3 Yev-so bov, "Hauf titf-titf seengv meef, lengv-hunf zeekf meenf sungf lai gua, geef neeh tooi hee, ziuh meenf dekf lai huh Siangf-dif gee gok gav."

4 Niv-gee-tiv-muh bov, "Lengv-hunf lauh vooi, di leeuf sungf lai lai nif? Geef dif loouh lai boqf maih fooif hemv sungf lai uk miaf haf?"

5 Yev-so bov, "Hauf titf-titf seengv meef, lengv-hunf zeekf meenf tih lokf namh hemv Seengf-lingv lai gee, ziuh meenf loouh lai Siangf-dif gee gok gav. 6 Lengv-hunf gee bun tinv tih lokf bef maih lai gee, danf tih lengv-hunf gee lingv tih lokf Seengf-lingv lai gee. 7 Too yi hauf hemv meef gang, 'Meef-loh itf dingf hheem sungf lai gua', meef meenf ngah gamh doongv hhiv guaif. 8 Van ooi di leeuf siau ziuh di leeuf siau, meef hingf huh sauv geef mee, danf tih meenf huh geef lokf leeuf miaf, dif booiv leeuf. Neef lokf Seengf-lingv lai gee, ya tih teenf hee."

9 Niv-gee-tiv-muv tooi geef bov, "Di leeuf lai teeh neeh gee nif?"

10 Yev-so bov, "Meef tih lauh see lengv-hunf Yih-seef-liatf gee, ya meenf mingf fekf teeh neeh gee yoou haf? 11 Hauf titf-titf seengv meef, hauf-loh gang gee tih hauf-loh huh gee; hauf-loh zingf mingv gee tih hauf-loh huh gua gee; danf tih meef-loh meenf siang sinf hauf-loh zingf mingv gee. 12 Hauf seengv teeh dauf matf gee zee meef-loh, meef-loh duf meenf zun, zeekf seengv teeh baiv fa gee zee meef-loh, meef-loh dif zun haf? 13 Seef lokf baiv fa longf miaf gee Yeenv-zeeh vooi, meenf lai naf nee geen fa gua. 14 Ziuh zing Mov-si yoou da loouh doongf ngiaf hongf huf hee uif go lengv-hunf Yih-seef-liatf gee teenf hee, Yeenv-zeeh ya itf dingf hongf yiangh bif doongf uif, 15 biang too lai siang sinf geef gee lengv-hunf, zung lai yungh seeng."

16 Siangf-dif meenf huh giauh dookf tooi ganv gee lengv-hunf, linf geef toof-too gee Dukf-seeng-zeeh duf sev zee geef-loh, biang itf siatf lengv-hunf siang sinf geef neeh gee, meenf miatf voongv, fanh deekf doongv yungh seeng. 17 Eenv veeih Siangf-dif faif Leekf-da-hhiangh geef huf hee miaf doongv tooi ganv, meenf tih dif dingf soih tooi ganv lengv-hunf gee, tih dif hongv gua Leekf-da-hhiangh geef huf hee biang tooi ganv gee lengv-hunf deekf giuf. 18 Siang sinf geef gee lengv-hunf meenf bif dingf soih, neef meenf siang sinf gee, soih duf ga bif dingf vooi, eenv veeih geef meenf siang sinf Siangf-dif gee Dukf-seeng-zeeh. 19 Bangv miaf doongv tooi ganv, tooi ganv gee lengv-hunf eenv veeih toof-too gee hengf hongh seeu, meenf ooi bangv deuf booiv ooi yoop, ziuh tih eenv veeih teenf hee nah dingf soih geef-loh gee. 20 Neef huk seeu gee zung zookf bangv, meenf hheeng loo ningf bangv, eenv veeih geef mangf bangv dif boouf luf geef huk gee seeu teeh uk miaf. 21 Danf tih lengv-hunf ziuf zinv li booiv huk neeh gee, duf ooi loo ningf bangv, eenv veeih bangv hhoo yi biang vanh huh geef huk itf siatf gee teeh, zung tih ziuf Siangf-dif gee timv i miaf huk gee.

22 Teeh neeh gee hoouh looif, Yev-so hemv meenv huv geef gee miaf doongv bak lengv Yiuh-haif gee. Geef yoou ninh hemv geef-loh hongf goonf zih, ya hemv vanh tuk leei. 23-24 Neeh tif hoouh vanh enf meenf hoof Ye-hanf loouh gamv yoou, geef yoou ningf Sa-linv gee Ai-neenf neeh hhootf hee ya hooi vanh tuk leei, eenv veeih yoou ninh namh liauh. Hemv goonf zung booiv tuk leei. 25 Meenv huv Ye-hanf gee hemv lengv-hunf Yiuh-haif huf hee, veeih leei bang mee zengv. 26 Geef-loh ziuh miaf div Ye-hanf, tooi geef bov, "Lauh see, meef dekf, gua na meef hemv geef yoou Ye-danf hoov gee fiangf ninh hhoom, meef hooi geef huk zingf mingv gee neeh huf hee, en teeif geef ya hooi vanh tuk leei, leeuf na duf booiv ningf geef vooi."

27 Ye-hanf tanv bov, "Zeekf meenf tih Siangf-dif sev gee, lengv-hunf ziuh meenf deekf lai doongv gai gee. 28 Hauf bov gua, 'Hauf meenf tih Gi-dukf, hauf meenf gua tih sian faif miaf hooi geef hhooiv sunv gee', meef-loh toof-too hhoo yi hooi hauf huk zingf mingv. 29 Oouv niangf gee tih sin langv. Feengf yuh sin langv gee nyunv yoou ningf hingf, it hingf huh sauv sin langv mee vooi, ziuh meenf huh giauh eengv. Hongf yiangh en teeif hauf duf ga eengv duf ga moonh zukf vooi. 30 Geef itf dingf mef miaf mef nyoo, hauf itf dingf mef miaf mef nook."

31 "Lokf baiv fa miaf gee neeh huf hee, hangv gua itf siatf; lokf tooi ganv miaf gee, tih sukf i tooi ganv, geef gang gee itf siatf ya tih tooi ganv gee teeh. Lokf baiv fa miaf gee neeh huf hee, hangv gua itf siatf. 32 Geef veeih geef too dekf huh hingf huh gee huk zingf mingv, danf tih geef zingf mingv gee, meenf lai lengv-hunf siang sinf. 33 Lengv-hunf neef siang sinf geef zingf mingv neeh gee, ziuh tih zap inf loouh vooi, singv nginf Siangf-dif tih zinv gee. 34 Siangf-dif faif miaf gee neeh huf hee, gang go Siangf-dif gee, eenv veeih Siangf-dif sev Seengf-lingv gee neengv likf meenf huh giauh liauh zee geef vooi. 35 Bef lai dookf Leekf-da-hhiangh geef huf hee, duf ga gauv itf siatf loouh moof geef vooi. 36 Lengv-hunf siang sinf Leekf-da-hhiangh geef huf gee, ziuh lai yungh seeng; meenf siang sinf Leekf-da-hhiangh geef huf gee, ziuh meenf lai yungh seeng, Siangf-dif itf dingf yianf hhif geef, fatf geef."