4 Yev-so gang inv vooi,

ziuh yam Si-meenv bov,

"Ngoouf luaf doongv namh lakf-lakf hhootf hee vooi,

biang sai longf booiv hoof bav."

5 Si-meenv tanv bov,

"Lauh see haf,

hauf-loh hoof suanf goomh nuai daiv vooi,

gai gee duf meenf hoof lai heekf.

Danf tih meef teenf gang hauf ziuh biang sai fooif hemv."

6 Geef-loh biang sai longf booiv,

ziuh hoof heekf bav dunf hee meenf huh giauh liauh,

liauh doongv sai gee dif iakf vooi,

7 geef-loh ziuh goouh moof yam luaf gakf hauv gee lengv-hunf miaf boongv geef-loh.

Luaf gakf hauv gee lengv-hunf ziuh miaf vooi,

geef-loh ziuh deengf bav dikf-dik luaf voon hauv vooi,

luaf gee hhoonv dif lak vooi.

8 Si-meenv Bih-deekf dekf huh teeh neeh gee,

ziuh hhuih dau na Yev-so vooi,

bov,

"Zu haf,

meenf ngah loo ningf hauf,

eenv veeih hauf tih lengv-hunf lai soih huf hee!"

9 Geef hemv too lai lengv-hunf yoou ningf geef neeh gee zung hhiv guaif bav neeh sai hee.

10 Hemv Si-meenv hongf goonf hoof bav gee Yav-gookf hemv Ye-hanf ya tih teenf hhiv guaif,

geef-loh voon na tih leekf da hhiangh Si-bif-haif gee.

Yev-so bov Si-meenv bov,

"Meenf ngah mangf!

Lokf nooih hoouh looif meef dif yin lengv-hunf di hoouf-hoouf miaf hemf moh hauf."

11 Geef-loh ngoouf luaf doongv ningf hhoom,

ziuh fengf longf too lai gee itf siatf hemf moh Yev-so vooi.

12 Lai fooif hee,

Yev-so yoou leekf heeuv mee,

yoou ninh lai lengv-hunf huf hee tingf ma fungv dik huf vooi,

geef it dekf huh Yev-so,

ziuh hhuih yoou dauf matf hhuf Yev-so bov,

"Zu haf,

meef zeekf hheeng yiav hauf,

hauf ziuh itf dingf maif ya bang vooi."

13 Yev-so ziuh nyof moof gamf geef,

bov,

"Hauf hheeng,

meef bang lo!"

Ma fungv it ziu ziuh huat huf geef vooi.

14 Yev-so yuh zuk geef bov,

"Meenf ngah seengv teeh neeh gee zee vanh,

meef nah guf booiv ningf gif see vooi biang geef hooi meef giamh sah,

zingf mingv meef maif vooi,

meef hheem ziuf Mov-si gui dingf gee oouv goouh gauv sev gif see,

yam geef hianf sev Siangf-dif^a,

doi na hemv goonf zingf mingv meef maif bang vooi."

15 Danf tih nooiv Yev-so mee mef suanf mef look.

Lai haih liauh lengv-hunf zipf zung miaf hingf Yev-so gang Go Siangf-dif gee,

ya haih meengh Yev-so hooi geef-loh yiav fingh.

16 Danf tih Yev-so hoi booiv da loouh vooi doouh goouf.

17 Lai veenf hee,

Yev-so maiv lengv-hunf gee tif hoouh,

lai lengv-hunf Fatf-lif-saif dangh gee hemv Siangf-dif lutf fapf gee lauh see ngov yoou ningf,

geef-loh tih lokf Gia-lif-lif seengh meenf hongf gee heeuv hemv voo,

gangf Yiuh-haif seengh hemv Ye-luf-sa-leengh heeuv miaf gee.

Zu gee neengv likf yoou ningf Yev-so boongv tooh geef,

biang geef hhoo yi yiav lengv-hunf lai fingh gee maif.

18 Neeh tif hoouh,

lai lengv-hunf oouv ga mee hamv bef han huanf huf hee miaf,

tiang hamv loouh booiv biang yoou dau na Yev-so.

19 Eenv veeih lengv-hunf liauh,

meenf huh di leeuf hamv loouh booiv,

geef-loh ziuh hamv geef geen deng lanf vooi,

hhooiv soongh vooi suih geef gangf ga mee longf booiv,

biang zingf-zing dau na Yev-so vooi.

