5 Geef tanv bov,

"Zu haf!

Meef tih naf nee?"

Zu bov,

"Hauf ziuh tih meef bik haih gee neeh huf Yev-so.

6 Uif miaf,

loouh da heeuv vooi,

meef gaiv huk gee teeh,

itf dingf lai lengv-hunf seengv meef."

7 Lengv-hunf hongf moh geef booiv neeh gee nyunv yoou ninh,

mangf meenf gang lai go uk vooi,

eenv veeih geef-loh hingf huh sauv,

danf tih dekf meenf huh lengv-hunf.

8 Soouh-lov lokf dauf matf leeqf uif,

guangv dav vooi,

danf tih gai gee duf meenf dekf lai huh.

Lai lengv-hunf diuf lokf moof geef loouh,

yin geef loouh Daf-mah-seef-geev vooi.

9 Geef tamv veenf gai gee duf meenf dekf lai huh,

ya meenf goonv gai gee ziqf-ziqf.

10 Neeh tif hoouh,

yoou Daf-mah-seef-geev lai meenv huv huf hee yam Yaf-nav-niv-yaf hee,

Zu yoou da siau zeef yianv gee gingh siangf yam geef bov,

"Yaf-nav-niv-yaf haf!"

Geef tanv bov,

"Zu haf,

hauf yoou nooih."

11 Zu hemv geef gang bov,

"Meef uif miaf,

booiv gaiv teenf-teenf neeh hiuf hee vooi,

loouh lanf Yiuh-daf mee div lengv-hunf Daf-suf huf hee,

geef yam Soouh-lov hee.

Noh,

geef doongv tif doouh goouf nenh,

12 yoou da siau zeef yianv gee gingh siangf dekf huh lai lengv-hunf huf hee yam Yaf-nav-niv-yaf hee,

loouh miaf zav moof geen baiv huf geef,

biang geef dekf lai huh vooi."

13 Danf tih Yaf-nav-niv-yaf tanv bov,

"Zu haf,

hauf hingf haih liauh lengv-hunf gang heekf lengv-hunf neeh huf hee,

bov geef yoou Ye-luf-sa-leengh haih seengf huv meef gee meenf huh giauh ook.

14 Gif see ziangh ya sev hhinf zee geef,

yoou nooih hoof lengv-hunf too lai hhuf nooiv meef mee neeh gee."

15 Danf tih Zu bov Yaf-nav-niv-yaf bov,

"Meef biang timv booiv.

Eenv veeih geef tih hauf liakf miaf fokf teeh hauf gee,

geef dif suanf nooiv hauf mee sev hhiv ha minv zukf gee lengv-hunf,

hemv geef-loh gee voongf dooi gangf Yih-seef-liatf gee lengv-hunf.

16 Hauf dif biang geef huh,

geef veeih nooiv hauf mee itf dingf tuh haih liauh hhuh nanf."

17 Yaf-nav-niv-yaf ziuh booiv,

loouh lanf neeh mee vooi,

zav moof geen baiv huf Soouh-lov,

bov,

"Soouh-lov engv tok haf,

meef miaf yoou da sunv gee tif hoouh,

sev meef dekf huh gee Zu,

ziuh tih Yev-so,

geef yam hauf miaf biang dav meef deei hee maif dekf lai huh,

ya bif Seengf-lingv sung moonh."

18 Dav Soouh-lov deei hee it ziu lai goouh gee zing liq teenf hee dok longf miaf,

geef ziuh dekf lai huh vooi,

ziuh uif miaf tuk leei vooi.

19 Geef goonv faih ziuh lai lingf vooi.

Soouh-lov hemv Daf-mah-seef-geev gee meenv huv hemv goonf zih gi veenf vooi,

20 mah siangf ziuh loouh huif hangv gee vooi suanf gang Yev-so,

bov geef tih Leekf-da-hhiangh Siangf-dif huf hee.

21 Too lai lengv-hunf hingf heekf neeh gee zung hhiv guaif,

bov,

"Yoou Ye-luf-sa-leengh haih hhuf nooiv neeh mee gee meenf tih lengv-hunf neeh huf hee haf?

Geef miaf nooih meenf tih dif hoof geef-loh dai booiv ningf gif see ziangh gee haf?"

22 Danf tih Soouh-lov mef miaf mef lai neengv likf,

finh lengv-hunf Yiuh-haif zih yoou Daf-mah-seef-geev neeh gee meenf lai go hau tanv vooi,

zingf mingv Yev-so tih Gi-dukf.

23 Gua duanf tif ganv vooi,

lengv-hunf Yiuh-haif gee hamf liangf dif ga Soouh-lov.

24 Danf tih gooi geef-loh gee bif Soouh-lov huh vooi.

Geef-loh veenf-veenf goomh goomh yoou bak heeuv gee fokf dif ga geef.

