"Naf nee biang lengv-hunf neeh huf hee teenf heen vooi?

Geef di leeuf zuh nyaif teenf hee?

Geef daf took huk meenf fingf tiangf gee teeh!

3 Geef meenf tih bef gongv mokf huf hee haf?

Meenf tih leekf da hhiangh Mah-lif-a huf hee haf?

Meenf tih gof Yav-gookf,

gof Ye-si,

gof Yiuh-daf,

gof Si-meenv huf hee haf?

Gov geef hoouf hee meenf tih ya yoou doouf-loh neeh hhootf haf?"

Geef-loh ziuh aif geef.

4 Yev-so bov geef-loh,

"Sian zi seef lengv-hunf lauh gia geef gee,

gok ziv geef gee,

gav lanf geef gee vooi,

meenf lai naf nee meenf ging geef gee."

5 Guf seeh Yev-so yoou ninh meenf huk lai meenf fingf tiangf gee teeh,

nah zav moof geen baiv huf lengv-hunf fingh gi huf,

yiav geef-loh maif toof-too.

6 Lengv-hunf neeh hoouf hee meenf siang sinf,

Yev-so ziuh hhiv guaif.

Yev-so booiv voo loof-loo ningf neeh gee maiv lengv-hunf.

7 Geef yam seeh huv geef teepf ngeeih huf miaf,

faif geef-loh voon na voon na teenf hee uk booiv,

ya sev hhinf voouf yif hangv gee zee geef-loh.

8 Zuk geef-loh bov,

"Seef heengh zuk hiuf hee vooi,

yoou da sunv gai gee duf meenf ngah dai booiv,

meenf ngah dai goouh goonv,

meenf ngah dai hooih,

meenf ngah dai sinf;

9 dingv haif deei hee hemv hho yua deei hee,

ziuh maif vooi."

10 Geef yuh zuk geef-loh bov,

"Meenf guan meef-loh booiv doongv leeuf,

loouh lanf naf nee mee zih,

ziuh hheem zih yoou ninh zi doongv meef-loh booiv.

11 Meenf guan meef-loh booiv doongv leeuf,

lengv-hunf yoou ninh gee zeekf meenf ziapf daif meef-loh,

ya meenf hingf meef-loh gang,

meef-loh dif booiv gee tif hoouh,

hheem sam bongf gangf yoou baiv gok neeh gee booiv,

biauh sif gingh goouf geef-loh,

Siangf-dif dif simh fuanf geef-loh."

12 Seeh huv gee ziuh uk booiv suanf Go Siangf-dif gee,

hhin lengv-hunf gee huiv gaih;

13 geef-loh ya voouf haih liauh yif hangv uk vooi,

ya oouv yuf miaf sitf haih liauh lai fingh gee lengv-hunf,

yiav geef-loh maif vooi.

14 Nooiv Yev-so mee suanf look vooi,

linf Hi-lutf voongv duf huh vooi.

Lai lengv-hunf feenh hee bov,

"Hooi lengv-hunf tuk leei gee Ye-hanf ya tingf leengv vooi,

guf seeh geef nah lai neengv likf huk meenf fingf tiangf gee teeh."

15 Ya lai feenh hee bov,

"Geef tih sian zi Yih-lif-yav."

Ya lai feenh hee bov,

"Geef tih sian zi,

zing gua na gee sian zi huf hee teenf hee."

16 Hi-lutf hingf huh vooi,

ziuh bov,

"Tih Ye-hanf,

hauf damh hau gee neeh huf hee,

ya tingf leengv vooi."

17 Gua na Hi-lutf mingf lingf vanh hoof Ye-hanf,

gatf geef loouh,

hoop da gamv vooi.

Hi-lutf dif teenf huk tih eenv veeih Si-lov-tih,

Si-lov-tih tih maih tok geef huf hee Feeiv-lif gee,

danf tih Hi-lutf oouv geef huk maih vooi.

18 Ye-hanf ziuh bov geef haih liauh fooif vooi,

Ye-hanf bov,

"Meef oouv maih tok meef huf hee vuih famh lutf fapf vooi."

