hheev 15

Bih-la-to simh veenf Yev-so (Haif 27:1-2,11-14; Lukf 23:1-5; Ye 18:28-38)

1 Veenf giangf bangv,

gif see ziangh gee hemv ziangh lauh gee,

gangf Siangf-dif lutf fapf gee lauh see,

hemv suanf gung huif gee lengv-hunf,

hemv goonf hamf liangf,

gatf Yev-so loouh,

dai booiv gauv sev hau Loh-mah huf hee Bih-la-to.

2 Bih-la-to simh veenf Yev-so bov,

"Meef tih voongf lengv-hunf Yiuh-haif huf hee haf?"

Yev-so tanv bov,

"Go neeh gee tih meef gang gee."

3 Gif see ziangh gee yuh goou Yev-so teeh dunf hee.

4 Bih-la-to yuh tooi Yev-so,

bov,

"Meef dekf,

geef-loh goou meef teeh dunf hee,

meef gai gee duf meenf tanv haf?"

5 Danf tih Yev-so ya meenf-meen,

Bih-la-to di leeuf duf meenf tiang lai hongv.

Fuanf Yev-so dingf sipf zeef giaf (Haif 27:15-26; Lukf 23:13-25; Ye 18:39-19:16)

6 Leeuf veeif Yih-yuatf-ziatf,

Bih-la-to duf ziuf lengv-hunf gee iau hhiuv,

tek famf yinv huf hee sev geef-loh.

7 Lai famf yinv huf hee yam Ba-la-ba,

hemv lengv-hunf zoouf fanh gee hoop yoou ningf goonf,

geef-loh zoouf fanh gee tif hoouh ga lengv-hunf gua.

8 Lengv-hunf gee booiv ningf Bih-la-to vooi,

yam Bih-la-to zing gua na teenf hee,

tek famf yinv huf hee sev geef-loh.

9 Bih-la-to tooi geef-loh,

bov,

"Meef-loh yam hauf tek voongf lengv-hunf Yiuh-haif huf hee sev meef-loh haf?"

10 Eenv veeih Bih-la-to huh gif see ziangh gee timv seeu Yev-so,

nah hoof Yev-so miaf gee.

11 Danf tih gif see ziangh hoouf hee,

ziuv teef lengv-hunf gee,

yam Bih-la-to tek Ba-la-ba,

meenf ngah tek Yev-so.

12 Bih-la-to yuh bov,

"Teenf hee,

meef-loh yam tih voongf lengv-hunf Yiuh-haif neeh huf hee,

hauf dif di leeuf sih lih geef?"

13 Geef-loh yuh sauv lookf-look yanh bov,

"Dingf geef geen sipf zeef giaf vooi!"

14 Bih-la-to bov,

"Veeih gai?

Geef famh gai gee soih vooi?"

Danf tih geef-loh yanh geengf look uif,

bov,

"Dingf geef geen sipf zeef giaf vooi!"

15 Bih-la-to dif biang lengv-hunf gee eengv,

ziuh tek Ba-la-ba sev geef-loh,

fuanf Yev-so seeh hingv.

Geef yuh mingf lingf oouv binv viat Yev-so,

seeif looif ya gauv Yev-so sev vanh,

oouv booiv dingf sipf zeef giaf.

Leekf bingv gee doou Yev-so (Haif 27:27-31; Ye 19:2-3)

16 Leekf bingv gee dai Yev-so doongv da bang zungh dukf mee vooi,

ziuh yam leekf bingv hoouf hee gua miaf.

17 Geef-loh ziuh hooi Yev-so dingv foouf teek moonf hiuf hee loouh vooi,

ya oouv unv miaf huk mauh mee,

dingv geen hau Yev-so vooi.

18 Geef-loh ziuh gingf lih Yev-so,

sauv lookf-look bov,

"Vanf suif,

voongf lengv-hunf Yiuh-haif huf hee haf!"

19 Geef-loh yuh oouv hhan ganf hiuf hee miaf bauh hau geef,

taiv namh meeif diqf geef,

hhuih longf bai geef.

20 Geef-loh doou Yev-so geeu vooi,

ziuh geq foouf teek moonf baiv huf geef neeh hiuf longf miaf,

hooi geef ziuf dingv hho yua toof-too gee leengv booiv,

ziuh dai geef uk booiv,

dif dingf sipf zeef giaf.

Dingf Yev-so geen sipf zeef giaf (Haif 27:32-44; Lukf 23:26-43; Ye 19:17-27)

21 Lai lengv-hunf Guh-lif-naif heeuv gee huf hee yam Si-meenv,

geef tih bef lai Yav-lif-san-daf hemv Luv-fuv huf hee.

Geef giangf lokf dauf voo geen miaf,

gua lengv neeh hhootf hee,

leekf bingv gee ziuh ap geef,

hooi Yev-so iaq sipf zeef giaf mee booiv.

22 Geef-loh dai Yev-so doongv lengv hhootf hee vooi,

lengv neeh hhootf hee yam Geef-geef-ta.

("Geef-geef-ta" gee if see tih lengv "Hau-lopf-lef" hhootf hee.)

23 Geef-loh oouv yan hemv yiav miaf hhiauv loouh goonf vooi sev Yev-so goonv,

biang geef dookf hhoo ziqf.

Danf tih Yev-so meenf goonv.

24 Geef-loh ziuh dingf Yev-so geen baiv sipf zeef giaf vooi;

ya yitf simv feenv hho yua Yev-so gee,

dekf naf nee yitf heekf gai gee.

