Yev-so yiav lengv-hunf moof faih huf hee
3
1 Yev-so yuh loouh huif hangv vooi,
yoou ninh lai lengv-hunf huf hee,
moof geef fiangf hee faih vooi.
2 Hemv goonf heei Yev-so,
dekf geef yoou An-sikf-veenf,
yiav meenf yiav lengv-hunf neeh huf hee,
hau ziu tuq booiv goou geef.
3 Yev-so yam lengv-hunf moof faih neeh huf hee,
bov,
"Uif miaf,
nyunv zing da vooi."
4 Geef yuh tooi hemv goonf bov,
"An-sikf-veenf hhoo yi huk leeuf zuangv nif?
Huk maif ha tih huk seeu,
go mingh ha tih haih mingh?"
Hemv goonf zung meen vooi.
5 Yev-so vook lengv-hunf yoou ninh neeh gee hoouf-hoou,
eenv veeih i geef-loh gee luaq,
geef meenf huh giauh hheei hhif,
timv geef mee meenf huh giauh ngaif tuh.
Geef ziuh bov lengv-hunf moof faih neeh huf hee bov,
"Nyof moof meef fiangf hee uk miaf!"
Geef giangf nyof moof,
moof fiangf hee ziuh maif leengv vooi.
6 Lengv-hunf Fatf-lif-saif dangh gee uk booiv,
mah siangf hemv lengv-hunf Hi-lutf dangh gee hamf liangf,
di leeuf moot Yev-so booiv.
Lengv-hunf dunf hee hemf moh Yev-so
7 Yev-so hemv meenv huv geef gee hoi booiv ningf hoomf vooi,
lai lengv-hunf dunf hee lokf Gia-lif-lif miaf hemf moh geef.
8 Ya lai lengv-hunf dunf hee hingf huh Yev-so huk itf siatf gee teeh vooi,
ziuh lokf Yiuh-haif,
Ye-luf-sa-leengh,
Yih-tuv-maiv,
hemv lengv Ye-danf-hoov fiangf ningh hhoom gee,
gangf bak lengv Tui-lov,
Si-dunf neeh gee miaf ningf geef neeh hhootf hee.
9 Eenv veeih lengv-hunf gee haif liauh vooi,
Yev-so ziuh yam meenv huv gee hooi geef zunh bif leekf feu hauv hee,
ha zinf lengv-hunf gee otf geef.
10 Eenv veeih geef yiav haih liauh lengv-hunf maif vooi,
lengv-hunf fingh gee ziuh suanv buf otf gua miaf dif gamf geef.
11 Yif hangv gee leeuf fooif huh Yev-so,
duf biang lengv-hunf geef geen huf neeh huf hee hhupf yoou dau na geef,
sauv lookf-lookf yanh bov,
"Meef tih Leekf-da-hhiangh Siangf-dif huf hee!"
12 Yev-so ngiamf-ngiamf teenf hee gingh goouf geef-loh,
meenf zun seengv vanh geef tih naf nee.
Yev-so lipf teepf ngeeih na seeh huv
13 Yev-so geen tiah vooi,
yam lengv-hunf geef liakf neeh gee miaf ningf geef,
geef-loh ziuh miaf vooi.
14 Geef ziuh liakf teepf ngeeih na uk miaf,
lipf geef-loh huk seeh huv,
yam geef-loh siangf-siangf hemv geef yoou ningf goonf,
ya dif faif geef-loh uk booiv suanf Go Siangf-dif gee,
15 ya sev hhinf zee geef-loh voouf yif hangv.
16 Yev-so liakf gee neeh teepf ngeeih na lengv-hunf lai:
Si-meenv,
Yev-so yuh hhooiv geef yam Bih-deekf hee;
17 ya lai Si-bif-haif gee leekf da hhiangh --- Yav-gookf hemv tok Yav-gookf huf hee Ye-hanf,
Yev-so yuh hhooiv geef-loh yam Banf-niv-ziv,
if see tih leekf da hhiangh loif gee;
18 ya lai An-deekf-liatf,
Feei-lif,
Ba-to-loh-maiv,
Mah-haif,
To-mah,
leekf da hhiangh Yav-leekf-feei huf hee Yav-gookf hemv Tav-haif,
gangf Feenf-yuif dangh gee Si-meenv;
19 ya lai ing Yev-so gee Yiuh-daf Gia-liatf hemv.
Yev-so hemv Bev-si-fuh
20 Yev-so leengv doongv lanf,
lengv-hunf dunf hee yuh vif miaf vooi,
Yev-so hemv meenv huv geef gee linf fiah duf meenf lai huanv hau goonv.
21 Gav lanf Yev-so gee lengv-hunf,
hingf huh teeh neeh hhinh vooi,
ziuh uk miaf leeh geef,
eenv veeih geef-loh bov geef denv vooi.
22 Siangf-dif lutf fapf gee lauh see lokf Ye-luf-sa-leengh longf miaf neeh gee,
bov,
"Bev-si-fuh geen huf geef vooi."
Geef-loh ya bov,
"Geef tih hhoouf voongf yif hangv miaf voouf yif hangv gee."
23 Yev-so ziuh yam geef-loh miaf,
hemv geef-loh gang bih yif bov,
"Sav-danf dif voouf lai geef toof-too uk haf?a
24 Gok gav mee zeekf toof-too git goonf,
ziuh meenf nyunv lai on;
25 gav lanf mee zeekf git goonf lokf lanf,
ziuh dif faih.
26 Sav-danf zeekf toof-too git goonf,
ziuh meenf nyunv lai on,
ya itf dingf miatf voongv.
27 Meenf lai naf nee loouh lai lanf bef hhianh huf hee vooi geep goouh geef gee,
suv feei sian gatf geef loouh,
nah geep lai goouh da lanf geef gee.
28 Hauf titf-titf seengv meef-loh,
lengv-hunf famh itf siatf gee soih,
hemv gang itf siatf gee go seeu,
zung min lai soih geef gee booiv;
29 danf tih lengv-hunf famh Seengf-lingv gee,
yungh yuanh meenf min lai soih neeh gee booiv,
geef gi tif duf hap soih neeh gee yoou."
30 Yev-so teenf gang,
tih eenv veeih geef-loh bov,
"Yif hangv geen huf geef vooi."
Naf nee tih Yev-so gee maih lai hemv engv tok?
31 Neeh tif hoouh,
maih lai Yev-so huf hee hemv tok geef gee miaf vooi,
nyunv yoou uk ninh,
yam lengv-hunf loouh booiv yam geef uk miaf.
32 Lai lengv-hunf dunf hee vif ngov yoou ningf Yev-so,
geef-loh seengv geef bov,
"Noh,
ma moh hemv tok meef gee yoou uk ninh div meef noh!"
33 Yev-so bov geef-loh,
"Naf nee tih maih lai hauf gee,
engv tok hauf gee?"