huv 21

Boouh-lov geen Ye-luf-sa-leengh

1 Hauf-loh lif hhooiv geef-loh vooi,

ziuh ngov luaf teenf-teenf doongv Gee-sif doouh.

Haih ngeeih veenf doongv Lov-tiv,

ya lokf ninh doongv Faf-daf-la.

2 Yoou Faf-daf-la am heekf luaf hauv hee dif booiv Feei-niv-gi,

hauf-loh ziuh geen luaf booiv vooi.

3 Booiv doongv da sunv,

looif-looiv dekf lai huh Saif-fuh-luf-si gee tif hoouh,

luaf hauv hee ziuh venh lokf noomf neeh fiangf hee booiv Sif-lif-a,

doongv Tui-lov hauf-loh ziuh geen hhoom vooi,

eenv veeih luaf hauv hee dif yoou ninh longf hua.

4 Hauf-loh div heekf meenv huv yoou ninh gee,

ziuh booiv ningf geef-loh vooi zih sit veenf.

Geef-loh bif Seengf-lingv gamh dungf,

ziuh seengv Boouh-lov meenf ngah geen Ye-luf-sa-leengh.

5 Gua neeh sit veenf vooi,

hauf-loh dif gif zukf booiv,

geef-loh hemv goonf gangf leekf gangf maih hong hauf-loh uk heeuv vooi,

hauf-loh hemv goonf zung hhuih yoou ningf hhoom doouh goouf.

6 Hoouh looif ziuh feenv goonf vooi,

hauf-loh ziuh geen luaf,

geef-loh ya leengv lanf vooi.

7 Hauf-loh lokf Tui-lov gif zukf booiv,

doongv To-lif-maiv vooi,

ziuh geen hhoom booiv tunf engv tok yoou ninh gee,

ya hemv geef-loh zih veenf hee vooi.

8 Haih ngeeih veenf hauf-loh booiv doongv Gai-sav-lif-yav,

zih yoou lanf Feei-lif.

Geef tih suanf Siangf-dif fukf im gee,

ya tih ziapf seef neeh sit huf gee hhiv zung huf hee.

9 Geef lai leemf leekf ti huf zung tih leemf leekf gangf moof,

zung took gang ngif ngianv.

10 Hauf-loh yoou ninh zih gav gi veenf,

lai sian zi huf hee yam Yaf-zia-buf hee,

tih lokf Yiuh-haif longf miaf gee.

11 Geef miaf doongv ningf hauf-loh neeh hhootf hee,

ziuh oouv ba loou Boouh-lov hiuf hee miaf gatf gok gatf moof toof-too gee loouh vooi,

bov,

"Seengf-lingv gang,

'Lengv-hunf Yiuh-haif gee dif yoou Ye-luf-sa-leengh,

teenf hee gatf ba loou neeh hiuf gee lanf zu,

gauv geef sev lengv-hunf hhiv ha minv zukf gee.'"

12 Hauf-loh hingf heekf go neeh gee,

ziuh hemv dang dif gee lengv-hunf gukf lingf hhin Boouh-lov meenf ngah geen Ye-luf-sa-leengh.

13 Danf tih Boouh-lov tanv bov,

"Meef-loh ngai gai gee nooh?

Tee timv hauf mee ngaif tuh.

Hhiv sitf hauf duf ga zunh bif maif vooi,

veeih nooiv Zuh Yev-so mee meenf guan tih bif vanh gatf,

ha tih daiv yoou Ye-luf-sa-leengh,

hauf ya meenf mangf."

14 Hauf-loh meenf hhin lai Boouh-lov longf,

ziuh meenf gang liauh vooi,

ziuh bov,

"Hi voongf Zu gee zih if bin tingf titf."

15 Gua neeh gi veenf vooi,

hauf-loh suv tipf hho yua geen Ye-luf-sa-leengh.

16 Lai Gai-sav-lif-yav gee gi huf meenv huv hemv hauf-loh hongf goonf booiv,

yin hauf-loh booiv lanf Nav-sun vooi zih,

geef tih lengv-hunf Saif-fuh-luf-si gee,

duf ga sinf Zu haih foong vooi.

Boouh-lov booiv tunf Yav-gookf

17 Hauf-loh doongv Ye-luf-sa-leengh vooi,

engv tok hoouf hee eengf-eengv ziapf daif hauf-loh.

18 Haih ngeeih veenf,

Boouh-lov hemv hauf-loh hongf goonf booiv tunf Yav-gookf,

too lai gee ziangh lauh ya yoou ninh.

19 Boouh-lov saf tooi geef-loh vooi,

ziuh oouv Siangf-dif hongv gua geef yoou hhiv ha minv zukf gee lengv foongv huk gee teeh,

it ngoh it teepf seengv zee geef-loh.

20 Geef-loh hingf vooi zung ngenv Siangf-dif.

Yuh bov Boouh-lov bov,

"Engv tok haf!

Meef dekf,

en teeif lai haih liauh vanh lengv-hunf Yiuh-haif gee siang sinf Yev-so vooi,

zung hheekf see zun siuh Mov-si gee lutf fapf.

21 Geef-loh hingf vanh gang meef,

bov meef maiv too lai zih yoou hhiv ha minv zukf lengv foongv gee Yiuh-haif lengv-hunf,

meenf ngah saf teeh Mov-si gee lutf fapf,

yam geef-loh meenf ngah hemv leekf gee ngootf leei,

ya meenf ngah zun siuh guiv leei neeh gee.

22 Meef miaf nooih vooi,

geef-loh meng seeif nge huh,

neeh ziu di leeuf huk?

