Mingf lingf Siangf-dif gee nyoo gua guiv leei
7
1 Lai veenf hee,
lai lengv-hunf Fatf-lif-saif dangh gi huf,
hemv Siangf-dif lutf fapf gee lauh see gi huf,
lokf Ye-luf-sa-leengh miaf div Yev-so.
2 Geef-loh dekf huh meenv huv Yev-so gee,
lai feenh hee meenf ziuf neef lauh gee guiv leei tuk moof,
ziuh goonv fiah.
3 (Eenv veeih lengv-hunf Fatf-lif-saif dangh gee,
hemv too lai gee Yiuh-haif lengv-hunf,
zung ziuf neef lauh gee guiv leei,
zeekf meenf tuk moof ziuh meenf goonv goouh;
4 booiv heeuv leengv miaf,
zeekf meenf tuk toof-too bang ya meenf goonv goouh,
geef-loh ya zun siuh haih liauh neef lauh gee guiv leei yoou,
zing tuk zungv,
tuk fengf,
tuk eng hemv tuk goouh hhiv ha gee.)
5 Lengv-hunf Fatf-lif-saif dangh gi huf,
hemv Siangf-dif lutf fapf gee lauh see gi huf,
ziuh bov Yev-so,
"Meenv huv meef gee di leeuf meenf zun siuh neef lauh gee guiv leei,
meenf tuk moof ziuh goonv fiah nif?"
6 Yev-so bov,
"Sian zi Yih-saif-yav gua na gang doongv gev maif meef neeh hoouf hee,
ziqf duf meenf sook.
Geef yoou da ging veenv tia,
'Lengv-hunf neeh gee bak mee ging hauf,
danf tih timv mee meenf huh booiv leeuf vooi.
7 Geef-loh oouv lengv-hunf dingf gee guiv leei,
miaf huk hoouh li maiv lengv-hunf,
teenf hee geef-loh bai hauf ya meenf lai yungh.'
8 Meef-loh daf suif Siangf-dif gee mingf lingf vooi,
deuf booiv zun siuh lengv-hunf gee guiv leei."
9 Yev-so yuh bov geef-loh,
"Meef-loh nyaif ho,
zun siuh toof-too gee guiv leei,
ziuh tiang gooi suif Siangf-dif gee mingf lingf booiv vooi.
10 Mov-si bov,
'Hheem hiauf bef maih,
tiangh bef maih,
' yuh bov,
'An bef maih siuf hof bef maih gee,
hheem oouv mingh geef booiv.'
11 Danf tih meef-loh bov,
'Lengv-hunf zeekf hemv bef maih gang,
hauf duf ga oouv sinf oouv goouh tiangh meef-loh neeh gee,
hianf sev Siangf-dif vooi.'
12 Teenf hee meef-loh ziuh meenf sev geef tiangh bef maih fooif hemv vooi.
13 Meef-loh ziuh tih teenf hee zef hoouh guiv leei,
suif go Siangf-dif gee booiv vooi.
Teeh neeh gee meef-loh meenf huh huk giauh liauh hemv yoou."
14 Yev-so yuh yam hemv goonf miaf ningf geef vooi,
geef ziuh bov,
"Meef-loh naf nee duf hheem hingf go hauf gee loouh,
ya hheem took hauf gang gai gee.
15 Goouh lokf uk ninh loouh booiv gee,
meenf huk lai lengv-hunf zeq,
goouh lokf da ninh uk miaf gee,
nah huk lai lengv-hunf zeq.
16 Lai sav hingf gee,
ziuh hheem hingf loouha!"
17 Yev-so lif hhooiv hemv goonf loouh da lanf vooi,
meenv huv gee ziuh miaf tooi geef bih yif neeh mee tih gai gee if see.
18 Yev-so bov geef-loh,
"Meef-loh di leeuf ya meenf took?
