7 Seef-hiauf-ziatf doongv vooi,

yoou neeh veenf hee itf dingf hheem ga leekf tuangf Yih-yuatf-ziatf huf hee.

8 Yev-so yam Bih-deekf hemv Ye-hanf,

bov,

"Meef-loh booiv zunh bif goomh Yih-yuatf-ziatf doouf-loh dif goonv neeh don hee."

9 Geef-loh voon na tooi Yev-so,

bov,

"Meef yam hauf-loh booiv leeuf zunh bif?"

10 Yev-so bov,

"Noh,

meef-loh loouh heeuv vooi,

itf dingf am heekf lengv-hunf huf hee zunv namh eng hee doi na gua miaf,

meef-loh ziuh hemf moh geef booiv,

geef loouh lanf leeuf mooqf meef-loh ya di moh loouh booiv,

11 hemv lanf zu gang bov,

'Lauh see tooi meef bov,

hauf hemv seeh huv hauf gee yoou foongf leeuf mooqf goonv goomh Yih-yuatf-ziatf neeh don hee nif?'

12 Geef itf dingf yin meef-loh geen loouf vooi booiv dekf foongf mee,

foongf neeh mee nyoof-nyoo duf ga buf zif maif-maif vooi,

meef-loh ziuh yoou ninh zunh bif."

13 Geef-loh booiv vooi,

am heekf gee teeh zing Yev-so gang gee teenf hee.

Geef-loh ziuh yoou ninh zunh bif goomh Yih-yuatf-ziatf neeh don hee vooi.

14 Doongv goonv goomh gee tif ganv vooi,

Yev-so ziuh hemv seeh huv gee hongf goonf goonv fiah.

15 Yev-so hemv geef-loh gang bov,

"Hauf hheekf see tiang yoou bif haih zee sianv,

hemv meef-loh goonv goomh Yih-yuatf-ziatf neeh don hee.

16 Hauf seengv meef-loh,

hauf meenf goonv goomh neeh gee fooif hemv vooi,

zi doongv geef yoou Siangf-dif gee gok gav lai zin zingf gee if ngif."

17 Yev-so zip yan zungv hee gua miaf,

gamh siaf Siangf-dif vooi,

bov,

"Meef-loh nganv yan neeh zungv hee,

di na goonv di bak.

18 Hauf seengv meef-loh,

lokf nooih hoouh looif,

hauf meenf goonv yan fuh hoouv neeh gee fooif hemv vooi,

zi doongv Siangf-dif gee gok gav miaf doongv."

19 Geef yuh nganv bing mee uif,

gamh siaf Siangf-dif vooi,

loot vooi beu sev seeh huv gee,

bov,

"Neeh tih bun tinv hauf mee,

veeih meef-loh hianf geen gee,

meef-loh ya hheem teenf huk tih miaf gif niamf hauf."

20 Goonv fiah hoouh looif,

Yev-so ziuf nganv zungv mee uif,

bov,

"Neeh tih baq hauf gee --- tih Siangf-dif naux eef hemv lengv-hunf maif goonf gee zingf gif,

baq neeh gee tih veeih meef-loh leeiv gee.

21 Danf tih meef-loh dekf,

lengv-hunf ing hauf neeh huf hee yoou nooih hemv hauf hongf hooif goonv fiah.

22 Yeenv-zeeh itf dingf hheem ziuf Siangf-dif an faiv gee gua tooi,

danf tih lengv-hunf ing Yeenv-zeeh gee neeh huf hee lai huah vooi!"

23 Geef-loh ziuh hemv goonf tooi goonf,

yoou da geef-loh naf nee dif huk teeh neeh gee.

24 Meenv huv gee yuh hemv goonf zengv,

yoou da geef-loh naf nee zuif nyoo.

25 Yev-so bov geef-loh bov,

"Tooi ganv gee voongf dooi duf meenf maif-maif guanh lih bek ting geef gee,

voongf dooi neeh gee ya toof-too bov toof-too gongv loouf nyoo.

26 Danf tih meef-loh meenf ngah teenf hee.

Siang fanh,

yoou da meef-loh zuif nyoo gee,

hheem zing nenf tui nook gee teenf hee;

huk hau gee,

hheem zing heng hoouh lengv-hunf gee teenf hee.

27 Naf nee nyoo nif?

Tih ngov yoou baiv hooif goonv gee haf?

Ha tih heng hoouh lengv-hunf gee nif?

Meenf tih ngov baiv hooif goonv gee haf?

Danf tih,

hauf yoou da meef-loh zing heng hoouh lengv-hunf gee teenf hee.