19 Si-lov-tih ziuh zookf Ye-hanf loouh timv vooi,

geef tiang ga Ye-hanf,

danf tih meenf ga lai heekf.

20 Eenv veeih Hi-lutf ging Ye-hanf,

huh Ye-hanf tih ngif yinv huf hee,

tih seengf giatf gee,

ziuh boouh huf geef,

tuif yianf Ye-hanf gang gee,

Hi-lutf hingf meenf took,

timv mee ya meenf suh saih,

danf tih geef ya ooi hingf.

21 Lai veenf hee Si-lov-tih am heekf maif gi huif vooi.

Neeh veenf hee,

Hi-lutf tengv ngitf,

ziuh huk nyan sing hak nyoo hoouf hee,

hemv senv fu ziangh gee gangf hau Gia-lif-lif gee.

22 Leemf leekf Si-lov-tih huf hee loouh miaf hiauf moou,

biang Hi-lutf hemv moov geef hoouf hee meenf huh giauh eengv.

Hi-lutf ziuh bov leemf leekf neeh huf hee,

"Meenf guan meef tiang oouv gai gee,

meef seengv hauf,

hauf zung oouv meef."

23 Hi-lutf yuh hemv geef fat tooih bov,

"Meenf guan meef hhuf hauf oouv gai gee,

ziuh tih gok gav hauf gee fiangf hee,

hauf ya oouv sev meef."

24 Leemf leekf neeh huf hee ziuh uk booiv tooi maih lai geef huf hee,

bov,

"Hauf oouv gai gee maif nif?"

Maih lai geef bov,

"Oouv hau Ye-hanf mee,

ziuh tih hooi vanh tuk leei gee neeh huf Ye-hanf."

25 Geef ziuh gan hhuanf leengv doongv ningf Hi-lutf vooi,

hhuf geef bov,

"Hhuf meef mah siangf oouv hau Ye-hanf mee biang loouh da fanf vooi sev hauf,

ziuh tih hooi lengv-hunf tuk leei gee neeh huf Ye-hanf."

26 Hi-lutf meenf huh giauh nyung nyang,

danf tih geef duf ga doi na moov hoouf hee fat tooih vooi,

meenf hoif lai huah leemf leekf neeh huf hee.

27 Hi-lutf ziuh mah siangf faif gingh vuif huf hee booiv oouv hau Ye-hanf mee miaf.

Gingh vuif neeh huf hee ziuh loouh gamv zam hau Ye-hanf mee vooi,

28 biang hau mee loouh da fanf vooi,

dooh miaf sev leemf leekf neeh huf hee,

leemf leekf neeh huf hee ziuh dooh sev maih lai geef vooi.

29 Meenv huv Ye-hanf gee hingf huh vooi,

ziuh miaf oouv tiv Ye-hanf mee booiv,

bok loouh da feenf vooi.

30 Seeh huv gee leengv miaf vooi,

hemv goonf zung vif yoou ningf Yev-so,

oouv geef-loh yoou uk ninh huk gee hemv maiv gee,

seengv inf-inv zee Yev-so.

31 Yev-so ziuh bov geef-loh,

"Miaf!

Meef-loh gi huf di moh hauf booiv da loouh vooi hiu sikf ziu."

Eenv veeih lengv-hunf gee uk-uk loouh-loouh haif liauh vooi,

geef-loh linf fiah duf meenf lai huanv hau goonv.

32 Geef-loh ziuh ngov luaf lookf lookf booiv da loouh vooi.

33 Hemv goonf dekf huh geef-loh booiv vooi,

lai haih liauh took geef-loh gee,

ziuh lokf gookf mooqf heeuv booiv sunv booiv,

hemv goonf deuf booiv ninh,

ya doongv meng gua na geef-loh.

34 Yev-so giangf longf luaf,

dekf huh lengv-hunf dunf hee,

geef ziuh dookf hungh geef-loh,

eenv veeih geef-loh zing tuangf hoouf hee meenf lai lengv-hunf tiangh teenf hee,

Yev-so ziuh maiv haih liauh teeh zee geef-loh.

