6 Geef looif-looiv dekf huh Yev-so,

ziuh deuf gua booiv hhuih longf bai geef,

7-8 Yev-so ziuh mingf lingf yif hangv baiv huf geef neeh huf hee bov,

"Yif hangv meef neeh huf hee!

Lokf huf geef uk miaf!"

Yif hangv ziuh sauv lookf-look yanh,

"Zuif nyoo Siangf-dif gee Leekf-da-hhiangh Yev-so haf!

Hauf hemv meef lai gai gee guan hif?

Hauf yoou dau na Siangf-dif hhuf meef,

meenf ngah sih hauf."

9 Yev-so ziuh tooi geef bov,

"Meef yam gai nooiv hee?"

Geef tanv,

"Hauf yam 'Hoouf' hee,

eenv veeih hauf-loh hheekf see liauh."

10 Geef ziuh iangv Yev-so,

iangv booiv iangv leengv,

iangv Yev-so meenf ngah voouf geef-loh luat lengv neeh hhootf hee.

11 Neeh tif hoouh,

lai mov hoouf hee yoou baiv hhunf,

ningf geef-loh neeh hhootf hee goonv goouh.

12 Yif hangv ziuh iangv Yev-so bov,

"Hhuf meef biang hauf-loh loouh da mov neeh hoouf vooi,

geen huf geef-loh."

13 Yev-so hheeng vooi,

yif hangv hoouf hee ziuh uk miaf loouh da mov hoouf vooi.

Mov neeh hoouf hee ziuh ong longf hhoom tiah,

dok loouh da hoomf mutf daiv vooi.

Mov neeh hoouf hee daf hhaif lai voon senv huf.

14 Lengv-hunf tiangh mov neeh gee ziuh deuf vooi,

deuf booiv seengv teeh neeh gee zee lengv-hunf da heeuv gee hemv da voo gee.

Lengv-hunf gee zung miaf dif dekf fatf seeng gai gee teeh vooi.

15 Geef-loh doongv ningf Yev-so,

dekf huh lengv-hunf yif hangv geen huf neeh huf hee,

ziuh tih gua na bif yif hangv hoouf hee geen huf gee neeh huf hee,

zingf siangv vooi,

dingv hho yua maif-maif ngov yoou ninh,

geef-loh ziuh mangf.

16 Sinv dav dekf huh teeh neeh hhinh gee lengv-hunf,

ziuh seengv lengv-hunf yif hangv geen huf neeh huf am heekf gee teeh,

hemv mov neeh hoouf gee teeh zee hemv goonf.

17 Hemv goonf ziuh hhuf Yev-so luat lengv geef-loh gee.

18 Yev-so geen luaf gee tif hoouh,

lengv-hunf gua na bif yif hangv geen huf gee neeh huf hee,

hhuf Yev-so biang geef hemf moh booiv.

19 Danf tih Yev-so meenf hheeng,

ziuh bov geef,

"Meef leengv lanf lo,

seengv gav lanf meef gee hemv feengf yu meef gee,

Zu di leeuf dookf meef,

hooi meef huk meenf huh giauh nyoo gee teeh vooi."

20 Lengv-hunf neeh huf hee ziuh booiv vooi,

hhai sih yoou Tiv-zia-bo-lif suanf Yev-so hooi geef huk meenf huh giauh nyoo gee teeh vooi,

too lai gee lengv-hunf hingf vooi zung hhiv guaif.

21 Yev-so yuh ngov luaf doongv fiangf ninh hhoom vooi,

geef enf yoou ningf hoomf yoou,

lai lengv-hunf dunf hee miaf vif geef.

22 Lai lengv-hunf guanh huif hangv huf hee,

nooiv yam Yav-luv,

geef ya miaf vooi,

geef it huh Yev-so,

ziuh hhuih longf hhupf yoou na gok Yev-so,

23 gukf lingf hhuf geef bov,

"Leemf leekf neef nook hauf huf hee,

dif hhooiv daiv vooi,

hhuf meef booiv zav moof geen baiv huf geef vooi,

yiav geef go mingh geef."

