Maih mai ngah huf hee gee feengf hianf (Hheev12:41-44)
21
1 Yev-so doongf hau uif dekf,
huh lengv-hunf lai sinf gee zung biang sinf loouh tiangv feengf hianf mee vooi,
2 ya huh maih mai ngah huf hee biang leekf luif sinf voon mooqf loouh booiv,
3 ziuh bov,
"Hauf titf-titf seengv meef-loh,
maih mai ngah neeh huf hee biang loouh booiv gee bih leeuf na duf liauh,
4 eenv veeih hemv goonf zung tih oouv teengh longf gee miaf biang loouh booiv;
danf tih maih mai neeh huf hee linf sinf geef goonv fiah gee duf oouv inf-inv miaf biang loouh booiv vooi."
Gang dif fah Seengf-dianf (Haif24:1-2;Hheev13:1-2)
5 Lai lengv-hunf feenh hee bov Seengf-dianf tih oouv dinf hheekf see luang gee hemv oouv goouh hianf sev Siangf-dif gee miaf zoongv gee.
6 Yev-so ziuh bov,
"En teeif meef-loh ngenv dav dekf huh neeh gee,
doongv nooih dif fah booiv,
linf dinf voon hhootf donh geen goonf gee duf meenf lai."
Gi-dukf dif leengv gee ziauf heeuv (Haif24:3-14;Hheev13:3-13)
7 Geef-loh ziuh tooi Yev-so bov,
"Lauh see,
gi tif lai teeh neeh gee nif?
Dif fatf seeng teeh neeh gee gee tif hoouh,
lai gai gee ziauf heeuv nif?"
8 Yev-so bov,
"Meef-loh hheem zuf if,
meenf ngah sev vanh tuat,
eenv veeih doongv nooih dif lai haih liauh lengv-hunf gev nooiv hauf mee miaf,
bov,
'Hauf tih Gi-dukf',
ya bov,
'Tif hoouh dif hhooiv doongv vooi.
'" Yev-so yuh zuk bov,
"Meef-loh meenf ngah hemf moh geef-loh,
9 meef-loh hingf heekf git sinh hemv zoouf fanh gee tif hoouh,
meenf ngah mangf,
eenv veeih itf dingf sian lai teeh neeh gee fatf seeng,
danf tih enf meenf doongv sif gaif mof yitf yoou."
10 Yev-so zip longf yuh bov,
"Minv zukf dif git minv zukf,
gok gav dif git gok gav,
11 doongv nooih dif lai daf dif zinf,
doongv lengv duf lai daiv yiak,
daiv zooiv,
yoou baiv fa ya dif lai tee mangf gee siau zeef yianv gee gingh siangf hemv daf seenv zif.
12 Fatf seeng teeh neeh gee zee sianv,
eenv veeih meef-loh tih meenv huv hauf gee,
lengv-hunf dif hoof meef-loh,
bik meef-loh,
dai booiv huif hangv vooi tooi go,
hoop loouh da gamv vooi,
ya dif leeh meef-loh booiv dau na voongf dooi hemv voongv yev gee vooi tooi go.
13 Neeh tif hoouh,
meef-loh ziuh lai gi huif zingf mingv guan i hauf gee teeh zung tih titf gee.
14 Meef-loh meenf ngah ginh ziang,
ya meenf ngah sian hhauh lif dif di leeuf tanv,
15 eenv veeih hauf dif sev hheeuh saiv hemv zif huif zee meef-loh,
biang dikf yinv meef-loh gee zung meenf ding lai on,
meenf gang lai gua meef-loh.
16 Linf bef maih,
engv tok,
sinf sik,
feengf yu meef-loh gee,
ya dif gauv meef-loh sev hak gee,
meef-loh ya lai bif geef-loh haih daiv gee.
17 Eenv veeih meef-loh tih meenv huv hauf gee,
lengv-hunf ziuh dif zookf meef-loh,
18 danf tih meef-loh linf fuiv hiuf hee duf meenf loomh lai.
19 Meef-loh hheem tuh doongv dooi,
ziuh boouh lai honf tinf toof-too mee on.
