6 Yev-so zip longf gang bih yif mee bov,

"Lai lengv-hunf huf hee sav uh hua goh dun hee yoou da veen fuh hoouv mee.

Geef miaf doongv ningf gooh dun hee div dekf lai makf meenf,

danf tih meenf div lai heekf,

7 ziuh yam guanh gongv huf hee bov,

'Meef dekf,

tamv veeif vooi,

hauf miaf doongv ningf dun un hua goh neeh dun hee div makf,

danf tih meenf div lai heekf.

Damh geef booiv lo,

ha zinf teengh geef langf lengv.'

8 Guanh gongv huf hee bov,

'Zu haf,

luf geef veeif hemv zaix.

Foou hauf zauv hau longf feeiv loouh,

9 veeif na zeekf tengv makf,

doouf ziuh teengh geef yoou,

zeekf meenf tengv makf nah damh geef booiv.'"

10 An-sikf-veenf Yev-so yoou da huif hangv maiv lengv-hunf.

11 Lai maih huf hee bif yif hangv geen huf ziuh fingh teepf bet veeif vooi,

loou mee omf meenf teenf lai ziqf-ziqf.

12 Yev-so dekf huh vooi,

ziuh yam geef gua miaf,

hemv geef gang bov,

"Ba haf,

fingh meef gee maif vooi!"

13 Yev-so ziuh zav moof geen huf geef,

loou geef mee ziuh mah siangf teenf vooi,

geef ziuh ngenv Siangf-dif.

14 Lengv-hunf guanh lih huif hangv gee eenv veeih Yev-so yoou An-sikf-veenf yiav fingh,

ziuh hhif tuf-tuf teenf hee bov hemv goonf bov,

"Lai sok veenf hhoo yi huk gongv,

dif yiav fingh ziuh yoou neeh sok veenf yiav,

danf tih meenf zun yoou An-sikf-veenf yiav fingh."

15 Yev-so bov,

"Gev maif gee lengv-hunf haf,

meef-loh naf nee yoou An-sikf-veenf meenf geq teei geq luh gee,

diuf booiv goonv namh le?

16 Maih neeh huf hee tih leekf lanv Yav-bov-la-hanf gee,

meef dekf,

geef bif Sav-danf menf teepf bet veeif vooi,

hauf yoou An-sikf-veenf gev geef ya sook vooi haf?"

17 Lengv-hunf fanh deeif Yev-so neeh gee hingf heekf go neeh gee,

na zung se inv vooi;

danf tih too lai gee lengv-hunf eenv veeih dekf huh Yev-so huk gua itf siatf hhiv miauf gee teeh zung eengv.

18 Yev-so bov,

"Siangf-dif gee gok gav zing gai gee teenf hee nif?

Hauf oouv gai gee miaf bi maif nif?

19 Geef zing leekf voonf sak mee teenf hee,

lengv-hunf oouv geef sav loouh da veen vooi,

nyoo uif zing dun dun hee teenf hee,

nokf gee ya vinv geen baiv vooi zok lukf."

20 Yev-so yuh bov,

"Siangf-dif gee gok gav dif oouv gai gee miaf bi nah maif nif?

21 Geef zing fauf taf teenf hee,

lai maih huf hee oouv miaf saiv loouh boonh menh ngih teepf lengf geenv vooi,

zi doongv menh gee suanv buf fat uif."

22 Yev-so geen Ye-luf-sa-leengh,

yoou heeuv hemv voo geef gua-gua neeh gee maiv lengv-hunf.

23 Lai lengv-hunf huf hee tooi Yev-so bov,

"Zu haf,

deekf giuf gee lengv-hunf meenf liauh ba?"

24 Yev-so bov hemv goonf bov,

"Meef-loh hheem gukf lingf otf lokf deenh zek loouh booiv.

Hauf seengv meef-loh,

doongv nooih lai haih liauh lengv-hunf dif tiang loouh booiv,

danf tih ya meenf loouh lai.

25 Foou doongv lanf zu uif miaf langv deenh vooi,

meef-loh nyunv yoou uk ninh hhauv deenh iangv bov,

'Zu haf,

hheeif deenh sev hauf-loh loouh booiv teef!'

Danf tih lanf zu bov,

'Hauf meenf took meef-loh,

meenf huh meef-loh tih lokf leeuf miaf gee!'

26 Neeh tif hoouh meef-loh dif bov,

'Gua na hauf-loh hemv meef hongf goonf goonv fiah gua,

meef ya yoou da gaiv maiv hauf-loh gua.'

27 "Lanf zu nge bov,

'Hauf seengv meef-loh,

hauf meenf huh meef-loh tih lokf leeuf miaf gee.

Meef-loh lengv-hunf neef huk seeu neeh gee,

deuf looif-looiv geef.'

28 "Meef-loh dif dekf huh Yav-bov-la-hanf,

Yih-sav,

Yav-gookf hemv sian zi hoouf hee zung yoou da Siangf-dif gee gok gav,

danf tih meef-loh dif bif voouf uk booiv,

nge yoou ninh ngai deengh seeq.

29 Dongv,

noomf,

tooiv,

beek,

zung dif lai lengv-hunf miaf,

ngov yoou da Siangf-dif gee gok gav goonv moov.

30 Noh,

yoou looif gee doongv nooih dif yoou na,

yoou na gee doongv nooih dif yoou looif."

31 Zing yoou neeh tif hoouh,

lai lengv-hunf Fatf-lif-saif dangh gi huf miaf seengv Yev-so bov,

"Meenf ngah yoou nooih vooi,

booiv lengv gakf hhootf lo,

eenv veeih Hi-lutf dif tiang ga meef nenh!"

32 Yev-so bov geef-loh bov,

"Meef-loh booiv seengv meuf tiaf neeh huf hee bov,

'Noh,

veenf nooih,

bak zeekf,

hauf ya dif gif zukf voouf yif hangv yiav fingh yoou,

haih tamv veenf gongv hauf gee ziuh huk inv vooi.'

33 Tuif yianf tih teenf hee,

veenf nooih,

bak zeekf,

doong loof hauf ya hheem gif zukf booiv,

eenv veeih sian zi luat lengv Ye-luf-sa-leengh gee vooi bif ga,

tih meenf heekf gee.

34 "Ye-luf-sa-leengh haf Ye-luf-sa-leengh!

Meef siangf-siangf ga sian zi,

ya oouv dinf zakf lengv-hunf Siangf-dif faif booiv ningf meef neeh hhootf gee daiv vooi.

Hauf haih liauh fooif dif boouh huf leekf ngif meef gee,

zing maih gaiv yam leekf gaiv zuanv loouh dauf bik vooi teenf hee,

danf tih meef-loh meenf hheeng.

35 Meef dekf,

lanf meef-loh gee dif leemf vooi^a.

Hauf seengv meef-loh,

lokf nooih hoouh looif,

meef-loh zaif meenf huh hauf fooif hemv vooi,

zi doongv meef-loh bov 'Feenf nooiv Zu mee miaf gee tih gaiv lai ngenv gee.'"