24 Yev-so ziuh di moh geef booiv.

Lai lengv-hunf hoouf hee meenf huh giauh liauh,

ya hemf moh booiv,

zung otf yoou ningf Yev-so.

25 Lai maih leekf huf hee lai fingh diaqf baq teepf ngeeih veeif vooi,

26 geef dekf haih liauh i seeng gua,

yiav meenf heekf fingh,

yiav nanf vif inv vooi,

ya yiav sinf liang vooi,

zung meenf yiav lai maif,

fingh gee ya geengf hhoonv vooi.

27-28 Geef hingf huh teeh Yev-so gee vooi,

geef toof-too timv tiang,

"Hauf zeekf gamf heekf yua geef hiuf hee,

fingh hauf gee ziuh itf dingf maif."

Geef ziuh otf loouh da lengv-hunf hoouf hee vooi,

lokf looif gamf yua Yev-so hiuf hee.

29 Baq geef gee it ziu ziuh on vooi,

huf geef mee suh saih vooi,

geef ziuh huh fingh geef gee maif vooi.

30 Yev-so it ziu ziuh huh,

lai yiav fingh gee neengv likf lokf huf geef uk booiv,

geef ziuh yoou da lengv-hunf hoouf hee,

len looif leengv miaf,

bov,

"Naf nee gamf yua hauf hiuf hee?"

31 Meenv huv gee tanv geef,

bov,

"Meef dekf,

teenf liauh lengv-hunf otf meef,

ya dif tooi naf nee gamf meef yoou?"

32 Danf tih Yev-so ya yo hemv goonf hoouf hoou,

dif dekf tih naf nee gamf geef.

33 Maih leekf neeh huf hee huh yoou baiv huf geef fatf seeng gai gee vooi,

ziuh mangf nyan duakh-duakh teenf hee,

miaf hhupf yoou dau na Yev-so,

oouv teeh neeh gee inf-inv it ngoh it teepf seengv zee Yev-so vooi.

34 Yev-so bov geef,

"Leemf leekf haf!

Sinf sim meef mee yiav fingh meef gee maif vooi,

biang timv leengv booiv lo,

fingh meef gee maif vooi."

35 Yev-so enf gang go yoou,

lai lengv-hunf lokf lanf bef guanh huif hangv neeh huf hee miaf,

bov,

"Leemf leekf meef huf hee ga daiv vooi,

mah fanh lauh see huk gai yoou?"

36 Yev-so hingf heekf go neeh gee,

ziuh bov bef guanh huif hangv huf hee bov,

"Meenf ngah mangf,

meef na guf siang sinf ziuh maif vooi."

37 Yev-so ziuh yin Bih-deekf,

Yav-gookf hemv tok Yav-gookf huf hee Ye-hanf hongf goonf booiv,

meenf sev hhiv ha gee lengv-hunf di moh.

38 Geef-loh doongv lanf bef guanh huif hangv neeh huf vooi,

Yev-so dekf huh yoou ninh luanh vinv vooi,

lengv-hunf gee zung ngai oo oo teenf hee.

39 Yev-so ziuh loouh booiv bov geef-loh,

"Meef-loh ngai gai gee?

Luanh gai gee?

Leekf huf hee meenf daiv yoou,

geef suanv vooi."

40 Geef-loh ziuh hemv goonf liauv Yev-so.

Yev-so voouf hemv goonf uk booiv vooi,

nah teengh leemf leekf gee bef maih lai hemv meenv huv geef tamv huf,

hongf moh geef loouh da foongf leemf leekf lap lap neeh mee vooi,

41 geef diuf lokf moof leemf leekf huf hee loouh,

yam geef bov,

"Daf lif daf,

guh miv!"

(If see tih leemf leekf haf!

Hauf yam meef uif miaf!)

42 Leemf leekf neeh huf hee,

ziuh mah siangf uif miaf booiv sunv --- dang siv leemf leekf neeh huf hee duf ga teepf ngeeih tui vooi,

teeh neeh hhinh hee tee hemv goonf zung ngeeq on vooi.

43 Yev-so deekf biatf zuk geef-loh,

meenf ngah seengv teeh neeh hhinh hee zee vanh,

ya yam oouv goouh sev leemf leekf huf hee goonv.