25 Danf tih meenv huv geef gee da hheenf ziuh oouv zengf mee miaf siav geef lokf baiv siangf longf booiv.

26 Soouh-lov deuf doongv Ye-luf-sa-leengh vooi,

booiv div meenv huv gee tiang hemv geef-loh yoou ningf goonf.

Danf tih meenv huv gee zung mangf geef,

meenf siang sinf geef tih meenv huv.

27 Nah lai Ba-nav-ba zipf daif geef,

yin geef booiv div seeh huv gee,

oouv geef yoou da sunv di leeuf dekf huh Zu,

Zu di leeuf hemv geef gang go gangf geef yoou Da-mah-seef-geev di leeuf feengf nooiv Yev-so mee looiv nyoof-nyoo gang doouf,

zung seengv zee seeh huv gee.

28 Lokf ninh Soouh-lov ziuh yoou Ye-luf-sa-leengh hemv meenv huv gee hongf goonf uk-uk loouh-loouh,

feengf nooiv Zu mee looiv nyoof-nyoo gang doouf.

29 Geef ya hemv lengv-hunf Yiuh-haif gang go Si-laf neeh gee bianf leenf.

Danf tih geef-loh tiang ban fap dif ga geef.

30 Engv tok gee huh vooi,

ziuh hong geef longf Gai-sah-lif-yaf,

yam geef lokf ninh booiv Daf-suf.

31 Neeh duanf tif ganv bak lengv Yiuh-haif,

Gia-lif-lif,

Sa-mah-lif-yaf gee giauf huif zung fingf anv,

ya fatf zianh uif miaf vooi;

geef-loh zung gingf vuif Zu,

Seengf-lingv ya sev likf liangh zee geef-loh,

guh lif geef-loh,

siang sinf Zu gee lengv-hunf ya mef miaf mef liauh vooi.

32 Bih-deekf leeuf ziqf duf booiv hoou gee tif hoouh,

geef ya booiv Lih-daf vooi tunf zih yoou ninh gee seengf huv.

33 Geef yoou ninh am heekf lengv-hunf huf hee yam Yih-niv-yav hee,

han huanf lap yoou baiv tangf bet veeif vooi.

34 Bih-deekf yam geef bov,

"Yih-niv-yav haf,

Yev-so Gi-dukf yiav meef maif vooi,

uif miaf,

suv gum meef gee uif."

Geef ziuh mah siangf nyunv uif vooi.

35 Too lai zih yoou Lih-daf hemv Sa-leenv gee lengv-hunf dekf huh Yih-niv-yav maif vooi,

ziuh siang sinf Zu vooi.

36 Yoou Ye-faf lai maih huf hee yam Daf-bih-daf hee,

geef tih meenv huv huf hee,

nooiv geef mee go Si-laf gee yam To-zia^a hee.

Geef siangf-siangf huk maif teeh,

boongv tooh neef ngah gee.

37 Dang siv geef lai fingh daiv vooi,

vanh tuk tiv geef mee bangf-bang vooi biang yoou baiv loouf.

38 Lih-daf hemv Ye-faf loof-loo goonf;

meenv huv gee hingf gang Bih-deekf yoou Lih-daf,

ziuh yam lengv-hunf voon huf booiv div geef,

iangv geef bov,

"Hhuf meef meng ziqf booiv ningf hauf-loh neeh hhootf hee,

mengf-meng geef."

39 Bih-deekf ziuh uif miaf hemf moh geef-loh booiv.

Geef doongv ninh vooi,

ziuh lai lengv-hunf yin geef geen loouf vooi.

Too lai gee maih mai zung nyunv yoou ningf Bih-deekf ngai,

oouv To-zia hemv geef-loh yoou ningf goonf gee tif hoouh huk gee yua dooi yua bak sev geef dekf.

40 Bih-deekf yam geef-loh hemv goonf uk booiv,

geef ziuh hhuih longf doouh goouf,

tuanh huf yam tiv mee bov,

"Daf-bih-daf,

uif miaf!"

Geef ziuh guangv dav vooi,

dekf huh Bih-deekf ziuh ngov uif.

41 Bih-deekf nyof moof tooh geef nyunv uif,

ziuh yam seengf huv gee hemv maih mai gee loouh miaf,

biang geef-loh dekf huh To-zia tingf leengv vooi.

42 Teeh neeh hhinh hee suanf hoou Ye-faf vooi,

ziuh lai haih liauh lengv-hunf sinf Zu vooi.

43 Hoouh looif,

Bih-deekf yoou Ye-faf zih yoou lanf Si-meenv haih liauh veenf,

Si-meenv tih bef huk nangv huf hee.