25 Geef-loh dingf Yev-so geen sipf zeef giaf gee tif hoouh,

tih zauf-zau gu dem zungv.

26 Lai faif mee tia soih Yev-so gee,

tia bov,

"Voongf lengv-hunf Yiuh-haif huf hee."

27 Geef-loh ya oouv sookf ook voon huf,

hemv Yev-so hongf goonf dingf sipf zeef giaf,

huf hee dingf yoou moof maif,

huf hee dingf yoou moof vingv.

28 ^a

29 Lengv-hunf gua sunv gee zung gang go sak tek geef,

liauv geef,

ngoouf hau bov,

"If!

Meef neeh huf hee dif sek Seengf-dianf booiv,

tamv veenf zee neeif meef dif sungf huk uif leh,

30 toof-too go toof-too,

lokf baiv sipf zeef giaf longf miaf lo!"

31 Gif see ziangh gee hemv Siangf-dif lutf fapf gee lauh see,

ya tih teenf sak tek geef liauv geef,

hemv goonf bov,

"Geef go lai vanh,

meenf go lai toof-too!

32 Gi-dukf,

voongf Yih-seef-liatf huf hee haf!

En teeif meef lokf baiv sipf zeef giaf longf miaf,

sev hauf-loh dekf,

hauf-loh ziuh siang sinf meef."

Lengv-hunf hemv Yev-so dingf yoou ningf goonf neeh gee ya sak tek geef.

Yev-so hunh hheei (Haif 27:45-56; Lukf 23:44-49; Ye 19:28-30)

33 Lokf veenf da zi doongv veenf zoouf tamv dem,

lengv nee hhootf hee leeuf ziqf duf yoop lamv vooi.

34 Veenf zoouf tamv dem zungv gee tif hoouh,

Yev-so sauv lookf-look yanh,

bov,

"Yih-lov-i,

yih-lov-i!

La mah sa ba geef daf niv?"

(If-see tih,

"Siangf-dif hauf huf hee,

Siangf-dif hauf huf hee,

meef veeih gai suif hauf?"^b)

35 Lengv-hunf nyunv yoou ningf gee,

lai feenh hee hingf sook vooi,

ziuh bov,

"Meef dekf!

Geef yam Yih-lif-yav noh!"

36 Lai lengv-hunf huf hee,

deuf booiv oouv haih mianv hhootf hee miaf,

zemf yan hua zakf-zakf vooi,

gatf loouh han ganf hiuf hee,

beu sev Yev-so goonv vooi,

bov,

"Foou ziu env,

doouf-loh dekf Yih-lif-yav dif miaf go geef longf miaf meenf."

37 Yev-so yanh ziu hee lookf-look,

ziuh hhunh hheei vooi.

38 Hoopf ling yoou da Seengf-dianf deekf biakf neeh fef hee,

it ziu lokf baiv doongv dauf iakf voon fiangf vooi.

39 Loh-mah gunf deeif gee baiv fu ziangh huf hee nyunv yoou doi na Yev-so,

huh Yev-so teenf hunh hheei vooi,

ziuh bov,

"Lengv-hunf neeh huf hee,

titf-titf tih Leekf-da-hhiangh Siangf-dif huf hee!"

40 Ya lai maih gee yoou looif-looiv dekf,

hhiv zung lai Mof-daf-la gee Mah-lif-a,

ya lai lai Yav-gookf nook hemv Ye-si gee neeh huf Mah-lif-a,

gangf Sa-lov-miv.

41 Yev-so yoou Gia-lif-lif gee tif hoouh,

geef-loh gi huf duf ga di moh Yev-so,

fokf teeh Yev-so vooi.

Ya lai maih gakf gee dunf hee,

tih di moh Yev-so geen Ye-luf-sa-leengh gee,

geef-loh ya nyunv yoou ninh dekf.

Bok Yev-so (Haif 27:57-61; Lukf 23:50-56; Ye 19:38-42)

42 Veenf yoop vooi,

eenv veeih neeh veenf ngamf-ngamf tih zunh bif gee neeh veenf hee,

ziuh tih An-sikf-veenf gee sianv it veenf.

43 Yaf-lif-mah-haif heeuv gee Ye-seef,

ziuh looiv nyoof-nyoo booiv hhuf Bih-la-to,

sev tiv Yev-so mee zee geef.

Ye-seef tih gung huif gee hak huf hee,

lengv-hunf gee zung ging geef,

geef lokf hau zung vook hau sunv Siangf-dif miaf ziangh hhinf.

44 Bih-la-to tiang meenf doongv Yev-so duf ga daiv vooi,

ziuh yam baiv fu ziangh huf hee miaf,

tooi geef Yev-so tih meenf tih daiv vooi.

45 Geef lokf baiv fu ziangh neeh hhootf hee,

huh Yev-so duf ga daiv vooi,

ziuh sev tiv Yev-so mee zee Ye-seef.

46 Ye-seef vianv hoopf ganv maif-maif gee miaf vooi,

ziuh oouv tiv Yev-so mee,

lokf sipf zeef giaf longf miaf,

oouv hoopf ganv neeh gee,

miaf menf maif-maif loouh vooi,

ziuh biang loouh da feenf soongh dinf mee vooi.

Soongh neeh mee tih sakf loouh booiv gee,

geef ya luf dinf mee nyoof-nyoo miaf,

zaqf bak soongh feenh mee loouh vooi.

47 Mof-daf-la gee Mah-lif-a,

hemv maih lai Ye-si huf hee Mah-lif-a,

zung dekf huh lengv biang tiv Yev-so neeh hhootf vooi.