Tiang gooi dif ga Yev-so (Haif 26:1-5; Lukf 22:1-2; Ye 11:45-53)
14
1 Gua voon veenf hemv,
ziuh doongv Yih-yuatf-ziatfa hemv Seef-hiauf-ziatfb vooi,
gif see ziangh hemv Siangf-dif lutf fapf gee lauh see,
tiang gooi di leeuf hoof Yev-so,
ga Yev-so booiv.
2 Danf tih geef-loh bov,
"Doouf-loh meenf ngah yoou ziatf yitf hoof geef,
ha zinf tee bek ting gee boouf luanf."
Maih leekf huf hee diaqf hiang goou geen hau Yev-so (Haif 26:6-13; Ye 12:1-8)
3 Yev-so yoou voo Bokf-daf-niv,
yoou lanf Si-meenv gua na tingf ma fungv neeh huf hee,
goonv fiah gee tif hoouh,
lai maih leekf huf hee,
nganv hiang goou nav tav zinf-zinv gee ganh hee loouh miaf.
Gooh ganh hee meenf huh giauh dooi sinf,
ganh neeh mee tih oouv yif miaf huk gee.
Geef hhauv ganh mee deet vooi,
diaqf hiang goou gee geen baiv hau Yev-so vooi.
4 Lengv-hunf yoou ninh gee,
lai feenh hee meenf huh giauh hheei hhif,
ziuh bov,
"Teenf hee langf feeif hiang goou gee huk gai nooh?
5 Zeekf ing hiang goou neeh ganh hee,
dooi lai tamv bek lengf mooqf ngoonf fiakfc,
booiv boongv neef ngah gee."
Geef-loh ziuh an geef.
6 Danf tih Yev-so bov,
"Suf saih geef,
bov geef huk gai?
Geef hooi hauf huk teeh neeh hhin hee meenf huh giauh maif.
7 Eenv veeih siangf-siangf lai neef ngah gee,
hemv meef-loh yoou ningf goonf,
meef-loh dif tiang boongv geef-loh,
gi tif duf boongv lai,
danf tih hauf hemv meef-loh yoou ningf goonf gee tif ganv meenf liauh vooi.
8 Geef duf ga zinf liangf huk vooi.
Geef diaqf hiang goou geen baiv huf hauf,
tih veeih bok hauf zunh bif gee.
9 Hauf titf-titf seengv meef-loh,
meenf guan suanf fukf im doongv sif gaif gee leeuf hhootf lengv foongv,
duf hheem suanf maih leekf neeh huf hee huk gee teeh,
miaf gif niamf geef."
10 Seeh huv Yev-so teepf ngeeih huf,
lai huf hee yam Yiuh-daf Gia-liatf hee.
Geef booiv div gif see ziangh gee,
dif gauv Yev-so sev geef-loh.
11 Geef-loh hingf vooi meenf huh giauh eengv,
eef dif sev sinf zee geef.
Lokf ninh Yiuh-daf ziuh div gi huif dif gauv Yev-so sev geef-loh.
Meenv huv Yev-so gee zunh bif fiah Yih-yuatf-ziatf neeh don hee (Haif 26:17-25; Lukf 22:7-14, 21-23; Ye 13:21-30)
12 Seef-hiauf-ziatf gee haih it veenf,
ziuh tih ga leekf tuangf Yih-yuatf-ziatf gee neeh veenf hee,
meenv huv gee tooi Yev-so,
bov,
"Meef yam hauf-loh booiv leeuf hhootf,
hooi meef zunh bif fiah Yih-yuatf-ziatf neeh don hee nif?"
13 Geef ziuh faif meenv huv voon huf booiv zunh bif,
seengv geef-loh bov,
"Meef-loh loouh heeuv vooi,
dif am heekf lengv-hunf huf hee,
zunv namh eng hee doi na gua miaf,
meef-loh ziuh di moh geef booiv.
14 Meenf guan geef loouh lanf leeuf mooqf,
meef-loh ziuh hemv lanf neeh mee gee lanf zu gang bov,
'Lauh see bov,
foongf leeuf mooqf tih moov zih gee?
Hauf hemv meenv huv hauf gee dif yoou ninh goonv fiah Yih-yuatf-ziatf neeh don hee.'
15 Geef dif yin meef-loh geen baiv loouf vooi,
dekf foongf hhuatf-hhuat ganv hee.
Foongf neeh mee duf ga buf zif maif-maif vooi,
meef-loh ziuh yoou ninh hooi doouf-loh zunh bif."
