9
1 Yev-so yuh hemv geef-loh gang,
"Hauf titf-titf seengv meef-loh,
lengv-hunf nyunv yoou nooih neeh gee,
lai feenh hee meenf daiv zee sianv,
itf dingf dekf huh Siangf-dif gee gok gav meenf huh giauh lai neengv likf."
Yev-so yoou baiv tiah bin tiang
2 Gua sok veenf hoouh looif,
Yev-so yin Bih-deekf,
Yav-gookf,
Ye-hanf lookf-lookf geen baiv tiah hangf-hangv mee vooi.
Yev-so yoou dau na geef-loh bin tiang vooi:
3 Hho yua geef gee bin lengf-leng teenf hee,
meenf huh giauh fiakf,
dauf matf fiauv hoopf gee,
meenf lai naf nee fiauv lai teenf fiakf.
4 Neeh tif hoouh,
lai sian zi Yih-lif-yav,
hemv Mov-si yoou dau na geef-loh sev geef-loh dekf huh,
hemv Yev-so gang go.
5 Bih-deekf hemv Yev-so gang bov,
"Lauh see,
doouf-loh yoou nooih haih maif!
Doouf-loh hhoo yi dap meeuh tamv mooqf:
Mooqf hee sev meef,
mooqf hee sev Mov-si,
mooqf hee sev Yih-lif-yav."
6 Bih-deekf meenf huh gang gai gee maif,
eenv veeih geef-loh meenf huh giauh mangf.
7 Lai bah zof hee miaf zaqf geef-loh loouh vooi,
ya lai sauv mee lokf da bah gang bov,
"Neeh huf tih leekf da hhiangh hauf huf hee,
hauf dookf geef,
meef-loh hheem hingf go geef."
8 Meenv huv gee ziuh mah siangf vook na vook looif,
meenf huh lengv-hunf huf huf vooi,
nah deengh Yev-so toof-too hemv geef-loh yoou ninh.
9 Geef-loh longf tiah gee tif hoouh,
Yev-so zuk geef-loh bov,
"Hheem foou Yeenv-zeeh lokf daiv tingf leengv env,
meef-loh nah seengv dekf heekf gee teeh zee vanh."
10 Meenv huv gee oov go neeh gee loouh da timv vooi,
ya hemv goonf ngif leenf bov "Lokf daiv tingf leengv" tih gai gee if see.
11 Geef-loh ziuh tooi Yev-so bov,
"Siangf-dif lutf fapf gee lauh see veeih gai bov,
Yih-lif-yav itf dingf hheem miaf gua na Gi-dukf nif?"
12 Yev-so bov,
"Yih-lif-yav titf-titf hheem miaf gua na,
hooi hauf zunh bif itf siatf maif-maif vooi.
Ging veenv meenf tih teenf hee tia Yeenv-zeeh haf?
Geef itf dingf hheem tuh haih liauh hho,
ya bif vanh gif zuatf vook meenf uif.
13 Hauf seengv meef-loh,
Yih-lif-yav duf ga miaf vooi,
danf tih geef-loh ooi di leeuf doi geef,
ziuh di leeuf doi geef,
zing goh ging veenv tia gee teenf hee."
Yiav leekf bif yif hangv geen huf huf hee
14 Geef-loh leengv doongv ningf meenv huv hoouf hee vooi,
dekf huh lengv-hunf dunf hee vif meenv huv gee,
ya lai Siangf-dif lutf fapf gee lauh see hemv geef-loh bianf leenf.
15 Hemv goonf it huh Yev-so ziuh meenf huh giauh hhiv guaif,
zung deuf geen booiv tooi geef.
16 Yev-so tooi meenv huv gee bov,
"Meef-loh hemv geef-loh lunf gai gee nooh?"
17 Yoou da lengv-hunf neeh hoouf hee lai huf hee tanv bov,
"Lauh see haf,
hauf yin leekf da hhiangh hauf huf hee miaf div meef,
yif hangv ngop huf hee geen huf geef vooi.