Gang doongv nooih dif fah Ye-luf-sa-leengh (Haif24:15-21;Hheev13:14-19)
20 "Meef-loh gi tif dekf huh bingv gee vif heeuv Ye-luf-sa-leengh mee,
ziuh huh heeuv neeh mee dif hhooiv leemf vooi.
21 Neeh tif hoouh,
zih yoou Yiuh-haif gee,
hheem deuf geen baiv tiah vooi,
yoou da heeuv gee,
hheem deuf uk miaf,
yoou dauf voo gee,
meenf ngah booiv heeuv.
22 Eenv veeih neeh duanf tif ganv tih Siangf-dif fatf lengv neeh hhootf gee lengv-hunfa,
biang ging veenv tia gee zung bin tingf titf.
23 Yoou neeh duanf tif ganv,
guaf leekf gee hemv hoo noq leekf gee lai huah vooi,
eenv veeih yoou lengv neeh hhootf hee dif lai daf zai nanf,
Siangf-dif yianf hhif vooi,
dif sih lih lengv-hunf Yiuh-haif gee.
24 Geef-loh nge dif daiv yoou bak mitf,
ya dif bif hoof booiv tan tav yoou haih liauh gee gok gav.
Lengv-hunf hhiv ha minv zukf gee dif dook dif sah Ye-luf-sa-leengh,
zi doongv Siangf-dif fatf geef-loh gee tif ganv moon.
Yeenv-zeeh dif miaf (Haif24:29-31;Hheev13:24-27)
25 "Neeh tif hoouh,
da veenf,
maih saiv,
leekf saiv neeh gee zung dif lai hhiv guaif gee ziauf heeuv,
langh da hai gee git sauv meenf huh giauh look,
tee lengv-hunf bak matf gee zung mangf ngeenf vooi.
26 Lengv-hunf gee tiang doongv tooi ganv dif fatf seeng gee teeh,
zung mangf hunf vooi,
eenv veeih fa gee zung dif ngoouf.
27 Neeh tif hoouh,
too lai gee lengv-hunf dif dekf huh Yeenv-zeeh dai neengv likf hemv yungv yauf lokf da bah longf miaf.
28 Teeh neeh gee fatf seeng gee tif hoouh,
meef-loh hheem heenv ook doongf hau uif,
eenv veeih tukf meef-loh go meef-loh gee tif ganv doongv vooi."
Dun uh hua goh gee bih yif (Haif24:32-35;Hheev13:28-31)
29-30 Yev-so yuh hemv geef-loh gang bih yif mee bov,
"Meef-loh dekf dun uh hua goh gee hemv dun hhiv ha gee;
geef-loh giangf dof boof,
meef-loh ziuh huh mah siangf dif doongv fa lun vooi.
31 Hongf yiangh,
meef-loh gi tif dekf huh teeh neeh gee fatf seeng,
ziuh huh Siangf-dif gee gok gav mah siangf dif miaf doongv vooi.
32 Hauf titf-titf seengv meef-loh,
tooi ganv neeh mee gee lengv-hunf enf meenf daiv inv yoou,
teeh neeh gee itf dingf fatf seeng.
33 Fa matf dif fah vau booiv,
danf tih go hauf gee yungh yuanh meenf vau lai.
Zuk meenv huv gee hheem zuf if
34 "Meef-loh hheem zuf if,
ha zinf ham goonv,
meeif yan,
fangf dangf,
gangf nyung nyang seeng huatf neeh gee,
huk timv meef-loh gee luaq vooi,
zeekf tih teenf hee,
mangf neeh veenf hee dif it ziu miaf doongv,
zing sai teenf hee deengv meef-loh loouh vooi,
35 eenv veeih yoou neeh veenf hee,
teeh neeh gee itf dingf fatf seeng yoou tooi ganv gee lengv-hunf.
36 Meef-loh gi tif duf hheem zeeq tooi,
siangf-siangf doouh goouf,
biang meef-loh deuf lai luat neeh itf siatf dif miaf gee teeh,
hau lai na dav nyunv yoou dau na Yeenv-zeeh."