16 Geef-loh voon huf ziuh booiv vooi,
loouh heeuv am-heekf gee teeh,
titf-titf zing Yev-so gang gee teenf hee,
geef-loh ziuh yoou ninh zunh bif fiah Yih-yuatf-ziatf neeh don hee.
17 Veenf dif yoop vooi,
Yev-so yin teepf ngeeih huf seeh huv miaf vooi.
18 Geef-loh ngov yoou ninh goonv fiah gee tif hoouh,
Yev-so bov,
"Hauf titf-titf seengv meef-loh,
yoou da meef-loh lai huf hee dif ing hauf,
geef en teeif hemv hauf hongf hooif goonv fiah nenh."
19 Seeh huv gee hingf vooi ziuh nyung nyang,
di na na teenf hee tooi Yev-so bov,
"Meenf tih hauf lef?"
20 Yev-so seengv geef-loh bov,
"Geef tih meef-loh teepf ngeeih huf hhiv zung gee huf hee,
ziuh tih hemv hauf hongf fanf mee,
zemf bing goonv gee neeh huf hee."
21 Yeenv-zeeh itf dingf dif bif haih,
zing goh ging veenv tia geef teenf hee,
danf tih neef ing Yeenv-zeeh neeh huf hee lai huah vooi!
Geef meenf lai uk enf maif.
Goonv bing hemv yanh fuh hoouv (Haif 26:26-30; Lukf 22:14-20; Linv-sianv 11:23-25)
22 Geef-loh goonv fiah gee tif hoouh,
Yev-so nganv bing mee uif,
gamh siaf Siangf-dif vooi,
ziuh loot vooi,
beu sev geef-loh,
bov,
"Meef-loh oouv booiv goonv lo,
neeh tih bun tinv hauf mee."
23 Yev-so yuh nganv yan zungv hee uif,
gamh siaf Siangf-dif vooi,
beu sev geef-loh,
geef-loh zung goonv vooi.
24 Yev-so bov,
"Neeh tih baq hauf gee --- Siangf-dif eef sev leekf ngif geef gee,
oouv baq hauf gee miaf huk zingf mingv.
Baq neeh gee tih veeih haih liauh lengv-hunf leeiv gee.
25 Hauf titf-titf seengv meef-loh,
hauf meenf goonv yan fuh hoouv neeh gee fooif hemv vooi,
zi doongv hauf yoou Siangf-dif gee gok gav goonv yan nauh gee neeh veenf hee."
26 Geef-loh siang goov ngenv Siangf-dif gee vooi,
ziuh uk miaf booiv tiah Gamh-lamv vooi.
Yev-so bov Bih-deekf dif meenf nginh geef (Haif 26:31-35; Lukf 22:31-34; Ye 13:36-38)
27 Yev-so bov geef-loh,
"Meef-loh zung dif meenf siang sinf hauf,
zung dif deuf tan vooi,
eenv veeih ging veenv bov,
'Hauf dif ga lengv-hunf tiangh tuangf gee,
tuangf gee ziuh deuf tan goonf vooi.'
28 Danf tih hauf tingf leengv hoouh looif,
hauf dif doongv Gia-lif-lif meng gua meef-loh."
29 Bih-deekf bov,
"Hemv goonf zung meenf siang sinf meef,
zung deuf vooi,
hauf ya meenf suif meef."
30 Yev-so ziuh bov geef,
"Hauf titf-titf seengv meef,
goomh nooih gaiv duf meenf tanv haih ngeeih fooif yoou,
meef ziuh dif tamv fooif meenf nginh hauf."
31 Danf tih Bih-deekf nge-nge bov,
"Ziuh tih hauf hheem hemv meef hongf goonf booiv daiv,
hauf ya itf dingf meenf hooi meenf nginh meef."
Meenv huv gee inf-inv zung tih teenf gang.
Yev-so yoou Hheef-si-mah-niv doouh goouf (Haif 26:36-46; Lukf 22:39-46)
32 Yev-so hemv meenv huv geef gee,
miaf doongv lengv Hheef-si-mah-niv neeh hhootf hee.
Yev-so zuk meenv huv gee bov,
"Meef-loh ngov yoou nooih foou,
hauf booiv doouh goouf ziu env."
33 Geef ziuh yin Bih-deekf,
Yav-gookf,
Ye-hanf di moh booiv.
Timv geef mee meenf huh giauh nyung nyang,
giauh ngaif tuh,
34 ziuh bov geef-loh,
"Timv hauf mee ngaif tuh daiv vooi,
meef-loh yoou nooih foou hauf,
hheem nook timv,
meenf ngah gauh suanv."
