4 Meenv huv gee tanv,

"Yoou nooih tih da loouh,

hauf-loh booiv leeuf div goouh teenf liauh,

geeu lengv-hunf neeh hoouf goonv nif?"

5 Yev-so tooi geef-loh,

"Meef-loh lai bing giauh liauh?"

Geef-loh tanv,

"Sit mooqf."

6 Yev-so yam hemv goonf ngov longf dauf matf vooi,

geef ziuh nganv bing neeh sit mooqf uif,

gamh siaf Siangf-dif vooi,

ziuh loot vooi beu sev meenv huv,

yam meenv huv gee faif yoou dau na hemv goonf,

meenv huv gee ziuh teenf huk vooi.

7 Meenv huv gee ya lai leekf bav gi huf hemv,

Yev-so ya nganv uif,

gamh siaf Siangf-dif vooi,

ziuh yam meenv huv gee ya faif yoou dau na hemv goonf.

8-9 Hemv goonf zung goonv,

leeuf na duf goonv geemf-geemf vooi,

daf hhaif lai lengv-hunf tee senv na goonv.

Seeif looif meenv huv gee suv lengf teengh-teengh gee uif,

deengf sit hhiangv dikf-dik.

Yev-so ziuh yam hemv goonf tan vooi,

10 geef ya mah siangf hemv meenv huv gee geen luaf vooi,

miaf doongv lengv Daf-mah-nuv-ta gee vooi.

11 Lengv-hunf Fatf-lif-saif dangh gee miaf div Yev-so tooi go.

Geef-loh tiang au Yev-so,

ziuh yam geef lokf baiv fa huk seenv zif mee sev geef-loh dekf.

12 Yev-so ziuh zangf ziu hee hhoonf-hhoov,

bov,

"Meef-loh neeh hoouf hee,

veeih gai dif dekf seenv zif nif?

Hauf titf-titf seengv meef-loh,

meenf lai seenv zif sev tooi ganv neeh mee gee lengv-hunf dekf vooi."

13 Yev-so gang inv ziuh lif hhooiv geef-loh,

yuh geen luaf gua fiangf ninh hhoom vooi.

14 Meenv huv Yev-so gee buh bangh dai bing hemv booiv vooi,

baiv luaf nah lai bing mooqf hee toof-too,

gai gee duf meenf lai vooi.

15 Yev-so gingh goouf geef-loh bov,

"Meef-loh hheem nook timv,

zuf if fauf taf^a lengv-hunf Fatf-lif-saif dangh gee,

hemv fauf taf Hi-lutf gee."

16 Geef-loh ziuh hemv goonf ngif leenf bov,

"Tih meenf tih doouf-loh meenf lai bing vooi,

geef nah bov teenf nif?"

17 Yev-so huh geef-loh gang gai gee,

ziuh bov,

"Meef-loh veeih gai meenf lai bing vooi ziuh ngif leenf nif?

Meef-loh ya meenf took,

ya meenf mingf fekf yoou haf?

Dumf meef-loh gee enf but teenf yoou haf?

18 Meef-loh lai dav meenf dekf lai huh haf?

Lai sav meenf hingf lai heekf haf?

Meef-loh meenf oov vooi haf?

19 Neeh fooif hee,

hauf loot bing nga mooqf sev ngoh senv na lengv-hunf goonv,

meef-loh suv lengf teengh teengh neeh gee deengf giauh hhiangv dik vooi?"

Geef-loh tanv,

"Teepf ngeeih hhiangv."

20 Yev-so yuh bov,

"Hauf loot bing sit mooqf,

sev tee senv na lengv-hunf goonv neeh fooif hee,

meef-loh suv lengf teengh-teengh neeh gee,

deengf giauh hhiangv dik vooi?"

Geef-loh tanv,

"Sit hhiangv."

21 Yev-so bov,

"Meef-loh ya meenf mingf fekf yoou haf?"

22 Yev-so hemv meenv huv geef gee miaf doongv voo Bokf-saif-daf mee vooi,

lai lengv-hunf yin bef dav lak huf hee miaf div Yev-so,

hhuf Yev-so gamf geef.