20 Yev-so huh geef-loh teenf lai sinf sim,

ziuh bov bef han huanf neeh huf hee bov,

"Siangf-dif min soih meef gee vooi."

21 Siangf-dif lutf fapf gee lauh see hemv lengv-hunf Fatf-lif-saif dangh gee ziuh ngif leenf bov,

"Lengv-hunf neeh huf hee tih naf nee nooh?

Daf goom gang go famh Siangf-dif?

Seef Siangf-dif vooi,

naf nee min lai soih nif?"

22 Yev-so huh geef-loh ngif leenf,

ziuh bov,

"Meef-loh da timv ngif leenf gai gee nif?"

23 Bov,

'Min soih meef gee vooi' yeenh,

ha tih bov 'Meef uif miaf booiv sunv,

' yeenh nif?

24 Danf tih veeih liauh biang meef-loh huh Yeenv-zeeh yoou bak matf lai hhinf min soih."

Yev-so gang inv vooi,

ziuh hemv bef han huanf neeh huf hee gang bov,

"Hauf yam meef uif miaf,

humv ga meef mee leengv lanf lo!"

25 Lengv-hunf neeh huf hee it ziu yoou dau na hemv goonf nyunv uif,

gut gum hamv geef neeh gee leengv lanf vooi,

geef it minh booiv,

it minh ngenv Siangf-dif.

26 Hemv goonf zung hhiv guaif,

ya ngenv Siangf-dif,

ya meenf huh giauh mangf,

bov,

"Veenf nooih doouf-loh dekf heekf meenf fingf tiangf gee teeh vooi."

27 Teeh neeh gee hoouh looif,

Yev-so uk booiv,

dekf huh bef suv suif huf hee yam Lif-vuif hee,

ngov yoou lengv suv suif hhootf hee,

Yev-so ziuh yam geef bov,

"Meef miaf hemf moh hauf!"

28 Geef ziuh gengf longf geef too lai gee itf siatf,

uif miaf hemf moh Yev-so vooi.

29 Lif-vuif yoou lanf geef hungf ngaif goonv moov ziau daif Yev-so,

ya lai bef suv suif dunf hee gangf hhiv ha gee lengv-hunf miaf hemv geef-loh hongf goonf goonv fiah.

30 Lengv-hunf Fatf-lif-saif dangh gee hemv Siangf-dif lutf fapf gee lauh see dekf huh vooi ziuh meenf moon,

ziuh bov meenv huv Yev-so gee bov,

"Meef-loh di leeuf hemv suv suif gee gangf lengv-hunf lai soih gee hemv goonf goonv fiah nif?"

31 Yev-so tanv geef-loh bov,

"Lengv-hunf meenf lai fingh gee meenf si iauf i seeng,

lengv-hunf lai fingh gee nah si iauf.

32 Hauf miaf meenf tih yam ngif yinv huiv gaih,

tih yam lengv-hunf lai soih gee huiv gaih."

33 Geef-loh bov Yev-so bov,

"Meenv huv Ye-hanf gee siangf-siangf gim goonv doouh goouf,

meenv huv Fatf-lif-saif dangh gee ya tih teenf hee;

nah lai meenv huv meef gee ya goonv ya leeq."

34 Yev-so bov geef-loh bov,

"Sin langv hemv feengf yu gee yoou ningf goonf gee tif hoouh,

dif yam feengf yu gee gim goonv haf?

35 Doongv nooih lengv-hunf dif hoof sin langv booiv,

neeh duanf tif ganv hee geef-loh ziuh dif gim goonv vooi."

36 Yev-so yuh hemv geef-loh gang bih yif mee,

bov,

"Meenf lai lengv-hunf iakf yua nauh hiuf hee miaf feengv yua gat hiuf hee.

Zeekf tih teenf hee,

ziuh iakf yua nauh hiuf hee faih vooi,

hoopf nauh iakf longf miaf neeh hhootf hee hemv yua gat hiuf hee ya meenf liang goonf.

37 Ya meenf lai lengv-hunf oouv yan nauh deengf loouh hau hooih nangv mee.

Zeekf tih teenf hee,

yan nauh gee nge gikf hau hooih nangv mee iakf,

yan gee ziuh loqf vooi,

hau hooih mee ya faih vooi.

38 Siang fanh,

yan nauh gee hheem deengf loouh hooih nangv nauh vooi.

39 Lengv-hunf gee goonv yan lauh vooi,

ya dif tiang goonv yan nauh yoou haf?

Geef zung ngenv yan lauh gee maif."