18 Leeuf fooif yif hangv giau geef gee tif hoouh,
duf fau geef det vooi,
biang geef lianv buv,
ngianf tinv ngianf laf,
suanf huf luaq zing veenf hee.
Hauf yam meenv huv meef gee hooi geef voouf yif hangv,
danf tih geef-loh meenf voouf lai uk."
19 Yev-so bov,
"Ef!
Meef-loh neeh hoouf hee,
meenf lai sinf sim ziqf-ziqf!
Hauf dif yoou ningf meef-loh doongv gi tif?
Ya dif tuh meef-loh doongv gi tif nif?
Yin geef miaf ningf hauf miaf!"
20 Geef-loh ziuh yin leekf neeh huf hee miaf vooi.
Yif hangv huf hee it huh Yev-so,
ziuh mah siangf biang leekf nee suv van meenf huh giauh hhoonv,
ling longf dauf matf vooi,
luf booiv luf leengv,
lianv buv teth-teth teenf hee.
21 Yev-so tooi bef lai geef bov,
"Geef fingh teenf hee giau foong vooi?"
Bef lai geef tanv bov,
"Lokf nookf nook ziuh teenf hee vooi.
22 Yif hangv huf hee,
siangf-siangf fengf geef loouh da veeif da namh vooi,
tiang huk geef daiv.
Meef zeekf hooi geef huk lai gai gee,
hhuf meef hhoo linf hauf-loh,
boongv hauf-loh ziu."
23 Yev-so bov geef,
"Meef veeih gai bov 'Meef zeekf huk lai' nif?
Neef siang sinf gee lengv-hunf,
gai gee duf huk lai doongv."
24 Bef lai leekf neeh huf hee,
mah siangf ngai sauv lookf-look bov,
"Hauf siang sinf!
Danf tih sinf sim hauf gee meenf geeu,
hhuf meef boongv tooh hauf!"
25 Yev-so dekf huh hemv goonf zung deuf gua miaf vooi,
ziuh hiak yif hangv neeh huf hee,
bov,
"Yif hangv yuh ngop yuh makf meef neeh huf hee,
hauf mingf lingf meef lokf huf geef uk booiv,
meenf zun loouh fooif hemv vooi."
26 Yif hangv neeh huf hee ziuh gukf lingf yanh,
biang leekf neeh huf hee suv van don hee hhoonf-hhoonv,
ziuh uk vooi.
Leekf huf hee zing daiv vooi teenf hee,
lengv-hunf dun hee zung bov geef daiv vooi.
27 Danf tih Yev-so diuf lokf moof geef loouh,
tooh geef uif,
geef ziuh nyunv uif vooi.
28 Yev-so loouh lanf vooi,
meenv huv gee ziuh lookf-lookf tooi geef bov,
"Hauf-loh veeih gai meenf voouf lai yif hangv neeh huf uk nif?"
29 Yev-so bov,
"Zeekf meenf doouh gooufa,
ziuh meenf voouf lai yif hangv neeh zuangv uk."
Yev-so yuh gang geef dif bif vanh haih hemv tingf leengv
30 Geef-loh lokf lengv neeh hhootf uk miaf,
gua Gia-lif-lif.
Yev-so meenf tiang vanh huh geef yoou leeuf,
31 eenv veeih geef maiv meenv huv geef gee nenh.
Geef bov,
"Yeenv-zeeh dif bif gauv loouh moof vanh,
vanh dif haih geef daiv.
Daiv vooi haih tamv veenf,
geef dif tingf leengv."
32 Danf tih meenv huv gee,
meenf took go neeh gee tih gai gee if see,
ya meenf goom tooi geef.
Naf nee zuif nyoo
33 Geef-loh miaf doongv Zia-baiv-nungv vooi.
Yev-so yoou da lanf tooi meenv huv geef gee,
bov,
"Meef-loh yoou da sunv zengv gai gee nooh?"