23 Yev-so ziuh diuf lokf moof bef dav lak neeh huf hee loouh,

yin geef uk ningf voo vooi,

ziuh taiv namh meeif loouh dav geef,

yuh zav moof deei hee geen baiv huf geef vooi,

tooi geef bov,

"Meef dekf huh gai gee vooi?"

24 Geef ziuh doongf hau uif dekf,

bov,

"Hauf dekf huh lengv-hunf vooi,

geef-loh zing dun teenf hee,

seek booiv seek leengv."

25 Yev-so yuh nyof moof gamf dav geef deei hee,

dav geef deei hee ziuh hheeif vooi,

dav deei hee ziuh maif inv vooi,

geef gai gee duf dekf lai zinv vooi.

26 Yev-so yam geef leengv lanf,

ya zuk geef bov,

"Meef meenf ngah lokf voo neeh mee gua."

27 Yev-so hemv meenv huv geef gee,

booiv voo yoou ningf heeuv Gai-sav-lif-yav Feei-lif-bih neeh gee.

Yoou da sunv Yev-so tooi meenv huv gee,

bov,

"Vanh bov hauf tih naf nee?"

28 Geef-loh tanv bov,

"Lai feenh hee bov meef tih hooi lengv-hunf tuk leei gee Ye-hanf;

lai feenh hee bov meef tih sian zi Yih-lif-yav;

ya lai feenh hee bov,

meef tih sian zi hhiv zung gee huf hee."

29 Yev-so yuh tooi geef-loh bov,

"Meef-loh nif?

Meef-loh bov hauf tih naf nee?"

Bih-deekf tanv,

"Meef tih Gi-dukf."

30 Yev-so ziuh zukf geef-loh,

senv vanh meenf ngah seengv vanh geef tih naf nee.

31 Yev-so hhai sih maiv meenv huv geef hoouf hee,

geef bov,

"Yeenv-zeeh itf dingf hheem tuh haih liauh hho,

bif ziangh lauh gee hemv gif see ziangh gee,

gangf Siangf-dif lutf fapf gee lauh see gif zuatf,

ya haih daiv,

haih tamv veenf tingf leengv."

32 Yev-so teenf-teenf gang go neeh gee uk miaf,

Bih-deekf ziuh leeh geef booiv gatf hhootf vooi,

bov geef.

33 Danf tih Yev-so zuanh huf gua miaf,

dekf meenv huv hoouf hee,

ziuh an Bih-deekf bov,

"Sav-danf,

deuf looif-looiv geef!

Meef meenf guan sim Siangf-dif gee teeh,

deuf booiv guan sim lengv-hunf gee teeh."

34 Yev-so ziuh yam hemv goonf,

miaf ningf geef hemv meenv huv geef gee vooi,

ziuh bov geef-loh,

"Lengv-hunf zeekf dif hemf moh hauf,

hheem meenf ngah saf teeh toof-too ziqf-ziqf,

iaq sipf zeef giaf geef mee uif miaf hemf moh hauf.

35 Eenv veeih neef tiang go mingh toof-too hiuf hee gee,

itf dingf daiv mingh;

neef veeih hauf hemv veeih fukf im daiv mingh gee,

itf dingf go mingh toof-too hiuf hee vooi.

36 Lengv-hunf ziuh tih hanf suanv sif gaif vooi,

dap mingh toof-too hiuf hee hemv booiv vooi,

lai gai yungh nif?

37 Geef dif oouv lai gai gee,

miaf toonv mingh geef hiuf leengv?

38 Meef-loh neeh hoouf hee,

doi Siangf-dif meenf zung sim^b,

seeu inv seeu bang vooi,

zeekf meef-loh dekf hemf moh hauf hemv go hauf gee tih ngaif yo gee.

Doongv Yeenv-zeeh yoou da bef lai geef gee yungv guang^c,

hemv Siangf-dif gee hian seeh hongf goonf longf miaf neeh veenf hee,

ya dekf geef tih ngaif yo gee."