huv 6

Liakf sit huf ziapf seef

1 Neeh duanf tif ganv,

meenv huv gee mef miaf mef liauh,

yoou da geef-loh lai lengv-hunf Yiuh-haif gang go Si-laf gee bov lengv-hunf Yiuh-haif gang go Si-bov-laiv gee,

mui veenf feenv goouh goonv gee tif hoouh meenf saf teeh maih mai geef-loh gee.

2 Seeh huv teepf ngeeih huf ziuh yam meenv huv gee inf-inv miaf,

bov geef-loh bov,

"Yam hauf-loh gengf Go Siangf-dif gee longf booiv feenv sak feenv fiah tih meenf heekf gee.

3 Too yi engv tok hauf gee haf!

Meef-loh hheem lokf da meef-loh liakf vanh leeuf na duf bov maif,

ya bif Seengf-lingv sung moonh hemv lai zif huif gee sit na uk miaf,

hauf-loh ziuh faif geef-loh guanh lih teeh neeh gee.

4 Hauf-loh nif,

hauf-loh dif zuan sim doouh goouf,

zuan sim suanf Go Siangf-dif gee."

5 Go neeh gee biang too lai gee lengv-hunf zung eengv,

ziuh liakf Si-tiv-fanh,

geef hheekf see siang sinf Zu,

ya tih bif Seengf-lingv sung moonh gee lengv-hunf;

ya liakf Feei-lif,

Bo-lov-gee-lov,

Niv-zia-nav,

Tiv-meenv,

Ba-miv-nav,

gangf gua na loouh gua Yiuh-haif giauf gee An-tiv-a lengv-hunf Niv-gee-la,

6 yam geef-loh nyunv yoou dau na seeh huv gee,

seeh huv gee ziuh zav moof geen baiv huf geef-loh vooi,

hooi geef-loh doouh goouf.

7 Siangf-dif gee fukf im suanf hhooiv vooi;

Ye-luf-sa-leengh gee meenv huv ya gav meenf huh giauh liauh vooi,

ya lai gif see dunf hee siang sinf Yev-so vooi.

Hoof Si-tiv-fanh

8 Si-tiv-fanh meenf huh giauh lai een huif hemv neengv likf,

yoou da bek ting gee huk meenf huh giauh hhiv guaif gee teeh hemv seenv zif.

9 Dang siv lai huif hangv mee,

vanh yam huif hangv neeh mee tih zeef yeeuv lengv-hunf gee huif hangv,

huif hangv neeh mee gee lengv-hunf tih lokf heeuv Guh-lif-naf hemv heeuv Yaf-lif-san-daf miaf gee,

geef-loh hemv Gi-lif-gia,

Yaf-si-yaf neeh gi mooqf huif hangv gee lengv-hunf,

zung hemv Si-tiv-fanh bianf leenf.

10 Danf tih Si-tiv-fanh tih hhoouf zif huif hemv Seengf-lingv gang go,

geef-loh zung meenf ding lai gua geef.

11 Geef-loh ziuh oot sinf zee lengv-hunf hoouf hee,

yam lengv-hunf neeh gee zooh tiv bov,

"Hauf-loh hingf heekf geef gang go famh Mov-si hemv Siangf-dif vooi."

12 Geef-loh yuh ziuv teef bek ting gee hemv ziangh lauh gee gangf Siangf-dif lutf fapf lauh see neeh gee miaf hoof Si-tiv-fanh loouh,

leeh booiv gung huif vooi,

13 geef-loh ya zooh tiv bov,

"Lengv-hunf neeh huf hee ziangf hangh gang go fanh deeif Seengf-dianf hauf-loh mee hemv Mov-si gee lutf fapf.

14 Eenv veeih hauf-loh hingf geef gang gua,

geef bov lengv-hunf Nah-saf-leekf gee neeh huf Yev-so dif fah Seengf-dianf neeh mee booiv,

ya dif gaih bianf Mov-si suanf sev hauf-loh gee guiv leei."

15 Lengv-hunf ngov yoou gung huif neeh gee zung vook Si-tiv-fanh itf-it teenf hee,

huh na dav geef mee zing goh hian seeh teenf hee.