28 Lengv-hunf duf fanh deeif hauf gee tif hoouh,

meef-loh zung yoou ningf hauf.

29 Too yi,

hauf dif sev hhinf zee meef-loh huk voongf,

zing bef lai hauf sev hhinf zee hauf huk voongf teenf hee,

30 biang meef-loh yoou hauf huk voongf gee tif hoouh,

hemv hauf hongf hooif goonv,

ya ngov yoou baiv henh,

simh fuanf Yih-seef-liatf gee teepf ngeeih mooqf zi faif."

31 Yev-so yuh bov,

"Si-meenv haf Si-meenv,

noh,

Sav-danf dif tiang deekf doongv meef-loh mui na lengv-hunf,

hau loongf meef-loh zing loongf mekf teenf hee.

32 Danf tih hauf duf ga hooi meef hhuf Siangf-dif vooi,

biang sinf sim meef gee meenf bin lai,

foou meef zuanh leengv miaf hoouh looif,

hheem guh lif engv tok meef gee geengf lai sinf sim."

33 Bih-deekf bov,

"Zu haf,

hauf duf ga zun bif maif hemv meef ngov gamv,

hemv meef booiv daiv vooi."

34 Yev-so bov,

"Bih-deekf haf,

hauf seengv meef,

veenf nooih gaiv meenf tanv yoou,

meef dif tamv fooif meenf nginh hauf."

35 Yev-so yuh tooi geef-loh bov,

"Gua na hauf faif meef-loh uk booiv gee tif hoouh,

meef-loh meenf dai hooih sinf,

meenf dai hooih hemv haif gee booiv,

meef-loh hhiat gai gee meenf?"

Geef-loh tanv bov,

"Meenf."

36 Yev-so bov,

"Danf tih en teeif,

lai hooih sinf gee hheem dai booiv,

lai hooih gee ya hheem dai booiv,

meenf lai mitf gee hheem ing hho yua booiv vianv mitf.

37 Hauf seengv meef-loh,

yoou da ging veenv tia bov,

'Geef dif bif faif yoou da lengv-hunf lai soih gee.

'^b Go neeh gee yoou baiv huf hauf itf dingf bin tingf titf,

eenv veeih guan i hauf gee teeh itf dingf bin tingf titf."

38 Meenv huv gee bov,

"Zu haf,

meef dekf,

yoou nooih lai mitf voon ziangv."

Yev-so bov,

"Geeu vooi."

39 Yev-so uk miaf,

zing fingf tif teenf hee booiv tiah Gamh-lamv mee,

meenv huv gee ya hemf moh geef booiv.

40 Doongv tiah Gamh-lamv vooi,

Yev-so ziuh bov geef-loh bov,

"Meef-loh hheem doouh goouf,

ha zinf yif hangv tuat meef-loh."

41 Yev-so ziuh lif hhooiv geef-loh,

daf hhaif zing gengf leekf dinf mee teenf looiv,

hhuih longf doouh goouf,

42 bov,

"Fa bef haf,

meef zeekf hheeng,

ziuh meenf ngah biang hauf tuh hho neeh gee,

danf tih,

meenf ngah ziuf hauf gee if see,

hheem ziuf meef gee zih if huk tingf."

43 Lai hian seeh huf hee lokf baiv fa longf miaf,

gav likf liangh zee geef.

44 Yev-so hheekf see tiangv timv ngaif tuh,

ziuh geengf yungh timv doouh goouf,

hoonh gee zing baq teenf hee di dem dem nyoof-nyoo zeeq dauf matf vooi.

45 Yev-so doouh goouf inv vooi,

ziuh uif miaf,

booiv ningf meenv huv gee,

huh geef-loh eenv veeih munh nuai duf ga suanv vooi,

46 ziuh bov geef-loh bov,

"Meef-loh veeih gai lap suanv nif?

Uif miaf doouh goouf!

Ha zinf yif hangv tuat meef-loh."

47 Yev-so enf gang go yoou,

it ziu ziuh lai lengv-hunf hoouf hee miaf vooi.

Lai huf hee yam Yiuh-daf hee,

booiv yoou na,

geef tih teepf ngeeih huf seeh huv hhiv zung gee huf hee,

geef booiv doongv ningf Yev-so vooi,

dif hoomv Yev-so.

48 Danf tih,

Yev-so bov geef bov,

"Yiuh-daf,

meef hoomv bak huk amf hoouf ing Yeenv-zeeh haf?"

49 Lengv-hunf yoou ningf Yev-so neeh gee dekf huh singv hhuangf meenf maif,

ziuh bov,

"Zu haf,

hauf-loh oouv mitf damh lo?"