35 Geef ziuh booiv geen na ziqf vooi,
hhuih longf hupf yoou dauf matf doouh goouf bov,
"Zeekf noov lai,
ziuh biang tih hoouh nanf vif neeh mee gua booiv.
36 Baf haf,
meef gai gee duf huk lai doongv,
hhuf meef meenf ngah biang hauf tuh nanf vif neeh gee.
Danf tih meenf ngah ziuf hauf gee if see,
hheem ziuf meef gee if see."
37 Yev-so leengv miaf,
dekf huh geef-loh duf ga suanv vooi,
ziuh bov Bih-deekf bov,
"Si-meenv,
meef ga suanv vooi haf?
Meef meenf zingv lai leekf hheei haf?
38 Hheem dav zingf-zingv doouh goouf,
ha zinf dok loouh tuang yif hangv gee vooi.
Tuif yianf timv meef-loh gee hheeng,
danf tih bun tinv meef-loh gee meenf lai ngeenv likf booiv huk."
39 Yev-so yuh booiv doouh goouf fooif hemv,
hhuf gee hemv baiv fooif hongf goonf.
40 Geef yuh leengv miaf,
dekf huh meenv huv gee ya suanv vooi,
eenv veeih geef-loh dav gauh meenf teeng lai,
geef-loh ya meenf huh di leeuf tanv geef.
41 Yev-so haih tamv fooif leengv miaf,
bov geef-loh,
"Meef-loh enf lap suanv enf hiu sikf yoou haf?
Maif vooi,
tif ganv doongv vooi.
Noh!
Dif gauv Yeenv-zeeh sev lengv-hunf lai soih gee vooi.
42 Uif,
doouf-loh booiv lo!
Noh!
Ing hauf neeh huf miaf vooi noh!"
Hoof Yev-so vooi (Haif 26:47-56; Lukf 22:47-53; Ye 18:3-12)
43 Yev-so enf gang go yoou,
Yiuh-daf duf ga miaf vooi,
geef tih teepf ngeeih huf meenv huv hhiv zung gee huf hee.
Geef yin lengv-hunf dunf hee,
nganv mitf nganv gunf miaf vooi,
lengv-hunf neeh gee tih gif see ziangh,
hemv Siangf-dif lutf fapf gee lauh see,
gangf ziangh lauh gee faif miaf gee.
44 Lengv-hunf ing Yev-so neeh huf hee,
duf ga hemv geef-loh gang amf hoouf maif vooi,
geef bov,
"Hauf hoomv naf nee,
naf nee ziuh tih meef-loh dif hoof gee neeh huf hee.
Meef-loh ziuh hoof geef loouh,
vook lootf-lootf geef,
dai geef booiv."
45 Yiuh-daf giangf miaf doongv,
ziuh booiv ningf Yev-so vooi,
yam Yev-so bov,
"Lauh see!"
Ziuh hoomv Yev-so ziu hee loouh vooi.
46 Geef-loh ziuh geen booiv hoof Yev-so loouh vooi.
47 Lengv-hunf nyunv yoou ningf neeh gee,
lai huf hee yitf mitf uk miaf,
damh leekf nof daf gif see huf hee ziu hee,
damh sav fiangf hee loomh vooi.
48 Yev-so ziuh bov geef-loh,
"Meef-loh dai mitf dai gunf miaf hoof hauf,
zing goh hoof sookf teenf hee haf?
49 Hauf veenf-veenf hemv meef-loh yoou ningf goonf,
yoou da bang Seengf-dianf maiv lengv-hunf,
meef-loh meenf hoof hauf.
Danf tih enf teeif meef-loh teenf huk,
tih zingf sitf ging veenv tia gee."
50 Neeh tif hoouh,
meenv huv gee zung suif Yev-so deuf vooi.
51-52 Lai leekf hauh tengv huf hee,
enf hemf moh Yev-so yoou,
geef nah lumf hoopf ganv fef hee toof-too.
Geef-loh dif hoof geef,
ziu heekf hoopf ganv fef hee vooi,
geef ziuh geq nangv lingf-lingv deuf vooi.
Fuanf Yev-so seeh hingv (Haif 26:57-68; Lukf 22:54-55,63-71; Ye 18:13-14,19-24)
53 Geef-loh hoof Yev-so booiv ningf daf gif see vooi,
gif see ziangh gee,
ziangh lauh gee hemv Siangf-dif lutf fapf gee lauh see,
inf-inv zung miaf vooi.
54 Bih-deekf looif-looiv di moh Yev-so,
zi doongv loouh da bang daf gif see mee vooi,
geef ziuh hemv leekf bingv gee ngov yoou ningf goonf lingf veeif.