23 Hauf-loh maiv meef,

yoou nooih lai lengv-hunf ti huf,

geef-loh zung eef Siangf-dif gua vooi.

24 Meef yin geef-loh booiv,

hemv geef-loh hongf goonf huk leei bang neeh mee,

huk leei neeh mee yungh giauh sinf meef hheem geq inf-inv,

biang geef-loh doongv tif hoouh hhoo yi lon hau lemf-lem vooi,

teenf hee hemv goonf ziuh huh,

gua na vanh suanf meef gee teeh tih gev gee,

ya huh meef zun siuh Mov-si gee lutf fapf,

zung tih ziuf guiv leei booiv huk gee.

25 Lengv-hunf hhiv ha minv zukf siang sinf Yev-so neeh gee,

hauf-loh duf ga tia tin yam geef-loh meenf ngah goonv goouh bai gungv gua neeh gee,

meenf ngah goonv baq,

meenf ngah goonv goouh soouf daiv neeh gee,

ya meenf ngah beeng bef beeng maih."

26 Boouh-lov ziuh yin lengv-hunf neeh ti huf booiv vooi,

haih ngeeih veenf ziuh hemv geef-loh hongf goonf huk leei bang neeh mee vooi.

Geef-loh ziuh loouh Seengf-dianf vooi,

seengv gif see leei bang neeh mee leeuf veenf doongv tif ganv moon,

hau biang gif see yoou neeh veenf hee hooi geef-loh hianf goouh sev Siangf-dif.

Boouh-lov bif hoof

27 Neeh sit veenf dif inv gee tif hoouh,

lengv-hunf Yiuh-haif lokf Yaf-si-yaf miaf neeh gee,

yoou da Seengf-dianf dekf huh Boouh-lov vooi,

ziuh ziuv teef too lai gee lengv-hunf miaf hoof geef,

28 gukf lingf yanh bov,

"Lengv-hunf Yih-seef-liatf gee haf!

Meng ziqf miaf boongv ziu,

ziuh tih lengv-hunf neeh huf hee doongv leeuf duf maiv lengv-hunf fanh deeif bek ting doouf-loh gee hemv lutf fapf doouf-loh gee gangf Seengf-dianf neeh mee.

Meenf danv teenf hee,

geef ya yin lengv-hunf hhiv ha minv zukf gee loouh Seengf-dianf vooi,

huk lengv seenv seengf neeh hhootf hee zeq vooi."

29 Geef-loh dif teenf gang,

tih eenv veeih dekf huh Yih-fov-soh gee Teef-lov-feei-mov hemv Boouh-lov hongf goonf yoou heeuv neeh mee gua,

hhif bov Boouh-lov duf ga yin geef loouh Seengf-dianf vooi.

30 Suanf heeuv gee lengv-hunf zung luanh vinv vooi,

bek ting gee hemv goonf deuf miaf hoof Boouh-lov loouh vooi,

hav geef uk Seengf-dianf,

mah siangf ziuh hoop deenh Seengf-dianf gee inf-inv loouh vooi.

31 Geef-loh dif tiang ga geef gee tif hoouh,

lai lengv-hunf boouf goouf sev Loh-mah gun deeif gee senv fu ziangh,

bov,

"Suanf Ye-luf-sa-leengh zung boouf luanf vooi."

32 Senv fu ziangh neeh huf hee ziuh mah siangf yin leekf bingv gee hemv Loh-mah gun deeif gee baiv fu ziangh gi huf deuf doongv ningf geef-loh,

geef-loh dekf huh senv fu ziangh hemv leekf bingv gee miaf vooi,

ziuh meenf git Boouh-lov vooi.

33 Senv fu ziangh ziuh geen booiv hoof Boouh-lov loouh vooi,

yam leekf bingv gee oouv tua voon hiuf miaf tua geef loouh vooi.

Ziuh tooi Boouh-lov tih gai gee lengv-hunf,

huk gai gee teeh vooi.

34 Hemv goonf zung luanh,

lai feenh hee luanh eenv,

lai feenh hee luanh iv,

zung luanh vinv vooi,

senv fu ziangh meenf saf lai uk zinv titf singv huangf,

ziuh yam lengv-hunf dai Boouh-lov loouh loouf buf deeif mee vooi.

35 Boouh-lov giangf geen hhapf loouf,

hemv goonf zung ong vinv vooi,

leekf bingv gee ziuh hamv Boouh-lov uif.

36 Lengv-hunf hoouf hee zung deuf di moh,

gukf lingf yanh bov,

"Ga geef booiv!"

Boouh-lov veeih toof-too bianf leenf

37 Leekf bingv gee dai Boouh-lov dif loouh loouf gee tif hoouh,

Boouh-lov ziuh tooi senv fu ziangh huf hee bov,

"Hauf hhoo yi hemv meef gang go gee meenf?"

Senv fu ziangh bov,

"Meef took gang go Si-laf gee haf?

38 Teenf hee meef ziuh meenf tih lengv-hunf Ai-gipf sianv duanf tif ganv tee vanh zoouf fanh,

yin leekf seeu tee senv deuf booiv da loouh gee neeh huf lo?"

39 Boouh-lov bov,

"Hauf tih lengv-hunf Yiuh-haif gee,

lai yoou Gi-lif-gia gee heeuv Daf-suf mee,

meenf tih lengv-hunf leekf heeuv nook gee,

hhuf meef sev hauf hemv bek ting gee gang go."

40 Senv fu ziangh hongf i vooi,

Boouh-lov ziuh nyunv yoou baiv hhapf loouf hemv bek ting gee viqf moof,

hemv goonf ziuh meenf-meen vooi,

Boouh-lov ziuh hemv geef-loh gang go Si-bov-laiv gee.