34 Meenv huv gee ziuh meen vooi,
eenv veeih geef-loh yoou da sunv hemv goonf zengv naf nee zuif nyoo.
35 Yev-so ngov longf,
yam seeh huv teepf ngeeih huf miaf,
bov geef-loh bov,
"Naf nee dif tiang huk hau,
ziuh hheem yoou da hemv goonf,
huk zuif nook neeh huf hee,
hooi hemv goonf huk nof."
36 Yev-so ziuh yin leekf nook huf hee gua miaf,
yam geef nyunv yoou da meenv huv hoouf hee vooi,
ya feh geef uif,
bov geef-loh,
37 "Neef veeih hauf ziapf daif zing leekf nook neeh huf gee,
ziuh tih ziapf daif hauf;
neef ziapf daif hauf gee,
meenf danf-danv tih ziapf daif hauf,
ya tih ziapf daif faif hauf miaf gee neeh huf vooi."
Meenf fanh deeif doouf-loh gee ziuh tih hongf doouf-loh
38 Ye-hanf seengv Yev-so bov,
"Lauh see haf,
hauf-loh dekf huh lengv-hunf huf hee,
oouv nooiv meef mee miaf voouf yif hangv,
hauf-loh ziuh lanf geef,
eenv veeih geef meenf hemf moh hauf-loh."
39 Yev-so bov,
"Meenf ngah lanf geef,
eenv veeih meenf lai naf nee,
oouv hhianv likf hauf gee booiv huk meenf fingf tiangf gee teeh vooi,
yuh mah siangf fanv leengv miaf,
zooh tiv bov hauf seeu gee.
40 Neef meenf fanh deeif doouf-loh gee,
ziuh tih hongf doouf-loh.
41 Hauf titf-titf seengv meef-loh,
neef eenv veeih meef-loh tih meenv huv Gi-dukf gee,
ziuh sev namh zungv hee zee meef-loh goonv gee,
geef itf dingf lai ziangf lif."
Meenf ngah biang lengv-hunf famh soih
42 "Naf nee zeekf biang,
nauf-nauh siang sinf hauf gee huf hee famh soih,
enf meenf dim ling dinf mah buah mee,
loouh gof lingh geef,
gengf longf dauf hai vooi.
43 Zeekf moof meef fiangf hee biang meef famh soih,
ziuh damh geef booiv!
44 Meef tiu moof fiangf hee loouh yungh seeng,
bih teengh moof deei hee maif-maif loouh dif yukf vooi,
yungh yuanh tuh hho,
loouh da veeih yungh yuanh meenf gua neeh gee enf maif.
45 Zeekf gok meef fiangf hee biang meef famh soih,
ziuh damh geef booiv!
46 Meef tiu gok fiangf hee loouh yungh seeng,
enf hhiangf gua meef teengh gok deei hee maif-maif loouh dif yukf vooi,
yungh yuanh tuh hho.
47 Zeekf dav meef fiangf hee biang meef famh soih,
ziuh zutf geef booiv!
Meef teengh dav fiangf hee toof-too loouh Siangf-dif gee gok gav,
enf hhiangf gua teengh dav deei hee maif-maif,
loouh dif yukf vooi,
yungh yuanh tuh hho.
48 Yoou ninh
mingf gee yungh yuanh meenf daiv,
veeif gee yungh yuanh meenf gua.
49 Eenv veeih leeuf na duf hheem bif veeif lut,
zing oouv nyau miaf leemh gua teenf heeb c.
50 Nyau beenh laiv tih maif gee,
danf tih zeekf meenf lai vih lang mee vooi,
dif oouv lai gai gee miaf huk geef lang leengv nif?
Meef-loh ya hheem zing nyau teenf hee tih maif gee,
zuh iauf hheem hemv goonf maif goonf."