55 Gif see ziangh hemv suanf gung huif gee lengv-hunf,
zung div zingf gif miaf goou Yev-so,
hau fuanf Yev-so seeh hingv,
danf tih meenf div lai heekf zingf gif.
56 Lai haih liauh lengv-hunf huk gev zingf mingv goou Yev-so,
danf tih geef-loh di na gang di zuangv,
zung meenf hongf goonf.
57 Ya lai lengv-hunf gi huf nyunv uif,
huk gev zingf mingv goou geef bov,
58 "Hauf-loh hingf geef gang gua,
geef bov,
'Hauf dif fah Seengf-dianf lengv-hunf huk neeh mee booiv,
tamv veenf zee neeif,
hauf dif sungf huk mooqf hee uif,
meenf tih lengv-hunf huk gee.'"
59 Ziuh tih zingf mingv neeh zuangv hee,
geef-loh ya gang meenf hongf goonf.
60 Daf gif see nyunv uif,
nyunv zing da hemv goonf vooi tooi Yev-so,
bov,
"Geef-loh huk zingf mingv goou meef teenf hee,
meef gai gee duf meenf tanv haf?"
61 Danf tih Yev-so meenf-meen,
gai gee duf meenf tanv.
Daf gif see yuh tooi geef,
bov,
"Meef tih meenf tih Gi-dukf?
Tih gaiv lai ngenv gee neeh huf gee Leekf-da-hhiangh meenf?"
62 Yev-so tanv,
"Heqh,
hauf tih!
Meef-loh dif dekf huh Yeenv-zeeh,
ngov yoou ningf moof maif Zuif-heen-gee-neeh-huf-hee,
ngov bah baiv fa gee longf miaf!"
63 Daf gif see ziuh hheei hhif iakf hho yua toof-too gee vooi,
bov,
"Doouf-loh dif yungh lengv-hunf miaf huk zingf mingv huk gai yoou?
64 Meef-loh duf ga hingf huh geef gang go famh Siangf-dif vooi.
Meef-loh bov dif di leeuf sih lih geef?"
Hemv goonf zung bov,
"Geef lai soih,
dingf geef seeh hingv."
65 Ziuh hhai sih lai lengv-hunf taiv namh meeif diqf Yev-so,
ya gatf dav Yev-so loouh vooi,
oouv hhunf hoouf namf geef,
tooi geef,
"Meef bov,
naf nee git meef?"
Leekf bingv gee dai geef longf booiv gee tif hoouh,
ya git geef.
Bih-deekf tamv fooif meenf nginh Yev-so (Haif 26:69-75; Lukf 22:56-62; Ye 18:15-18, 25-27)
66 Bih-deekf yoou da bang looif mee gee tif hoouh,
lai leemf leekf yoou lanf daf gif see huk nof gee huf hee gua miaf,
67 geef huh Bih-deekf yoou ninh lingf veeif,
ziuh vook Bih-deekf itf-it teenf hee,
bov,
"Meef ya tih lengv-hunf Nah-saf-leekf Yev-so neeh hoouf gee."
68 Danf tih Bih-deekf meenf singv nginf,
geef bov,
"Hauf meenf huh,
ya meenf mingf fekf meef gang gai gee."
Geef ziuh uk miaf,
giangf booiv doongv da bang na mee,
gaiv ziuh tanv vooi.
69 Leekf nof bakf feenh neeh huf hee,
yuh dekf huh Bih-deekf vooi,
ziuh seengv lengv-hunf nyunv yoou ninh gee bov,
"Lengv-hunf neeh huf hee,
ya tih geef-loh neeh hoouf gee."
70 Bih-deekf ya meenf singv nginf.
Gua leekf hheei hee,
lengv-hunf nyunv yoou ningf gee ya bov Bih-deekf,
"Meef titf-titf tih geef-loh neeh hoouf gee,
eenv veeih meef ya tih lengv-hunf bak lengv Gia-lif-lif gee."
71 Bih-deekf ziuh fat tooih bov,
"Hauf meenf took lengv-hunf meef-loh gang neeh huf hee,
hauf zeekf gang go gev,
Siangf-dif ziuh fatf hauf."
72 Geef giangf gang inv,
gaiv ziuh tanv haih ngeeih fooif.
Bih-deekf ziuh tiang uif Yev-so hemv geef gang gee,
Yev-so bov,
"Gaiv duf meenf tanv haih ngeeih fooif yoou,
meef dif tamv fooif meenf nginh hauf."
Bih-deekf tiang heekf go neeh gee ziuh ngai oo oo teenf hee.