50 Gang meenf luat bak yoou,

yoou da geef-loh duf ga lai huf hee damh heekf leekf nof daf gif see huf hee vooi,

damh sav moof maif geef fiangf hee loomh vooi.

51 Yev-so bov,

"Maif lo,

meenf ngah git vooi!"

Ziuh gamf sav lengv-hunf neeh huf hee,

sav geef fiangf hee ziuh maif vooi.

52 Yev-so bov lengv-hunf miaf hoof geef neeh gee,

ziuh tih bov gif see ziangh hemv hau gingh vuif foou Seengf-dianf neeh gee gangf ziangh lauh gee bov,

"Meef-loh dai mitf dai gunf uk miaf hoof hauf,

zing hoof sookf teenf hee haf?

53 Hauf veenf-veenf duf hemv meef-loh yoou da Seengf-dianf,

meef-loh meenf longf moof hoof hauf.

Danf tih,

en teeif tih meef-loh gee tif ganv,

tih yoop lamv ziangh hhinf gee tif ganv vooi."

54 Geef-loh hoof Yev-so vooi,

dai geef doongv lanf daf gif see mee.

Bih-deekf yoou looif-looiv hemf moh.

55 Geef-loh yoou da bang ngupf veeif loongv vooi,

hemv goonf ngov lingf veeif,

Bih-deekf ya ngov yoou da geef-loh.

56 Lai leemf leekf huk nof huf hee dekf huh Bih-deekf ngov yoou ningf veeif,

ziuh vook geef itf-it teenf hee,

bov,

"Lengv-hunf neeh huf hee ya tih Yev-so neeh hoouf gee."

57 Danf tih,

Bih-deekf meenf singv nginf,

bov,

"Leemf leekf meef neeh huf hee,

hauf meenf took geef."

58 Gua meenf gi foong,

yuh lai lengv-hunf huf hee dekf huh geef,

bov,

"Meef ya tih geef-loh neeh hoouf gee."

Bih-deekf bov,

"Lengv-hunf meef neeh huf hee!

Hauf meenf tih."

59 Daf hhaif gua zungv hau mooqf hee vooi,

yuh lai lengv-hunf huf hee hheenh dingf bov,

"Lengv-hunf neeh huf titf-titf tih Yev-so neeh hoouf gee,

eenv veeih geef ya tih lengv-hunf Gia-lif-lif gee."

60 Bih-deekf bov geef,

"Lengv-hunf meef neeh huf hee!

Hauf meenf huh meef gang gai gee."

Bih-deekf enf gang go yoou,

gaiv ziuh tanv vooi.

61 Zu tuanh huf gua miaf vook Bih-deekf.

Bih-deekf ziuh tiang uif Zu hemv geef gang go neeh gee gua,

'Veenf nooih gaiv meenf tanv yoou,

meef dif tamv fooif meenf nginh hauf.'

62 Tiang heekf go neeh gee,

Bih-deekf ziuh heekf see tiangv timv deuf uk booiv ngai.

63 Lengv-hunf foou vook Yev-so neeh gee hhiv manf Yev-so,

liauv geef,

git geef,

64 yuh oouv hoopf miaf gatf dav geef deei hee loouh vooi,

tooi geef bov,

"Meef zeekf tih sian zi,

meef bov,

naf nee git meef?"

65 Geef-loh ya gang go haih liauh ngaif yo gee an geef.

66 Veenf giangf bangv,

bek ting gee ziangh lauh hemv gif see ziangh gee gangf Siangf-dif lutf fapf gee lauh see,

hemv goonf zipf zung hhai huif,

dai Yev-so miaf tooi go,

67 geef-loh hemv goonf tooi geef bov,

"Seengv hauf-loh,

meef tih Gi-dukf meenf?"

Yev-so tanv bov,

"Hauf zeekf seengv meef-loh,

meef-loh ya zuatf deeif meenf zun;

68 hauh zeekf tooi meef-loh,

meef-loh ya zuatf deeif meenf seengv hauf.

69 Lokf nooih hoouh looif,

Yeenv-zeeh dif ngov yoou ningf moof maif zuif heen gee Siangf-dif."

70 Geef-loh zung bov,

"Teenf hee,

meef tih Leekf-da-hhiangh Siangf-dif huf hee haf?"

Yev-so tanv bov,

"Meef-loh gang heekf vooi."

71 Geef-loh bov,

"Doouf-loh meenf ngah oouv gai gee zingf gif vooi,

go geef toof-too gang gee,

doouf-loh duf ga sin zeef hingf heekf vooi."