif yoou Saif-eev-tiv namf hhoom,

ziuh geq fongf gee longf miaf,

suf saih van tung luaf hauv hee booiv.

18 Haih ngeeih veenf van geengf nyoo vooi,

tung luaf hauv hee meenf ding lai on,

hemv goonf ziuh gengf hua baiv luaf gee longf dauf hai vooi.

19 Haih tamv veenf,

linf hhinv teeh baiv luaf gee geef-loh ya sin zeef gengf longf dauf hai vooi.

20 Haih liauh veenf meenf huh da veenf leekf saiv gee vooi,

van nyoo langh nyoo git luaf hauv hee,

neeh tif hoouh hauf-loh zung hhif bov meenf lai mingh yoou vooi.

21 Hemv goonf haih liauh veenf meenf goonv goouh vooi,

Boouh-lov ziuh nyunv yoou da geef-loh,

bov,

"Meef-loh haf,

zeekf meef-loh soof-soov hingf go hauf gee,

meenf lif hhooiv Hheef-lih-teef,

ziuh meenf am heekf zai neeh mee faih teenf nyoo.

22 Danf tih en teeif hauf hhin meef-loh biang timv,

lengv-hunf yoou nooih neeh gee meenf lai naf nee daiv mingh,

nah faih luaf hauv hee toof-too.

23 Eenv veeih hauf siang sinf gee neeh huf Siangf-dif,

goomh vaf faif hian seeh geef gee miaf,

nyunv yoou ningf hauf seengv hauf,

bov,

24 'Meenf ngah mangf,

Boouh-lov haf,

meef itf dingf dif nyunv yoou dau na voongf dooi;

Siangf-dif ya dif go too lai hemv meef hongf goonf yoou baiv luaf gee lengv-hunf.'

25 Too yi meef-loh hheem biang timv,

hauf siang sinf Siangf-dif di leeuf hemv hauf gang,

teeh gee ya dif di leeuf bin tingf titf.

26 Danf tih doouf-loh itf dingf namf geen doouh mee."

27 Doongv haih teepf ti veenf veenf yoop,

luaf hauv hee enf yoou da hai Yaf-teev-lih-yaf tuakf booiv tuakf leengv yoou.

Daf hhaif da hheenf gee tif hoouh,

leekf gongv baiv luaf gee hhif bov dif hhooiv doongv ningf hhoom vooi,

28 ziuh tee dekf namh lakf deen,

huh lai teepf ngeeih siangh yoou,

booiv leekf hheei hee ya tee fooif hemv,

huh nah teengh gu siangh toof-too.

29 Geef-loh mangf luaf hauv hee dif namf heekf dinf,

ziuh lokf tuq luaf gengf neng ti mooqf longf booiv,

zung hhuf veenf bangv meng ziqf.

30 Leekf gongv baiv luaf gee dif tiang deuf luat luaf neeh hauv hee,

ziuh zoongv gev dif lokf hau luaf gengf neng gee longf booiv,

naf huh geef-loh duf ga lookf-lookf biang leekf feu hauv hee longf hai vooi.

31 Boouh-lov bov baiv fu ziangh hemv leekf bingv gee bov,

"Lengv-hunf neeh gee zeekf meenf luf yoou baiv luaf,

ziuh meenf go lai mingh meef-loh vooi."

32 Leekf bingv gee ziuh damh lamh leekf feu gee hunh vooi,

suf saih geef tuakf booiv.

33 Lokf neeh tif hoouh zi doongv veenf dif bangv,

Boouh-lov zung hhin hemv goonf goonv goouh,

bov,

"Meef-loh duf ga timv hhuangf dam luanh meenf goonv goouh teepf ti veenf vooi.

34 En teeif hauf hhin meef-loh hheem goonv goouh ziqf loouh,

hau lai lingf gian sih longf booiv,

eenv veeih fuiv meef-loh gee duf meenf lai hiuf loomh."

35 Boouh-lov gang go neeh gee vooi,

ziuh nganv bing mee uif,

yoou dau na hemv goonf gamh siaf Siangf-dif vooi,

ziuh loot miaf goonv.

36 Hemv goonf zung biang timv vooi,

ya goonv goouh vooi.

37 Hauf-loh yoou baiv luaf inf-inv lai ngih bek sit teepf sok na lengv-hunf.

38 Hemv goonf goonv geemf hoouh looif,

ziuh gengf liangv sikf gee longf dauf hai vooi,

hau biang luaf hauv hee hhoo ziqf.

39 Veenf bangv vooi,

geef-loh huh lai hhoom fef hee uanf-uanh hhoo yi geen booiv,

danf tih meenf took lengv neeh hhootf hee yam di leeuf hee,

geef-loh ziuh tiang ban fap dekf di leeuf ngoouf luaf hauv hee doongv ningf hhoom.

40 Ziuh damh lamh neng gee hunh vooi,

gengf neng gee loouh da hai vooi,

ya geq dakf hah gengv gee duangh vooi,

leeh fongf baiv hau gee uif miaf,

biang van tung luaf hauv hee booiv ningf hhoom.

41 Danf tih luaf hauv hee meenf doongv ningf hhoom yoou,

duf ga namf heekf tangv vooi,

hau luaf mee namf onf-on meenf noov lai ziqf-ziqf,

langh ziuh git tuq luaf mee faih vooi.

42 Leekf bingv gee mangf famf yinv gee dif yoop namh deuf,

ziuh tiang ga famf yinv gee booiv.

43 Danf tih baiv fu ziangh dif go Boouh-lov,

ziuh meenf zun geef-loh teenf huk,

yam neef took yuf namh neeh gee taq longf booiv,

sian yuf geen hhoom;

44 teengh longf neeh gee lai feenh hee gut ben,

lai feenh hee gut goouh baiv luaf gee tuakf geen hhoom.

Teenf hee,

naf nee duf fingf anv geen hhoom vooi.