Meef-loh meenf huh lokf uk ninh loouh booiv gee,
meenf huk lai lengv-hunf zeq haf?
19 Eenv veeih lokf uk ninh loouh booiv neeh gee,
meenf tih loouh da timv lengv-hunf,
tih loouh da boqf lengv-hunf vooi,
ya ev uk miaf vooi.
Teenf hee tih bov,
goouh goonv gee leeuf zuangv duf bang."
20 Yev-so yuh bov,
"Lokf da lengv-hunf uk miaf gee,
nah huk lai lengv-hunf zeq,
21 eenv veeih see siangh seeu gee zung tih lokf da ninh,
ziuh tih lokf da timv lengv-hunf uk miaf gee,
zing goh suif finh beeng goonf hemv goonf lap,
lookf goouh,
meeuv satf,
22 lai bef booiv beeng bef,
lai maih booiv beeng maih,
timv ham,
ook seeu,
tuat vanh zaf vanh,
hiaf liuv,
timv seeu,
zooh tiv hookf haih,
gev nyoo gev guiv,
noouh faih;
23 neeh itf siatf gee teeh seeu,
zung tih lokf da lengv-hunf uk miaf gee,
teeh seeu neeh gee nah huk lai lengv-hunf zeq."
Maih Sif-lif-a huf hee lai sinf sim
24 Yev-so lokf ninh booiv bak lengv Tui-lov hemv Si-dunf gee vooi.
Geef loouh da lanf mee vooi,
meenf tiang biang lengv-hunf huh geef yoou ninh,
danf tih ya meenf me lai on.
25-26 Dang siv lai maih gang go Si-laf huf hee,
geef lai yoou Sif-lif-a,
tih Feei-niv-gi zukf gee.
Leemf leekf neef nook geef huf hee,
bif yif hangv geen huf vooi,
geef giangf hingf huh Yev-so gee teeh,
ziuh mah siangf booiv hhupf yoou na gok Yev-so,
hhuf Yev-so hooi leemf leekf geef huf hee,
voouf yif hangv uk booiv.
27 Yev-so yungh bih yif hemv geef gang,
"Hheem biang leekf gee goonv goomf env,
fengf goouh goonv leekf gee zee mav goonv tih meenf heekf geeb."
28 Maih neeh huf hee bov,
"Zu haf!
Meef gang heekf nenh,
danf tih mav gee yoou dauf hooif,
ya humv lengf goouh leekf goonv dok neeh gee miaf goonv."
29 Yev-so bov geef,
"Meef gang gee heekf,
meef leengv booiv lo,
yif hangv duf ga lokf huf leemf leekf meef huf hee,
uk miaf vooi."
30 Geef leengv doongv lanf,
dekf huh leekf huf hee lap yoou baiv dangf,
yif hangv duf ga uk booiv vooi.
Yev-so yiav lengv-hunf yuh makf yuh gaf lak huf hee
31 Yev-so yuh lif hhooiv bak lengv Tui-lov gee,
gua Si-dunf vooi,
miaf doongv bak lengv Tiv-zia-bo-lif gee Gia-lif-lif hoomf.
32 Lai lengv-hunf yin lengv-hunf yuh makf yuh gaf lak huf hee miaf div Yev-so,
hhuf Yev-so zav moof geen baiv huf geef,
hooi geef doouh goouf.
33 Yev-so ziuh yin geef lokf da lengv-hunf hoouf hee uk miaf,
booiv gakf hhootf vooi,
nyof leekf moof loouh soongh sav geef,
ya taiv namh meeif sitf loouh linh geef mee vooi.
34 Yev-so yuh doongf hau vook fa,
zangf ziu hee vooi,
ziuh hemv lengv-hunf neeh huf hee gang,
"Yih fav daf!"
If see tih "Hheeif lo!"
35 Sav geef deei hee ziuh mah siangf lungv vooi,
linh geef mee ya duangh vooi,
gang go ya zinv vooi.