35 Da veenf dif dok vooi,

meenv huv gee ziuh miaf hemv Yev-so gang bov,

"Yoou nooih tih da loouh,

veenf dif yoop vooi,

36 yam hemv goonf tan booiv lo,

biang geef-loh toof-too booiv ningf voo loof-loo gee vooi vianv goouh goonv."

37 Danf tih Yev-so bov,

"Meef-loh sev geef-loh goonv lo!"

Meenv huv gee bov,

"Yam hauf-loh oouv voon bek mooqf ngoonf fiakf^a booiv vianv bing,

sev geef-loh goonv haf?"

38 Yev-so bov,

"Meef-loh booiv dekf,

lai bing giauh liauh?"

Meenv huv gee booiv heengf vooi,

leengv miaf bov,

"Lai bing nga mooqf,

bav voon huf."

39 Yev-so dooh meenv huv gee,

yam hemv goonf feenv di zo-zo ngov baiv boot vooi.

40 Hemv goonf ziuh di zo-zo ngov longf vooi,

lai it bek na di zo gee,

ya lai ngoh teepf na di zo gee.

41 Yev-so ziuh nganv bing neeh nga mooqf hemv bav neeh voon huf uif,

doongf hau vook fa mee gamh siaf Siangf-dif vooi.

Yev-so ziuh loot bing neeh gee vooi,

beu sev meenv huv gee,

feenv zee hemv goonf goonv,

geef ya hongf yiangh feenv bav neeh voon huf zee hemv goonf goonv.

42 Hemv goonf zung goonv,

ya goonv geemf-geemf vooi.

43 Meenv huv gee ziuh suv lengf bing lengf bav gee uif,

deengf hhiangv teepf ngeeih mooqf dikf-dik vooi.

44 Yoou ninh goonv bing gee lengv-hunf,

danf-danv da hhiangh duf lai ngoh senv na.

45 Teeh neeh hhinh hoouh looif,

Yev-so ziuh mah siangf soiv meenv huv gee geen luaf,

yam geef-loh sian booiv fiangf ninh hhoom gee Bokf-saif-daf vooi,

foou geef yam hemv goonf tan booiv.

46 Hemv goonf tan booiv hoouh looif,

Yev-so ziuh toof-too geen baiv tiah vooi doouh goouf.

47 Veenf yoop vooi,

luaf meenv huv hauv hee yoou daf-da hoomf,

Yev-so enf toof-too yoou baiv hhoom yoou,

48 geef dekf huh meenv huv gee doou van ngoouf luaf,

meenf huh giauh hheem lingf.

Daf hhaif da hheenf tamv dem,

Yev-so lokf bak namh booiv ningf meenv huv gee,

tiang lokf ningf geef-loh gua.

49 Danf tih meenv huv gee dekf huh geef booiv yoou bak namh,

hhif bov geef tih yif hangv,

ziuh yanh uif miaf.

50 Geef-loh zung dekf huh geef vooi,

hemv goonf zung mangf honf tan vooi.

Yev-so ziuh gan hhuangf yam geef-loh,

bov,

"Meenf ngah mangf!

Tih hauf!

Meef-loh biang timv."

51 Yev-so ziuh geen luaf hemv geef-loh yoou ningf goonf,

van gee ziuh on vooi.

Geef-loh zung ngeeq on vooi.

52 Eenv veeih i geef-loh gee luat,

meenf ooi tiang feenv bing neeh hhinh teeh.

53 Geef-loh gua hoomf mee vooi,

ziuh yoou lengv Geev-niv-sa-leeqf gee hengf luaf vooi,

54 geef-loh giangf longf luaf,

lengv-hunf gee ziuh mah siangf nginh uk Yev-so vooi,

55 ziuh deuf bak lengv neeh hhootf hoouf-hoou vooi,

hingf huh Yev-so yoou leeuf,

ziuh oouv gum hamv lengv-hunf fingh gee doongv leeuf.

56 Meenf guan Yev-so booiv doongv leeuf,

yoou da heeuv,

ha tih yoou da hinh da voo,

hemv goonf zung hamv lengv-hunf fingh gee biang da gaiv vooi,

hhuf Yev-so sev lengv-hunf fingh gee gamf gook yua geef hiuf hee ziu,

neef gamf heekf neeh gee fingh gee zung maif vooi.